Hluê si hdră čuăl mkă êlan klông wưng thŭn 2021 – 2030, hdră tă truh thŭn 2050, êlan dơ̆ng êran pral Quảng Ngãi - Kon Tum mâo boh taih 136km, hŏng 4 grông êlan, hdră duh bi liê êlâo kơ thŭn 2030. Ară anei dua čar Kon Tum leh anăn Quãng Ngãi bi kƀĭn leh anăn tŭ ư hưn mdah hŏng Phŭn bruă mkŏ mkra rŭ mjing êlan dơ̆ng pral hŏng ênoh duh bi liê giăm 35.400 êklai prăk, hlăm hdră yuôm bhăn mơ̆ng lăn čar.

Hluê si klei bi êdah, êlan dơ̆ng pral Quảng Ngãi - Kon Tum găn 5 alŭ wăl jing wăl krah Đức Phổ, kdriêk Ba Tơ (boh taih 58km alŭ wăl čar Quãng Ngãi) leh anăn 3 kdriêk jing Kon Plông, Kon Braih leh anăn ƀuôn prŏng Kon Tum (boh taih 78km ti čar Kon Tum). Êlan dơ̆ng pral mĭn tĭng mâo 4 grông êlan êdeh, êran pral mơ̆ng 80 – 100km sa mmông. Ti êlan dơ̆ng mâo 9 anôk êlan mkŏ, rơ̆ng mkŏ hŏng dŭm bĭt êlan dơ̆ng phŭn, anôk bruă duh mkra, dhar kreh, bruă kđi čar jăk găl. Êngao kơnăn, êlan dơ̆ng êran pral anei mĭn tĭng mâo 60 kban phŭn, 10 kban găn leh anăn 3 ƀăng mur.

Mơ̆ng klei bi êdah dua čar, mrâo anei, Phŭn bruă mkŏ mkra mâo leh klei bi klă jao kơ Êpul ksiêm dlăng hdră êlan mrô 85 mkŏ mjing ngă klei hưn mdah hluê ngă hdră êlan duh bi liê rŭ mjing êlan dơ̆ng pral Quảng Ngãi - Kon Tum. Êpul kriê dlăng hdră mrô 85 mă bruă hŏng dŭm anôk bruă djŏ tuôm čiăng tŭ mă jih jang boh tŭ klei ksiêm duah čiăng lŏ dơ̆ng ksiêm duah, ngă klei hưn mdah hdră êlan duh bi liê, ñĕ kơ klei lăp wĭt, luč liê mang.

Đàm Phúc Tuyên – K’iăng khua knơ̆ng bruă mkŏ mkra čar Kon Tum brei thâo: êlan dơ̆ng pral Quảng Ngãi - Kon Tum, knŏng prăk ruh mgaih anôk ala mĭn tĭng êbeh 1.200 êklai prăk. Dua čar ƀuăn mkăp djăp prăk čiăng ngă bruă ruh mgaih anôk ala, đru kơ klei mă bruă hlăm thŭn 2026. Bi čar Kon Tum mprăp hlăm brô 650 êklai prăk kơ bruă ruh mgaih anôk ala. Mă klei hriăm mơ̆ng dŭm hdră mkăn, čar thâo êlâo dŭm klei dleh dlan čiăng čŏng pô mâo dŭm hdră êlan ngă bruă ruh mgaih anôk ala.

Đàm Phúc Tuyên brei thâo: Bruă rŭ mjing êlan dơ̆ng êran pral Quảng Ngãi - Kon Tum amâo djŏ knŏng bi hrŏ boh taih, mtrŭt mđĭ klei mnia mblei, ƀiădah lŏ brei kơ Măng Đen mđĭ kyar bruă hiu čhưn ênguê. Tơdah êlan dơ̆ng dưi duh bi liê hnưm, srăng mjing Măng Đen jing anôk bruă hiu čhưn ênguê wăl mnơ̆ng hdĭp prŏng hĭn ti Lăn Dap Kngư, mbĭt anăn đru kơ Kon Tum leh anăn Quãng Ngãi jing gru mngač bruă duh mkra ti krĭng kwar Krah – Lăn Dap Kngư.

Mbĭt anăn, êlan dơ̆ng pral Quảng Ngãi - Kon Tum lŏ đru mkŏ êlan klông hŏng êlan dơ̆ng pral ngŏ yŭ mkŏ hŏng êlan dơ̆ng pral dưr – dhŭng, đru bi hrŏ ênoh prăk dŭ mdiăng leh anăn ba dŭm mta mnơ̆ng dhơ̆ng msĕ si kyâo, êa drao, ksu, kphê truh kơ kdrŭn ksĭ Dung Quất găl hĭn. Boh nik êlan anei lŏ đru kơ bruă mkŏ mjing leh anăn răng mgang lăn čar, hŏng čar Quãng Ngãi, Kon Tum leh anăn Lăn Dap Kngư, krĭng dap kwar Krah ăt msĕ mơh mkŏ alŭ wăl 3 kiêng đĭ kyar Việt Nam – Lào – Capuchia./.