Aguah anei 17/6, ti Hà Nội, Anôk bruă sang hră kđi čar ala čar Hồ Chí Minh mkŏ mjing klei kƀĭn trông bi lông ktưn khăp kơ lăn čar gưl tal VI (2025 – 2030). Nao hlăm klei kƀĭn trông, k’iăng Khua lăn čar Võ Thị Ánh Xuân – k’iăng khua gĭt gai tal 1 Êpul gơ̆ng bi lông ktưn pah mni gưl dlông, mbĭt hŏng 193 čô bi ala jing dŭm gru hmô êdah êdi hlăm hdră bi lông ktưn khăp kơ lăn čar wưng thŭn 2020 – 2025 mơ̆ng Sang hră leh anăn dŭm sang hdră kđi čar mơ̆ng čar, ƀuôn prŏng hlăm gưl dlông nao hlăm klei kƀĭn.

Blŭ pŏk klei bi kƀĭn, Nai prĭn  Nguyễn Duy Bắc, k’iăng khua kiă kriê Anôk bruă Sang hră kđi čar ala čar Hồ Chí Minh brei thâo: Klei kƀĭn kñăm mđing truh tŭ drông klei kƀĭn kluôm tal 14 mơ̆ng Đảng, Klei bi lông ktưn khăp kơ lăn čar tal 11, Klei kƀĭn bruă Đảng mơ̆ng anôk bruă gưl tal 15 wưng thŭn 2025 – 2030. Hluê ngă klei mtô mơ̆ng khua gĭt gai Hồ Chí Minh, Bi lông ktưn jing khăp kơ lăn čar, khăp kơ lăn čar srăng bi lông ktưn leh anăn bruă knuă grăp hruê jing tur knơ̆ng mơ̆ng klei bi lông ktưn, ti gŭ klei gĭt gai mơ̆ng Đảng, lu hdră bruă bi lông ktưn khăp kơ lăn čar dưi mtrŭt mjhar. Đảng leh anăn knŭk kna bi myuôm bruă klam mơ̆ng klei bi lông ktưn, pah mni, dlăng anăn jing hdră êlan gĭt gai mnơ̆ng Đảng, mnơ̆ng yua kiă kriê mơ̆ng knŭk kna leh anăn jing  boh kdrŭt mtrŭt mđĭ bi leh djăp bruă klam kđi čar