Knơ̆ng bruă msei Hòa Phát Dung Quất jing sa hlăm dŭm anôk bruă duh mkra hnơ̆ng prŏng, yua lu mnuih mă bruă leh anăn đru mguôp yuôm bhăn hlăm klei đĭ kyar bruă tuh tia mkra mjing mơ̆ng čar Quảng Ngãi. Ară anei Knơ̆ng bruă mâo 3 hdră bruă dôk ngă bruă ti čar Quảng Ngãi, mâo: Wăl bi hgŭm mkra mjing msei Hòa Phát Dung Quất 1; Wăl bi hgŭm mkra mjing msei Hòa Phát Dung Quất 2; Hdră bruă kdrŭn ksĭ container Hòa Phát Dung Quất dôk grăp knhuang bi leh.

Hoàng Ngọc Phượng, K’iăng Khua Knơ̆ng bruă msei Hòa Phát Dung Quất brei thâo, gưl 1 thŭn anei, hnơ̆ng msei rŭ mdơ̆ng mơ̆ng anôk bruă mkra mjing mâo 692.000 ton. Anôk bruă duh mkra dôk lŏ dơ̆ng mđĭ hnơ̆ng mkra mjing hlăm gưl II, đru mđĭ kyar tuh tia mkra mjing ti čar:

 “Anôk bruă mđing kƀĭn mkra mjing, mnia blei mbruă leh anăn mđĭ kriê dlăng bi liê; mđing bi liê kdrăp mnơ̆ng, yua klei kreh knhâo, kdrăp mrâo, bi mlih mrô, mđĭ hnơ̆ng jăk mnơ̆ng dhơ̆ng, mđing kơ mnơ̆ng dhơ̆ng mrâo, mnơ̆ng dhơ̆ng mtah, jăk kơ wăl hdĭp mda leh anăn ngă djŏ hnơ̆ng čuăn ala tač êngao. Knơ̆ng bruă ăt mbruă hlăm klei mkra mjing, ba čhĭ kơ ala tač êngao, mđĭ bruă mkra mjing mguôp hŏng mkŏ mjing anăn knăl mnơ̆ng dhơ̆ng.”

Gư I thŭn 2026, đĭ kyar GRDP mơ̆ng čar Quảng Ngãi mâo 8,24%. Krĭng wăl tuh tia mkra mjing lŏ dơ̆ng ngă bruă klam ba anăp, đru mguôp êbeh mkrah wah hnơ̆ng đĭ kyar mbĭt, bruă mkra mjing mđĭ lar dua ênoh mrô. Krĭng wăl hdră bruă ăt kơrŭ wĭt klă mngač, ênoh čhĭ hliê mnơ̆ng dhơ̆ng leh anăn anôk bruă hrui mă hdră bruă đĭ êbeh15%; hiu čhưn ênguê êdah kdlưn; ba čhĭ kơ ala tač êngao mđĭ lar hnơ̆ng dua ênoh mrô. Anei jing klei bi knăl jăk, mjing tur knơ̆ng kơ čar lŏ dơ̆ng pŏk ngă hdră msir đĭ kyar hlăm wưng kơ anăp.

Khădah snăn, ênoh mrô đĭ kyar bruă duh mkra ka bi knar. Đa đa bruă msĕ si mă mnơ̆ng hlăm gŭ lăn, hdruôm jơ̆ng jep čŭt hrŏ; prăk hrui wĭt knŭk kna hrŏ mkă hŏng wưng anei thŭn dih. Klei năng mđing, hdră bi liê prăk knŭk kna adôk êmưt, mrâo mâo êbeh 7% hdră kčah, jing klei kpăk đuôm prŏng brei ruh mgaih.

 Krĭng wăl lŏ hma, dliê knrơ̆ng, kan hdang knŏng đĭ hlăm brô 3% kyua ênoh bi liê đĭ ktang mơ̆ng mlan 3, ktŭng ba wăt ênoh mnơ̆ng dhơ̆ng, dŭ mdiăng đĭ, mnuih ƀuôn sang bi hrŏ bi liê mkra mjing. Bruă dliê kmrơ̆ng hmăi djŏ kyua gưl mdeo Tết sui; duah mă kan hdang tuôm hŏng klei dleh dlan kyua êa săng êa pui đĭ.  Ti krĭng wăl bruă tuh tia mkra mjing - rŭ mdơ̆ng đĭ 12,76%, lu jing kyua dŭm mta mnơ̆ng dhơ̆ng phŭn msĕ si  êa pui leh anăn msei. Võ Thành Nhân, Khua Anôk bruă ksiêm yap čar Quảng Ngãi brei thâo:

 “Mkŏ mjing ară anei mâo 4,9% hlăm klei bhiăn bruă duh mkra; rŭ mdơ̆ng hrŏ 8,8% ngă kơ hnơ̆ng GRDP kluôm čar hrŏ. Snăn wăt tơdah hnơ̆ng amâo prŏng ôh, ƀiădah hnơ̆ng hrŏ  mơ̆ng bruă anei ăt hmăi lu snăk kơ klei đĭ kyar mbĭt”.

Bi liê knŭk kna lŏ dơ̆ng bi mklă jing boh kdrŭt yuôm bhăn mđĭ kyar thŭn 2026. Khădah snăn, hnơ̆ng bi liê adôk   ƀiă, truh knhal jih gưl I mrâo mâo hlăm brô 7,2% hdră kčah. Čar Quảng Ngãi dôk gĭr gĭt gai ruh mgaih klei gun kpăk kñăm mđĭ pral hnơ̆ng bi liê.

 Nguyễn Công Hoàng, K’iăng Khua Knơ̆ng bruă sang čư̆ êa čar Quảng Ngãi, hnơ̆ng bi liê prăk knŭk kna mơ̆ng čar adôk êmưt kyua lu mta phŭn. Hlăm gưl să, lu alŭ wăl ka  pral hlăm bruă hlue ngă, ruah hdră bruă mrâo hrô kơ ba yua hdră bruă mâo leh hră mơar, ngă êmưt bi liê prăk. Hlăm gưl čar, klei gun kpăk lu jing kyua hdră tla hnô, ruh mgaih anôk ala, bi mklă ênoh lăn leh anăn klei huĭ hyưt. Nguyễn Công Hoàng mtă dŭm dhar bruă, dŭm să gĭr ruh mgaih  klei kpăk đuôm, boh nih hlăm bruă lăn ala leh anăn gĭt gai phŭn prăk bi liê, kñăm mđĭ hnơ̆ng dŭm hdră bruă:

 “Hŏng bruă gĭt gai ngăn prăk, mtă kơ Knơ̆ng bruă ngăn prăk čar Quảng Ngãi pral, mbruă hlăm klei mbha leh anăn gĭt gai phŭn prăk bi liê. Boh sĭt adôk mâo boh klei mâo hdră bruă hnơ̆ng prŏng ƀiădah kƀah prăk bi liê, hlăk êjai đa đa phŭn prăk ka dưi ba yua. Bruă gĭt gai brei dưi ksiêm dlăng kluôm, boh nik hlăm boh klei ênoh hrui mă mơ̆ng prăk yua lăn ka djăp hdră kčah. Mbĭt anăn, brei ksiêm dlăng kjăp bruă yua phŭn prăk hrui wĭt, ñĕ klei čang hmăng kơ phŭn prăk ka klă nik, mâo lu klei amâo myun luč bi kna prăk knŭk kna”./.