Bruă Đảng să Rơ Kơi, kdriêk Sa Thầy mâo 13 anôk bruă hŏng 176 čô đảng viên, hlăm anăn mâo 6 anôk bruă đảng viên mnuih djuê ƀiă. Grăp thŭn, mâo klei mtô mơ̆ng bruă Đảng čar Kon Tum leh anăn kdriêk Sa Thầy, bruă Đảng să hmao ngă dŭm mta phŭn čiăng tui hriăm leh anăn hluê ngă gru mngač Awa truh kơ grăp anôk bruă, alŭ ƀuôn. A Êl, khua mduôn Ƀuôn Gia Xiêng brei thâo, amâo djŏ knŏng 14 čô đảng viên ƀuăn tui hriăm leh anăn hluê ngă knhuah mngač mơ̆ng Awa ƀiădah wăt mnuih ƀuôn sang hlăm ƀuôn ăt čŏng pô ngă klei awa mtă hlăm grăp bruă klă klơ̆ng. Hluê si A Êl, bruă tui ngă msĕ hŏng awa đru kơ đảng viên bi hmô, mâo bruă klam leh anăn mnuih ƀuôn sang kreh kriăng mă bruă knuă hluê ngă djŏ hdră kčah mtrŭn, hdră bhiăn lăn čar, knŭk kna.

Đảng viên hlăm anôk bruă bi hmô nanao, nao êlâo hlăm grăp bruă čiăng ƀuôn sang hluê ngă. Dŭm klei bi hmô mđĭ kyar bruă duh mkra gŏ sang mơ̆ng đảng viên hlăm ƀuôn tŭ dưn, đảng viên đru brei ana mjeh kơ mnuih ƀuôn sang. Mnuih ƀuôn sang hlăm ƀuôn kriăng mă bruă knuă, čŏng pô hluê ngă dŭm hdră êlan mơ̆ng Đảng, klei bhiăn lăn čar. Hriăm mơ̆ng awa mơ̆ng dŭm bruă điêt truh kơ bruă prŏng msĕ si bi mguôp yang ƀuôn”.

Čiăng bi lar hluê hriăm, tui ngă gru mngač Awa, 10 thŭn êgao bruă Đảng čar Kon Tum dưi bi klă, mkŏ mjing mta phŭn čiăng găl guôp hŏng boh sĭt leh anăn bruă klam kđi čar mơ̆ng čar kơ grăp thŭn, grăp wưng čiăng ngă jăk leh anăn tŭ dưn hĭn. Mơ̆ng thŭn 2023 truh kơ ară anei, hluê hriăm, tui ngă gru mngač Awa kơ klei jih ai tiê, đru mkŏ mjing čar Kon Tum đĭ kyar pral leh anăn hơ̆ĭt kjăp. Đại tá Lê Minh Chính, Khua bruă kđi čar Knơ̆ng gĭt gai lĭng kahan knông lăn čar Kon Tum brei thâo boh sĭt hlăm alŭ wăl:

“Hmei pluă mbĭt dŭm klei mtrŭt mjhar, dŭm hdră mtrŭn msĕ si hdră mtrŭn mrô 847 mơ̆ng knơ̆ng kahan gưl dlông kơ bruă bi lar knuih kniêng lĭng kahan Awa Hồ, gang mkhư̆ klei thâo mă kơ pô hlăm ênuk mrâo. Dŭm klei mtrŭt mjhar bi lar knhuah gru, duh myơr klei thâo, năng hŏng anăn lĭng kahan awa Hồ hlăm ênuk mrâo. Hlăm bruă hluê ngă mđĭ hĭn bruă ksiêm dlăng, ktuê dlăng dŭm êpul bruă Đảng, đảng viên, kñăm hlăm dŭm klei kdlưn hĭn hluê si hdră mtrŭn bruă Đảng bi êdah leh”.

Hluê ngă klei mtrŭt mjhar hluê hriăm, tui ngă gru mngač Awa. Truh kơ ară anei čar Kon Tum dưi mkŏ mjing 2.760 klei bi hmô, hdră ngă tŭ dưn. Êdah êdi msĕ klei bi hmô: mkŏ mjing klei bi kƀĭn nao mbĭt hŏng hluê hriăm, tui ngă gru mngač Awa, hriăm kơ awa klei thâo khăp, thâo pap, bi đru hdơ̆ng pô mđĭ kyar klei hdĭp mda, lăm lui klei ư̆ êpa, ƀun ƀin, mkŏ mkra krĭng ƀuôn sang mrâo, răng mgang wăl hdĭp mda, mkŏ mjing klei hdĭp dhar kreh…. Bùi Thị Vui, k’iăng khua êpul bruă hâo hưn leh anăn čung ba mnuih ƀuôn sang  bruă Đảng čar Kon Tum brei thâo:

“Bruă hluê ngă asăp mtrŭn mrô 05 mâo klei sa ai leh anăn nao hgŭm jăk mơ̆ng knuă druh, đảng viên, mnuih ƀuôn sang hlăm alŭ wăl. Hluê anăn mâo klei bi mlih sĭt mơ̆ng klei mĭn truh kơ bruă ngă mơ̆ng dŭm gưl bruă đảng, bruă sang čư̆ êa, anôk bruă, alŭ wăl. Klei mă bruă knuă mơ̆ng êpul knuă druh, phung bruă knŭk kna ƀrư̆ hruê ƀrư̆ kreh knhâo, tŭ dưn, jĕ hŏng mnuih ƀuôn sang.

Mơ̆ng bruă hluê hriăm, tui ngă gru mngač Awa, 10 thŭn êgao ti čar Kon Tum mâo lu êpul êya, grăp čô êdah êdi hlăm djăp mta bruă dưi pah mni. Hlăm čar mâo 17 êpul, grăp čô mâo khua knŭk kna mđup brei hră pah mni, 9 êpul, grăp čô mâo Êpul bruă hâo hưn gưl dlông brei hră pah mni… Bruă hluê ngă asăp mtrŭn mrô mơ̆ng Phŭn bruă kđi čar gưl 12 kơ bruă mtrŭt mđĭ hluê hriăm, tui ngă gru mngač Awa ăt jing mta phŭn yuôm bhăn čiăng kơ čar Kon Tum dưn yua klei mĭn, knhuah hdĭp, knuih kniêng Awa hlăm dŭm boh klei kñăm, kdlưn hĭn hlăm dŭm mta bruă, čiăng ngă tŭ jing dŭm mta kñăm, bruă klam đĭ kyar hlăm 10 thŭn êgao./.