Blŭ hrăm hlăm hdră Khua gĭt gai Đảng, Khua Lăn čar Tập Cận Bình lač mâo hŏng anei djŏ sa thŭn mbĭt hŏng Khua gĭt gai Đảng, Khua Lăn čar Tô Lâm hưn mdah hdră ngă bruă ksiêm duah, hluê hriăm, truh kơ ară anei phung êdam êra dua ala čar mâo leh lu klei bi hriăm mơ̆ng hdơ̆ng pô, thâo khăp, thâo pap. Ñu hmăng hmưi, hŏng klei gĭr ktưn leh anăn ai mda asei, phung êdam êra dua ala čar lŏ dơ̆ng bi mguôp, klam ngă bruă klam leh anăn mâo lu klei bi mguôp hĭn kơ bruă mkŏ mjing dua ala čar China leh anăn Việt Nam hrăm mbĭt nao hlăm êlan mrâo mrang, hrăm mbĭt bi râo dŭm hdră bruă ktang phĭt kơ mlih mrâo hŏng klei mbruă, pŏk êlan klei bi mguôp leh anăn hrăm mbĭt mâo boh tŭ dưn.

Bi kơ kdrêč pô, Khua gĭt gai Đảng, Khua Lăn čar Tô Lâm lač, phung êdam êra, phung mda asei dua ala čar dưi ktưn hưn leh anăn mpŭ kơ klei mjĕ giăm, jing dĭng kna, jing ayŏng adei plah wah dua Đảng leh anăn mnuih ƀuôn sang dua ala čar Việt Nam - China mâo leh Khua gĭt gai Hồ Chí Minh leh anăn khua gĭt gai Mao Trạch Đông, mbĭt hŏng dŭm gưl bruă cách mạng jih ai tiê ksul mbŭ. Ñu hmăng hmưi phung mda asei dua ala čar srăng mkŏ mjing klei mĭn bruă kđi čar kjăp, mâo knhuah hdĭp djŏ, mđĭ hĭn klei hriăm, bi lar ai tiê mlih mrâo mbruă, ngă phŭn klei kreh knhâo mrâo mrang, bi myuôm ai tiê nao êlâo, đru mguôp năng kơ klei đĭ kyar mơ̆ng grăp lăn čar leh anăn uêñ mĭn klei bi hgŭm dua ala čar Việt Nam - China.

Ăt hlăm yang hruê dơ̆ng mbruê, Khua gĭt gai Đảng, Khua Lăn čar Tô Lâm leh anăn khua gĭt gai Đảng, Khua lăn čar Tập Cận Bình ktuê dlăng knăm siñê dŭm hră mơar bi mguôp êdah êdi plah wah dŭm phŭn, dhar bruă leh anăn alŭ wăl plah wah dua ala čar.