Hlăm wưng 2021–2024, čar Dak Lak pioh leh 35,7% ênoh bi liê prăk knŭk kna alŭ wăl kơ bruă sang hră, mtô bi hriăm leh anăn mtô mbruă hŏng êbeh 28.300 êklai prăk. Khădah snăn, ênoh mnuih mă bruă hriăm mâo leh hră bi mklă leh anăn mnuih mă bruă mâo hnơ̆ng jăk adôk ƀiă. Nguyễn Bá Thành,  Khua Êpul gơ̆ng hlŏng ngă Khua Knơ̆ng bruă ƀêñ hra 333 Dak Lak brei thâo, ară anei knơ̆ng bruă dôk mđĭ ktang dŭm bruă mkra mjing, ƀiădah lŏ kƀah kjham phung mă bruă thâo bruă brei anôk bruă čŏng mtô bi hriăm hlăm êpul hlue si hdră “djă kngan ktrâo bruă”. Wăt tơdah 75% čô mnuih mă bruă hlăm knơ̆ng bruă mâo leh hră bi mklă, ƀiădah mnuih mă bruă hdră mnêč êlam, boh nik dŭm anôk bruă brei mâo klei thâo mrâo mrang leh anăn klei mĭn mlih mrâo mbruă… snăn kƀah snăk. Nguyễn Bá Thành brei thâo:

 “Kdrăp mrâo msĕ si mâo ôh klei bi hriăm mjuăt kơ bruă ƀêñ hra mơ̆ng kbâo ƀiădah hmei pral mtô tinăn mtam, phung thâo leh bruă lu srăng lŏ mtô kơ phung thâo ƀiă. Phung hđăp lŏ mtô kơ phung mrâo čiăng ba yua. Tơdah sang mkra mjing tiŏ nao hriăm mjuăt ti sa anôk bruă mkăn amâo djŏ bruă snăn ăt hơăi mang mơh, amâo dưi msir ôh bruă knuă hmei”.

Hlue si nai prĭn Nguyễn Thanh Trúc,  Khua sang hră gưl prŏng Lăn Dap Kngư, bruă kƀah phung mă bruă hnơ̆ng jăk kơ Lăn Dap Kngư ară anei, mâo klei gun kpăk ka mâo klei mblang ôh mơ̆ng klei mphŭn mŭt. Klă klơ̆ng, hlăm ênoh 35 bruă mtô bi hriăm ti sang hră gưl prŏng, mâo lu bruă djŏ guôp  hŏng mdê bi alŭ wăl, mâo klei čang hmăng kơ bruă mă leh anăn prăk hrui wĭt leh ruĕ hriăm, ƀiădah amâo mâo phung hđeh čih anăn hriăm ôh:

 “Êpul bruă lŏ hma dliê kmrơ̆ng ruah phung hriăm ƀiă snăk, msĕ si thŭn 2024 knŏng mâo êbeh 50%. Khădah snăn hlăm klei hưn mdah kơ prăk hrui wĭt mơ̆ng bruă mă phung hriăm gưl prŏng leh ruĕ hriăm, lu phung hriăm gưl prŏng bruă lŏ hma lŏ mâo hnơ̆ng prăk hrui wĭt kah knar lu hĭn dŭm bruă mkăn ƀiădah phung hđeh amâo ruah ôh bruă anei čiăng hriăm. Kyua anăn ăt dôk mâo klei bi kpleh kơ klei čiăng ala ƀuôn”.

 Ti  Lăn Dap Kngư, Dak Lak jing čar mâo lu mnuih ƀuôn sang, hŏng êbeh 2 êklăk čô mnuih, ƀiădah hnơ̆ng mnuih mă bruă dôk jing klei kƀah. Hlue si Nguyễn Thiên Văn, K’iăng Khua Knơ̆ng bruă sang čư̆ êa čar Dak Lak, ênoh mnuih mă bruă mơ̆ng leh hriăm mjuăt mâo hră bi mklă ti čar mrâo mâo hlăm brô 1/5. Năng mđing, čar ka mâo ôh mnuih mă bruă hnơ̆ng jăk hlăm dŭm bruă čiăng kơ kdrăp mrâo mtang, gĭt gai mrô, čŏng mkra mjing. Klei anei hmăi kơ hnơ̆ng mkra mjing mă bruă leh anăn klei dưi bi ktưn mơ̆ng bruă duh mkra alŭ wăl.

 “Čar Dak Lak ară anei ka mâo  lu anôk bruă duh mkra hnơ̆ng ngă bruă prŏng, knŏng mâo điêt leh anăn điêt snănk, kyua anăn ăt djŏ tuôm kơ klei mmtô bi hriăm. Tinei mâo đa đa bruă djŏ hŏng klei hlue ngă sĭt ƀiădah klei dưi anôk bruă duh mkra anăn brei pŏk mlar leh anăn mđĭ kyar hnơ̆ng snăn kơh dưi jum mnuih mă bruă”.

Hlue si êpul ksiêm dlăng mơ̆ng Knơ̆ng bruă Dhar kreh - ala ƀuôn mơ̆ng Bruă kƀĭn ala, Dak Lak mâo klei găl prŏng ƀiădah čar knŏng čiăng mâo sa hdră sui, hrăm mbĭt leh anăn klă sĭt hĭn kơ klei mđĭ kyar mnuih mă bruă, boh nik hdră êlan iêô jak phung mbruă, boh nik mnuih djuê ƀiă. Mbĭt anăn, brei mđĭ klei bi hgŭm plah wah sang hră, anôk bruă duh mkra leh anăn bruă sang čư̆ êa čiăng mkŏ mjing êpul mnuih mă bruă, mtô mguôp hŏng phung yua, đru kơ phung hriăm srăng dưi mă bruă ti ƀuôn sang pô mtam.

Đinh Công Sỹ, K’iăng Khua Knơ̆ng bruă Dhar kreh ala ƀuôn Bruă kƀĭn ala brei thâo, bruă anei ƀrư̆ jing mjêč hĭn, tơdah bruă bi mŭt čar, să, lui gưl kdriêk mŭt leh hlăm wưng knhal tuč. Sa čar Dak Lak mrâo prŏng hĭn hŏng dŭm êtuh să hlăm čar, ƀrư̆  mâo hdră kơ mnuih mă bruă bi djŏ guôp:

 “Ti anăp anei alŭ  wăl pŏk mlar snăn, brei drei mâo klei bi mlih kơ klei tă hdră dŭm bruă mtô bi hriăm, hnơ̆ng alŭ wăl leh anăn čar ăt čiăng thâo mprăp hdră msir hlăm wưng kơ anăp. Tal dua jing mđing kơ bruă kčĕ bruă knuă čiăng iêô jak hlăm dŭm anôk bruă duh mkra dôk mâo klei čiăng lu msĕ si bruă lŏ hma, dliê kmrơ̆ng”.

Mđĭ kyar mnuih mă bruă, boh nik phung mă bruă hnơ̆ng jăk, amâo djŏ knŏng jing klei čiăng tal êlâo ôh ƀiădah lŏ jing tur knơ̆ng kơ klei đĭ kyar kjăp mơ̆ng Dak Lak hlăm êdei anăp. Knŏng tơdah phung mă bruă dưi đĭ kyar djŏ hdră kơh alŭ wăl srăng dưi ba yua jih hnơ̆ng klei găl leh anăn gĭr ktưn lu snăk hlăm klei mlih mrâo leh anăn ñŭ kma./.