Hruê knhal jih hruê kăm, Amai Rơ Mah H’Dịu – Khua bruă êdam êra să Ia Kriêng, kdriêk Đức Cơ, čar Gia Lai iêu jak leh phung hđeh êdam êra truh ti sang dhar kreh êpul êya čiăng mâo phung mbruă, khua mduôn mtô bi hriăm kơ bruă hrĭ mñam lehanăn mdah klei tông čing čhar. Mâo dŭm phung êdam êra dôk djiêu gah găn, dôk dlăng phung mbruă hrĭ lehanăn mñam…. Bi sa êpul mkăn dôk dlăng phung mbruă tông čing, mdêč čing. Mniê khua bruă Đoàn să Rơ Mah H’Dịu brei thâo hdră anei dôk hlăm bruă “Ƀuôn bruă hrĭ mñam phung êdam êra knhuah mơ̆ng đưm”.

“Hdră anei, kbiă hriê mơ̆ng klei mĭn kâo ƀuh lu phung mda asei, phung êdam êra ti ƀuôn sang hmei amâo thâo mñam bŭng, hrĭ mñam dŭm mta mnơ̆ng yua hlăm gŏ sang; ară anei knŏng phung khua mduôn đuič thâo mñam. Kyua anăn, kâo nao hgŭm hlăm Hdră anei hŏng klei čang hmăng phung mda asei, êdam êra thâo lehanăn lŏ krŭ wĭt bruă hrĭ mñam djuê ana đưm mơ̆ng aê aduôn drei.

Hdră bruă “Ƀuôn bruă hrĭ mñam phung êdam êra knhuah mơ̆ng đưm” mâo mă klei pah mni mrô Sa klei bi lông klei mĭn mrâo hdră mphŭn čô̆ kơ bruă tal VI thŭn 2022 čar Gia Lai lehanăn mŭt hlăm top 40 Tuôr bi lông knhal tuič mơ̆ng hdră mphŭn čô̆ kơ bruă phung êdam êra krĭng ƀuôn sang thŭn 2023 mâo bruă Đoàn gưl dlông mkŏ mjing. Hdră anei jak iêu leh lu phung êdam êra mnuih djuê ƀiă nao hgŭm lehanăn êbeh 700 čô hđeh hlăm alŭ wăl mđing truh. Mbĭt hŏng hdră anei, amai Rơ Mah H’Dịu – Khua bruă Đoàn să Ia Kriêng lŏ pŏk ngă lu gru hmô ƀuôn êdam êra “2 amâo mâo, 2 mâo” ti krĭng knông lăn.

“Hriăm lehanăn hluê ngă klei mĭn, knhuah mngač Hồ Chí Minh kơ bruă kriê kjăp knhuah gru dhar kreh djuê ana, ti ƀuôn Hrang, Êpul hmei mkŏ mjing leh Êpul brô̆ t’rưng hŏng mta kñăm krŭ wĭt klei khăp kơ ƀuôn sang, krơ̆ng kjăp knhuah gru dhar kreh djuê ana Jarai kơ êpul êdam êra. Mơ̆ng anăn, mtrŭt mđĭ ai phung êdam êra tui ksiêm lehanăn krơ̆ng kjăp kdrăp tông ayŭ djuê ana jing brô̆ t’rưng jăk êdi mơ̆ng mnuih Jarai. Hmei mkŏ mjing hdră bi mjĕ mjuk, hlăp lêñ, kdŏ mmuñ, bi tuôm, mjĕ mjuk phung đoàn viên, êdam êra plah wah dŭm boh ƀuôn. Hmei jak phung khua mduôn, phung mbruă hruê blŭ hrăm, mtă mtăm, mmuiñ kưt, yăl dliê klei khan, klei yăl dliê đưm lehanăn tông ayŭ kdrăp djuê ana kơ êpul mda asei, êdam êra hmư̆”.

Tơdah ti krĭng knông lăn, mniê Khua bruă Đoàn să Rơ Mah H’Dịu khăp mơai hŏng bruă kriê pioh, mđĭ lar dhar kreh djuê ana Jarai, kdrưh jing sa hlăm 100 čô knuă druh bruă Đoàn kluôm ala tŭ mă Klei pah mni Lý Tự Trọng thŭn 2025, snăn ti să Ia Ka, kdriêk Čư̆ Pah, čar Gia Lai, anai mtô Siu Sắt lŏ mđĭ lar klei thâo săng đru kơ mnuih ƀuôn sang mđĭ kyar kphê hơĭt kjăp.

Hdră msir mdrơ̆ng klei kƀah êa kơ ana kphê hlăm yan bhang lehanăn hdră pla mjing doh mâo lu ƀĭng ngă lŏ hma Lăn dap kngư mđing dlăng. Klei anei mâo leh nai mtô Siu Sắt, djuê ana Jarai ti ƀuôn Mrông Yô̆ 1, să Ia Ka, kdriêk Čư̆ Pah, čar Gia Lai hưn mthâo hlăm hla pŏk web yang ƀuôn, mâo lu mnuih mđing dlăng.

