Kdriêk Kon Briah, čar Kon Tum mâo giăm 57.000ha dliê hrông. Hlăm dŭm thŭn êgao, bruă sang čư̆ êa kdriêk ngă leh klei ksiêm dlăng, bi klă dŭm ênhă dliê mâo ana êa drao hlăm klei čuăl mkă, mđĭ kyar, mkŏ mjing thiăm hdră duh ƀơ̆ng kơ mnuih ƀuôn sang. Nguyễn Văn Thuỷ, k’iăng khua bruă sang čư̆ êa kdriêk Kon Briah brei thâo, msĕ si ti să Đăk Tơ Re dưi mkŏ mjing bruă răng mgang, mă yua ana mật nhân hlăm ênhă hiăm 100 ha dliê. Mâo thiăm boh tŭ bruă duh mkra mơ̆ng ana êa drao, mnuih ƀuôn sang mâo boh kdrŭt răng mgang dliê jăk hĭn ênhă dliê dưi jao. Anei ăt jing sa hdră êlan mơ̆ng kdriêk Kon Briah kñăm răng mgang, mđĭ kyar dliê hơĭt kjăp:

“Mâo hŏng anei 5 thŭn kluôm ênhă dliê hlăm alŭ wăl dưi pla Sâm Ngọc Linh knơ̆ng bruă phăn jao kơ mnuih ƀuôn sang, kơ êpul êya ngă pô klă sĭt. Mnuih ƀuôn sang, êpul êya dưi dưn boh tŭ mơ̆ng bruă răng mgang dliê jing hdră păn ngă bruă răng mgang dliê. Tal dua jing mnuih ƀuôn sang dưi pla ana êa drao ti gŭ êyui dliê, boh nik jing Sâm Ngọc Linh”.

Êbeh 2 thŭn êgao, mbĭt hŏng bruă răng mgang dliê, mnuih ƀuôn sang čar Kon Tum mă leh 694 tôn ana êa drao ti gŭ êyui dliê, hlăm anăn lu jing ana culy leh anăn hruê̆ huyết đằng. Mbĭt hŏng ana êa drao hlăm dliê, truh kơ ară anei čar Kon Tumdưi pŏk mlar, mđĭ kyar êbeh 10.800 ha ana êa drao, hlăm anăn mâo êbeh 2.400 ha ana Sâm Ngọc Linh. Boh nik, lu mta ana êa drao mơ̆ng čar Kon Tum dưi  pla leh anăn čăt đĭ hlăm dliê, êdah êdi msĕ si Ngọc Linh, sâm hruê̆, ngũ vị tử…

Amai Y Hlạng, ti ƀuôn Pu Tá, să Măng Ri, kdriêk Tu Mơ Rông brei thâo, kyua pla sâm Ngọc Linh, sâm hruê̆ ti gŭ êyui dliê, mnuih ƀuôn sang mâo hnư hrui wĭt, kpưn đĭ tlaih mơ̆ng klei ƀun ƀin leh anăn đĭ kơ mdrŏng mơ̆ng dliê:

“Lač sĭt ti să Măng Ri, knŏng gŏ sang pô ăt msĕ mơh mnuih ƀuôn sang ară anei dưi mđĭ kyar bruă duh mkra tal 1 kơ hồng đẳng sâm, đa đa mâo sâm Ngọc Linh. Mnuih ƀuôn sang dôk kñăm răng mgang dliê čiăng krơ̆ng kơ dliê pla sâm hruê̆, sâm Ngọc Linh.

Hlăm hdră mtrŭn mrô 14, hruê 19/5/202 kơ bruă duh bi liê, mđĭ kyar leh anăn mkra mjing ana êa drao ti alŭ wăl čar truh thŭn 2025, tă hdră truh thŭn 2030, Bruă Đảng čar Kon Tum bi klă “Ba čar Kon Tum jing krĭng pla mjing ana êa drao ala čar jing jing anôk mkra mjing ana êa drao prŏng hlăm lăn čar hlăm thŭn 2025. Mđĭ kơhưm anăn knăm Sâm Ngọc Linh Kon Tum hlăm anôk mnia mblei hlăm lăn čar leh anăn tač êngao”. Dŭm dhar bruă, dŭm alŭ wăl mtrŭt mđĭ bruă hâo hưn, hlăk mblang kluôm êlam kơ hdră êlan duh bi liê, mđĭ kyar ana êa drao mơ̆ng čar. Hlăm anăn, knơ̆ng bruă lŏ hma leh anăn mđĭ kyar krĭng ƀuôn sang bi mguôp hŏng dŭm dhar bruă djŏ tuôm čŏng mkŏ mjing hdră êlan rơ̆ng hluê ngă dŭm hnơ̆ng čuăn, bruă klam dưi jao, đru kčĕ hŏng bruă sang čư̆ êa čar jao hdră êlan kơ ana êa drao găl guôp hŏng boh sĭt grăp alŭ wăl. Mbĭt anăn gĭt gai dŭm anôk bruă hluê ngă dŭm hdră êlan pŏk mlar, mđĭ kyar krĭng pla mjing, ktuê dlăng, thâo klă leh anăn hmao mâo hdră êlan mgaih msir klei dleh dlan, kpăk gŭn hlăm klei duh bi liê bruă knŭk kna, mđĭ kyar leh ananw mkra mjing ana êa drao hlăm alŭ wăl.

Jing krĭng pla mjing ana êa drao mơ̆ng čar, Võ Trung Mạnh, khua bruă sang čư̆ êa kdriêk Tu Mơ Rông brei thâo, boh tŭ klă sĭt mơ̆ng klei čuăl mkă, pla ana êa drao ti gŭ êyui dliê dưi brei kơ mnuih ƀuôn sang bi mlih klei ngă hŏng dliê:

“Mơ̆ng klei bi rai dliê ngă hma, ară anei mnuih ƀuôn sang nao pla dliê. Thŭn anei mnuih ƀuôn sang čŏng bi liê prăk pô pla 194 ha dliê. Anăn jing klei mlih hlăm klei thâo săng mơ̆ng bi rai dliê jing pla dliê leh anăn răng mgang dliê. Hdră êlan sui čiăng kơ mnuih ƀuôn sang tlaih ƀun, răng mgang, mđĭ kyar dliê, pla ana êa drao, rông mnơ̆ng ti gŭ êyui dliê nao mbĭt hŏng bruă hiu čhưn ênguê”.

Mâo ênhă dliê hrông prŏng hĭn ti Lăn Dap Kngư, hŏng êbeh 550.000ha, bruă čar Kon Tum mtrŭt mđĭ bruă pla mjing ana êa drao dôk ba wĭt boh tŭ mdua kơ mnuih ƀuôn sang leh anăn bruă sang čư̆ êa, dưi mđĭ kyar bruă duh mkra leh anăn dưi răng mgang dliê. Thŭn mrâo êgao, ênoh đĭ mơ̆ng bruă pla mjing ana êa drao ti čar Kon Tum mâo 1.650 êklai prăk, mâo hlăm brô 24% ênoh đĭ hlăm bruă lŏ hma./.