Ƀri wưng klă klơ̆ng nao čuă Peru leh anăn nao hlăm hruê kăm gưl dlông klei kƀĭn bi mguôp bruă duh mkra Asi – Pacific (APEC) 2024. Aguah mbruê 13/11, hluê mmông Việt Nam, ti ƀuôn prŏng phŭn Lima, Khua lăn čar Lương Cường nao čuă leh anăn mă bruă hŏng knơ̆ng bruă Viettel Peru (Bitel) – knơ̆ng bruă mlir mơ̆ng Êpul grŭp bruă tuh tia – Dăng kông lĭng kahan Viettel ti Peru.

Blŭ hrăm hlăm mmông mă bruă, Khua lăn čar Lương Cường mñă ktang, ti gŭ klei gĭt gai, ktrâo lač mơ̆ng Knơ̆ng gĭt gai lĭng kahan gưl dlông, Phŭn bruă lĭng kahan leh anăn jêñ jêñ, klă anăp jing bruă Đảng, êpul khua gĭt gai Viettel, knuă druh, phung mă bruă Bitel dưi bi lar knhuah hdĭp “Lĭng kahan Awa Hồ”, klei thâo mĭn, klei jhŏng, klei bi mguôp, găn jih klei dleh dlan, klei lông dlăng čiăng mâo dŭm hdră ngă bruă hŏng klei mbruă, mdê hĭn, đru kơ Bitel ƀrư̆ ƀrư̆ bi klă kơhưm pô leh anăn dôk kjăp ti anôk mnia mblei krĭng Mi latino. Khua lăn čar lač klei tŭ jing mơ̆ng Bitel brei ƀuh klei găl leh anăn klei thâo mĭn Việt Nam dưi kpưn đĭ tar rŏng lăn, bi ktưn mtăp mđơr hlăm anôk mnia mblei tar rŏng lăn.