Bùi Viết Tiệm, dôk ti kdriêk Čư̆ Sê, čar Gia Lai, kah mmbha bruă dăp anôk bruă knŭ kna gưl čar amâo djŏ jing klei găl čiăng mkra mlih bruă knŭk kna, ƀiădah lŏ jing gưl čiăng mđĭ kyar bruă duh mkra, anôk bruă nah gŭ. “Kâo čang hmăng leh bi mŭt čar Gia Lai mrâo srăng dưi mđĭ kdrăp êlan klông čiăng mkŏ jăk hĭn ti krah krĭng čư̆ čhiăng Gia Lai hŏng krĭng dap mnai Bình Định. Čang hmăng knŭk kna lŏ dơ̆ng mkŏ mjing dŭm hdră bi hrŏ ƀun, boh nik hŏng êpul êya mnuih djuê ƀiă leh anăn mnuih ƀuôn sang krĭng taih kbưi”.

Bruă Kƀĭn Ala klă klơ̆ng bi klă hdră mtrŭn bi mŭt, bi hrŏ ênoh čar, ƀuôn prŏng hlăm kluôm ala mơ̆ng 63 jing 34 anôk bruă knŭk kna gưl čar leh anăn ƀuôn prŏng. Hluê anăn Dak Nông srăng dưi bi mŭt mbĭt hŏng Lâm Đồng leh anăn Bình Thuận, jing čar Lâm Đồng mrâo. Knuă druh leh anăn mnuih ƀuôn sang čar Dak Nông ăt bi êdah klei sa ai hŏng hdră êlan anei. Phan Cự Tâm, k’iăng khua bruă sang čư̆ êa să Dak Bŭk So, kdriêk Tuy Đức bi êdah klei mĭn: “Dak Nông leh anăn Lâm Đồng jing dua čar mâo klei găl mđĭ kyar bruă hiu čhưn ênguê bruă lŏ hma, êjai anăn Bình Thuận jing čar mâo klei găl kơ êa ksĭ. Leh bi mŭt mbĭt jih 3 alŭ wăl srăng đĭ kyar jing čar mrâo mâo klei găl mơ̆ng êa ksĭ truh kơ čư̆ čhiăng. Jih jang srăng bi kna čiăng hrăm mbĭt đĭ kyar.”