Dua čô khua gĭt gai Đảng, khua lăn čar bi êdah klei hơ̆k mơak ti anăp dŭm klei đĭ kyar jăk siam plah wah klei mjĕ giăm dua Đảng, dua lăn čar hlăm wưng êgao, êdah êdi bi bi trông kơ hdră êlan gưl dlông, dŭm hdră êlan bi mguôp ƀrư̆ hruê ƀrư̆ kluôm dhuôm, lu jơr, đăo knang, bi mguôp klei êđăp ênang - bruă lĭng kahan mơ̆ng klei mjĕ mjuk jing bi mguôp klă sĭt hĭn, bi mguôp bruă duh mkra mnia mblei, duh bi liê êlan klông mâo lu klei mrâo, bi mguôp alŭ wăl, mjĕ êrô mnuih ƀuôn sang mbruă, bi mguôp lu tĭng ƀrư̆ hruê ƀrư̆ kjăp. Dua čô khua gĭt gai mñă klă, hlăm wưng dleh ksiêm dlăng mơ̆ng boh sĭt tar rŏng lăn, Dua Đảng, dua lăn čar čiăng bi mguôp kjăp, lŏ dơ̆ng bi êlam, mđĭ hnơ̆ng klei mjĕ giăm Việt Nam - China hlăm wưng mrâo, đru mguôp klă klơ̆ng kơ klei êđăp ênang, bi mguôp leh anăn mđĭ kyar alŭ wăl leh anăn tar rŏng lăn.

Bi kơ hdră êlan mđĭ klei mjĕ giăm dua Đảng, dua lăn čar hlăm wưng kơ anăp, dua čô khua gĭt gai mñă klă srăng lŏ dơ̆ng gĭt gai dŭm gưl bruă, dhar bruă nao klă hŏng mta kñăm kluôm “6 hĭn” rơ̆ng kơ klei mjĕ mjuk jêñ jêñ, mđĭ kyar tŭ dưn bruă klam tă hdră mơ̆ng Đảng, mđĭ klei bi mguôp klă klơ̆ng hlăm dŭm mta bruă, bi kjăp tur knơ̆ng yang ƀuôn kơ klei mjĕ giăm dua tĭng, bi mguôp kjăp hlăm dŭm hră êlan lu tĭng, ksiêm dlăng leh anăn msir dŭm klei kpăk dôk mâo.

Hlăm klei blŭ hrăm, dua čô khua gĭt gai bi klă mphŭn pŏk “Thŭn bi mguôp bruă hiu čhưn ênguê Việt Nam - China 2026 - 2027” bi tŭ ư mtrŭt mđĭ dŭm klei bi mguôp, mtrŭt mđĭ bruă hiu čhưn ênguê, bi mguôp mđĭ hnơ̆ng bruă mkŏ mkra, bi kjăp leh anăn djă pioh kơhưm anôk mâo lu phung tuê hiu čhưn ênguê hdơ̆ng pô.