Tinei, Khua gĭt gai Đảng leh anăn Êpul ngă bruă nao myơr brui mngưi bi hdơr kơ phung jhŏng ktang djiê êngiă ti knưng bi hdơr phung jhŏng ktang djiê êngiă, nao čuă phung knuă druh lĭng kahan anôk rada 27 leh anăn gĭt gai mmông mă bruă hŏng bruă đảng kdriêk Bạch Long Vĩ.

Mñă klă plao ksĭ Bạch Long Vĩ mâo bruă klam jing anôk đru, sa anôk ksiêm dlăng klei êđăp ênang hlăm êa ksĭ, boh nik jing krĭng ksĭ Đảo Bạch Long Vĩ jing sa hlăm 8 anôk mă kan hdang prŏng mơ̆ng Plang Dưr, wăl mnơ̆ng hdĭp lu jơr, ƀuôn prŏng leh anăn kdriêk čiăng mĭn kơ hdră êlan leh anăn bruă ngă klă klơ̆ng čiăng kơ kdriêk plao ksĭ jing knơ̆ng abnôk bruă kan hdang, mđĭ kyar bruă rông kan hdang leh anăn iêo jak phung tuê hiu čhưn ênguê, msĕ hŏng hdră mtrŭn mơ̆ng Phŭn bruă kđi čar. Bi kơ bruă klam hlăm wưng kơ anăp, Khua gĭt gai Đảng lač, čiăng čuăl mkă jăk krĭng bruă duh mkra leh anăn wăl mnơ̆ng hdĭp čiăng mâo hdră êlan duh bi liê hrăm mbĭt kơ bruă mkŏ mkra msĕ si pui kmlă, êlan klông, dăng kông, bruă rông kan hdang, bi mdrơ̆ng hŏng klei bi mlih yan adiê, anôk dap tơdah mâo angĭn êbŭ, rơ̆ng kơ klei bi mguôp kjăp plah wah mđĭ kyar bruă duh mkra ala ƀuôn, nao mbĭt hŏng bruă răng mgang klei êđăp ênang.