“Êlâo adih, kâo hriăm Sư phạm Điạ lý ti Sang hră gưl prŏng Sư phạm Quy Nhơn. Thŭn 2015 kâo mkŏ mjing gŏ sang mrâo, sang mô̆ kâo ti Ia Ly, kâo ƀuh klei găl lăn ala, yan adiê tinei jăk êdi čiăng mđĭ kyar ana kphê. Ƀiădah mnuih djuê ana Jarai tinei pla mjing kphê ka hơĭt kjăp. Kâo bi mĭn pô jing đoàn viên êdam êra snăn brei mâo hdră tui ksiêm, si srăng ngă čiăng đru kơ mnuih ƀuôn sang mâo hdră êlan nao mrâo, đĭ kyar hơĭt kjăp hĭn”.

Leh 10 thŭn, nai Siu Sắt mbĭt hŏng mô̆ ñu jing Rơ Câm Awưnh mkŏ mjing leh krĭng pla kphê doh lehanăn mkŏ mjing Anôk bruă mguôp hnư mkra mjing mnơ̆ng ngă lŏ hma Jrai Ialy. Hdră pla mjing kphê mơ̆ng anôk bruă mâo djăp hnơ̆ng čuăn Organic lehanăn VietGAP, ba mdah 3 mta mnơ̆ng: Kphê kpŭng Robusta, kphê asăr Robusta lehanăn Robusta jăk anăn knăl “Jrai Ialy Coffee”, mâo bi mklă OCOP 3 mtŭ. Anôk bruă bi hgŭm hŏng 50 čô ƀĭng ngă lŏ hma čiăng mđĭ kyar krĭng pla kphê doh hŏng ênhă 40 ha. Mơ̆ng anăn, đru kơ ƀĭng ngă lŏ hma Jarai bi mlih klei mĭn pla kphê, mđing truh kơ hdră pla kphê doh hơĭt kjăp. Hưn mthâo kơ bruă ngă tal anei, nai Siu Sắt amâo wơr bĭt ôh klei mtă mtăn mơ̆ng Awa Hô.

“Hdơr kơ klei Awa Hô mtô mtă, aê aduôn drei mkŏ mjing leh ala čar, kdơ̆ng mblah hŏng phung roh pla ala snăn drei jing phung čô anak brei thâo mkŏ mkra, răng mgang hŏng dŭm bruă ngă klă sĭt, ba dŭm klei thâo săng wĭt ba yua hlăm boh sĭt klei hdĭp aguah tlam. Drei gĭr jak iêu êdam êra, mnuih ƀuôn sang hlăm ƀuôn, bi hgŭm ngă bruă duh mkra, bi hgŭm mguôp, bi đru hdơ̆ng găp msĕ si klei Awa Hô mtă mtăn “Hgŭm mguôp, bi hgŭm mguôp – Tŭ jing, tŭ jing hĭn”.

Dŭm thŭn êgao, bruă tui hriăm lehanăn hluê ngă klei mĭn, knhuah mngač Hồ Chí Minh mâo dŭm gưl bruă Đoàn čar Gia Lai mđing pŏk ngă hluê hŏng dŭm hdră cách mạng. Kluôm čar pŏk ngă leh êbeh 10.500 hdră bruă, kdrêč bruă êdam êra hŏng ênoh êbeh 150 êklai prăk. Ayŏng Đỗ Đức Thanh – Kơiăng khua bruă Đoàn čar Gia Lai brei thâo, mơ̆ng thŭn 2018 truh kơ ară anei, ti mbah hâo hưn điện tử bruă Đoàn čar hưn mthâo leh 400 čô êdam êra êdah êdi hlăm djăp mta ra bruă.

“Tui hriăm lehanăn hluê ngă klei Awa mtă kâo ƀuh anei jing bruă ngă jăk êdi, boh nik dưi hmao ƀuh lehanăn mđĭ lar gru mngač êdah êdi. Mơ̆ng anăn, mjing sa hdră bruă čiăng kơ phung đoàn viên, êdam êra tui hriăm jăk hĭn. Hmei srăng lŏ mlih mrâo hdră mtô mblang, mđing kơ bruă mjing hdră hâo hưn jăk hĭn hlăm êlan mạng yang ƀuôn. Hlăm kluôm anôk bruă Đoan snăn grăp čô đoàn viên jing sa gru hmô čiăng kơ phung đoàn viên mđing truh, hluê ngă. Bruă bi mni kơ gru mngač êdah êdi hluê ngă klei Awa Hô mtă jing bruă ngă čiăng kơ hmei lŏ mjing ai êwa mrâo hlăm hdră bi lông ktưn tui hriăm lehanăn hluê ngă knhuah hdĭp mngač Hồ Chí Minh”.