Mlam mmăt mbrue (12/11) ti Hà Nội, kkuh mơak bi hdơr 94 năm hrue bruă mặt trận čar kwar gưl dlông Việt Nam (18/11/1930 - 18/11/2024), Khua gĭt gai Đảng Tô Lâm nao leh hlăm knăm bi kƀĭn prŏng jih jang djuê ana ti ƀuôn hgŭm Quán Thánh, kdriêk čar Ba Đình. Khua gĭt gai Đảng mñă, klei ktang mơ̆ng klei thâo bi mguôp jih jang djuê ana jing yuôm bhăn snăk hŏng kluôm Đảng, jih jang mnuih ƀuôn sang, dư gan klei dleh dlan lông dlăng, ngă jăk bruă mlih mrâo, mâo klei đĭ kyar kluôm, mkŏ mjing ƀuôn prŏng phŭn êđăp ênang, dhar kreh ênuk mrâo.

Lač kơ lăn čar drei mâo djăp klei găl hŏng dŭm klei yuôm bhăn mơ̆ng hƀuê ênuk gĭt kpưn đĭ hlăm ênuk ară anei, jing ênuk djuê ana kpưn đĭ. truh kơ ară anei khua gĭt gai Đảng yap mnuih ƀuôn sang jing phŭn, jing mta kñăm kơ klei bi ktưn, mđing ruh mgaih jih klei dleh dlan klei gun kpăk, čiăng kơ jih jang bruă mâo ngă hŏng klei jăk, mâo klei đĭ kyar prŏng, mđĭ klei hdĭp mda mnuih ƀuôn sang, čiăng kơ jih jang mnuih dưi dưn sơăi boh tŭ dưn mơ̆ng klei mlih mrâo, klei mđĭ kyar, amâo mâo sa čô mnuih lui kơ tluôn ôh./.