Ƀri wưng bi hdơr 135 thŭn hruê k’kiêng khua gĭt gai Hồ Chí Minh, tlam mbruê 19/5, ti ƀuôn prŏng Kon Tum, Êpul bruă phung mniê čar Kon Tum mkŏ mjing klei kƀĭn trông pah mni gru hmô êdah êdi wưng thŭn 2020 – 2025 leh anăn klei rang mdah rup hŏng akŏ Awa Hô hŏng phung mniê Việt Nam. 5 thŭn êgao, hdră bi lông ktưn khăp kơ lăn čar hlăm êbeh 100 anôk bruă phung mniê čar Kon Tum dưi mâo klei bi mlih jăk, klăklơ̆ng, bi lar ktang hlăm yang ƀuôn.

Dŭm gưl bruă dưi iêo mkrum rŭ mdơ̆ng mâo 35 boh sang klei khăp, mđup brei dŭm pluh êbâo hnư đru hriăm hră, hnư mnơ̆ng, đru bi sĭt 30 klei mĭn, hdră čô̆ kơ bruă mơ̆ng phung mniê, mkŏ mjing giăm 940 klei bi hmô, hdră ngă amâodah hlăm dŭm mta bruă. Hlăm 5 thŭn êgao, mâo leh êbeh 1.700 čô mniê dưi taih ƀun, êbeh 1.360 gŏ sang djăp hnơ̆ng čuăn 5 amâo mâo 3 doh, 860 êpul êya, grăp čô jing knuă druh, phung mniê čar Kon Tum mâo dŭm gưl bruă, dhar bruă, alŭ wăl pah mni.