Ƀri wưng nao hlăm klei kƀĭn trông grăp tuôr phung nao êlâo tal 16 mơ̆ng Klei kƀĭn bruă duh mkra tar rŏng lăn ti Thiên Tân, China, aguah mbruê 25/6, Khua knŭk kna Phạm Minh Chính bi tuôm hŏng Khua knŭk kna Kyrgyzstan Adylbek Kasimalyev.  Khua knŭk kna Phạm Minh Chính mñă klă dŭm phŭn, dhar bruă Việt Nam dôk ngă tŭ dưn dŭm klei kuôl kă mâo khua gĭt gai dua ala čar bi tŭ ư mtrŭt mđĭ hlăm gưl hriê čuă mơ̆ng Khua knŭk kna Kasimalyev.

Hluê anăn, Khua knŭk kna mñă kơ dua tĭng mtrŭt mđĭ klei bi mguôp bruă duh mkra, mnia mblei, mkŏ êlan êdeh treng plah wah dua ala čar leh anăn hŏng dŭm ala čar krĭng krah Asi.

Dua tĭng bi tŭ ư mđing hĭn klei bi trông, blŭ hrăm bruă kđi čar hlăm grăp gưl, boh nik jing gưl dlông, leh anăn plah wah knŭk kna, dŭm phŭn, dhar bruă, alŭ wăl dua ala čar, bi mguôp kjăp čiăng ngă tŭ dưn dŭm klei kuôl kă mâo leh khua gĭt gai dua ala čar bi tŭ ư mtrŭt mđĭ, lŏ dơ̆ng bi mguôp kjăp mtrŭt mđĭ klei bi mguôp hlăm djăp mta, mđĭ hĭn klei bi thâo săng hdơ̆ng pô plah wah mnuih ƀuôn sang dua lăn čar.