Mơ̆ng hruê dưi hriăm mjuăt ba yua kdrăp mrâo, Phùng Ngọc Quát, khua alŭ 6, alŭ Cao Thành, să Ea Kao, ƀuôn prŏng Ƀuôn Ama Thuôt, čar Dak Lak, amâo lŏ guôn nao ti grăp boh sang čiăng hưn ôh. Êpul Zalo mơ̆ng êpul dưi mkŏ mjing đru leh kơ ñu hưn mthâo djăp boh  phŭn čiăng kơ grăp čô mnuih thâo, hlue ngă leh anăn wĭt lač klei blŭ:

 “Dŭm app VNelD amâodah êpul Zalo hlăm êpul găl ênưih kơ mnuih ƀuôn sang hâo hưn ti să, ti êpul kơ alŭ pô dưi bi blŭ hrăm mơ̆ng app čiăng ênưih thâo săng, amâodah mâo bruă bi kƀĭn mơ̆ng alŭ ăt pral hĭn, amâo guôn nao hưn ti grăp boh snag, grăp čô mnuih ôh”.

 Kdrăp mrô mđĭ klei găl ênưih, mkiêt mkriêm wưng kơ jih mnuih ƀuôn sang, anôk bruă duh mkra leh anăn dŭm anôk bruă kriê dlăng knŭk kna, đru mđĭ boh tŭ bruă knuă… Ƀiădah ti Dak Lak hŏng lu mnuih, boh tŭ mơ̆ng kdrăp mrâo anei hlăm klei hlue ngă dŭm hdră bruă knŭk kna, jing ka djŏ msĕ si klei čang hmăng ôh. Đào Thị Mai ti ƀuôn hgŭm Tân Lợi, ƀuôn prŏng Ƀuôn Ama Thuôt, čar Dak Lak brei thâo:

 “ Kâo ka yua ôh kdrăp mrâo ba yua hră mơar kơ lăn ala kyua anăn kâo ăt čang hmăng knŭk kna leh anăn bruă kdrăp mrâo đru kâo kơ klei anăn msĕ si hâo hưn leh anăn mtô mblang kơ mnuih ƀuôn sang yua kdrăp mrô hlăm klei ngă bruă dưi ƀiă luč hruê mmông, ai tiê, klei mnuih ƀuôn sang găn êrô”.

 Čiăng bi hrŏ kơ anôk kčah kơ klei thâo ba yua kdrăp mrâo plah wah dŭm anôk bruă kriê dlăng mnuih ƀuôn sang, čar Dak Lak mkŏ mjing êbeh 2000 êpul kdrăp mrô êpul êya hŏng giăm 12 êbâo čô. Lu hlăm anăn jing phung mda asei, jih ai tiê, ba kdrăp mrâo truh hŏng grăp gŏ sang. Ayŏng Nguyễn Văn Mạnh, phung hlăm êpul kdrăp mrô êpul êya să Ea Ninh, kdriêk čư̆ Kuin, brei thâo:

Hŏng bruă mkŏ mjing ala ƀuôn mrô, hmei lŏ pŏk ngă hâo hưn kơ jăk hŏng gru hmô êdeh hâo hưn, mđĭ bruă tĭng tla điện tử leh anăn klei blŭ hrăm mbĭt mlih mrô, bruă tĭng tla điện tử tŭ dưn hŏng sa boh phŭn hmei dôk pŏk ngă mâo klei tŭ dưn”.

Mbĭt hŏng mnuih ƀuôn sang lŏ mâo dŭm anôk bruă dang kông. Nguyễn Văn Thản, K’iăng Khua VNPT Dak Lak brei thâo, hŏng dŭm anôk bruă duh mkra hlăm bruă, VNPT Dak Lak bi leh klei b ayua 4G kluôm čar, klei pui ăt dưi pŏk ngă truh kơ grăp gŏ sang. Mbĭt anăn, anôk bruă ăt hgŭm mtô kơ knuă druh gưl kdriêk leh anăn dŭm êpul kdrăp mrô êpul êya čiăng kơ diñu thâo kơ tur knơ̆ng mrô, duh kơ bruă djuê ana leh anăn mtô kơ mnuih ƀuôn sang.

 “Ară anei, VNPT hgŭm mtô kơ phung knuă druh ti gưl kdriêk, knuă dru kdrăp mrô êpul êya čiăng păn kjăp dŭm tur knơ̆ng kdrăp mrô duh kơ bruă hâo hưn mtô mblang kơ mnuih ƀuôn sang leh anăn mtô kơ mnuih ƀuôn sang yua. Hlăm bruă knŭk kna, hmei dôk rơ̆ng bruă bi hgŭm dŭm knơ̆ng bruă msĕ si jia, dŭm adŭ bruă kơ mnuih ƀuôn sang hlăm bruă lăn ala čiăng mjing klei găl kơ mnuih ƀuôn sang hlăm klei hlue ngă hră mơar hŏng klei jăk, găl ênưi hlăm wưng kơ anăp.”

Dak Lak kčah hdră kñăm truh knhal jih thŭn 2025, mâo 80% knuă druh, phung mă bruă mâo klei thâo mrô; 70% mnuih ƀuôn sang dưi mtô klei thâo mrô, 80% čô mnuih mă bruă hlăm dŭm anôk bruă, êpul hgŭm bruă thâo yua kdrăp mrô thâo mĭn duh kơ bruă mkra mjing. Ra Lan Trương Thanh Hà,  K’iăng  Khua Knơ̆ng bruă kreh knhâo leh anăn kdrăp mrâo čar Dak Lak brei thâo, čiăng mđĭ kyar bi mlih, êngao kơ mđing bi liê anôk bruă dang kông nah gŭ, êlan klei pui 4G/5G ti dŭm krĭng phŭn, čar srăng kƀĭn mđĭ klei thâo phung knuă druh anôk bruă nah gŭ, mđĭ ktang bruă hâo hưn mtô mblang, mđĭ bi hriăm kdrăp mrâo hŏng grăp čô mnuih.

 “ Hlăm wưng kơ anăp, hmei srăng lŏ dơ̆ng kčĕ kơ čar dŭm hdră msir leh anăn hdră pŏk ngă tŭ dưn bruă ngă mơ̆ng dŭm êpul kdrăp mrâo êpul êya, anôk mkŏ mơ̆ng bruă knŭk kna, dhar bruă, đru kơ mnuih ƀuôn sang yua leh anăn hgŭm hlăm klei bi mlih mrô.”

Kyua knhuang êbat kjăp, kdrăp mrô dôk jing sa kdrêč hlăm klei hdĭp mnuih ƀuôn sang, mơ̆ng ƀuôn sang truh kơ wăl krah. Leh anăn grăp hruê, ti Dak Lak mâo thiăm lu mnuih jing mnuih ƀuôn sang mô, bi mjing sa ala ƀuôn mrô kluôm, jăk siam leh anăn tŭ dưn. Anei jing tur knơ̆ng yuôm bhăn čiăng kơ čar mkŏ mjing knŭk kna mrô, ala ƀuôn mrô, bruă duh mkra mrô.