Ti Điện Kính Thiên, ti dlông čŏng čư̆ Nghĩa Lĩnh, hŏng ai tiê mpŭ lač jăk kơ Aê aduôn atâo atiêt, bi êdah klei bhiăn Mnăm êa hdơr kơ hnoh mơ̆ng djuê ana Việt Nam, Khua lăn čar Lương Cường mbĭt hŏng phung khua kiă kriê Đảng, Knŭk kna lehanăn phung khua alŭ wăl nao čuh leh brui mngưi, dưm kwang mnga, bi êdah klei hdơr knga kơ aê aduôn atâo atiêt, phung aê ama nao êlâo mâo leh klei đru mguôp hlăm hdră mkŏ mkra ala čar čiăng kơ phung čô anak lŏ čuê knhuah gru Lạc Hồng mkŏ mkra lăn čar Việt Nam mdrŏng siam, đĭ kyar kreh dhar msĕ si ară anei.

Dăl hlăm ktuê êlan hƀuê ênuk mkŏ mkra lehanăn răng mgang ala čar, klei bhiăn hdơr knga kơ aê aduôn atâo atiêt jing leh klei bi mguôp, jing ai ktang mơ̆ng djuê ana, ba wĭt leh lu boh tŭ dưn kơ Việt Nam hlăm hdră bi hgŭm mdrơ̆ng hŏng klei yan adiê ngă, klei truh jŭ jhat, răng mgang lehanăn mkŏ mkra ala čar. Bi hdơr hruê djiê kơ Mtao Hùng amâo djŏ knŏng jing hruê mơak prŏng mơ̆ng djuê ana, ƀiădah lŏ jing wưng čiăng mđĭ lar ai tiê khăp kơ ala čar, ai tiê čŏng pô gĭr ktưn kpưn đĭ – msĕ si klei Awa Hô tuôm mtă leh “Phung mtao Hùng mâo leh klei đru mguôp mkŏ mkra ala čar, Awa čô drei brei thâo bi mguôp krơ̆ng kjăp ala čar”./.