Ti čar Dak Lak mâo 33 anôk bi lông, hŏng êbeh 23.500 čô bi lông. Dhar bruă mtô bi hriăm bi mguôp hŏng dŭm dhar bruă djŏ tuôm ngă dŭm hdră êlan rơ̆ng kơ klei êđăp ênang, mkŏ mjing klei găl kơ phung bi lông hlăm klei bi lông, boh nik jing phung bi lông krĭng tlaih dưi mâo klei hdĭp dleh dlan. Hdră đru kơ klei bi lông ti Dak Lak ăt mkŏ mjing hŏng êbeh 1.000 čô nao hgŭm. Phung đru bruă hur har nao hlăm dŭm mta bruă msĕ si đru kčĕ, mtô kơ phung bi lông duah adŭ bi lông, ngă hră nao bi lông, brei êa mnăm, hnư mnơ̆ng, dlăng mnơ̆ng dhơ̆ng kơ phung hđeh, đru brei dŭm kdrăp yua bi lông...Mbĭt anăn, nao hgŭm răng mgang klei êđăp ênang ti dŭm bĭt anôk bi lông. Êngao kơnăn, hdră iêo jak êbeh 1.500 hnư mnơ̆ng ƀơ̆ng, 50 huôm êa ksâo, dŭm êbâo giêt êa mnăm, mđup brei kơ phung nao ti lông, leh anăn mkŏ mjing kreh prăk čiăng ngă klei đru yan bi lông mâo ênoh 2 êklăk prăk sa hnư đru kơ phung hđeh dleh dlan.

Čar Kon Tum mâo 5.300 čô hđeh bi lông hriăm jih gưl 3. Kluôm čar mâo 14 anôk bi lông hŏng 244 adŭ bi lông leh anăn 28 adŭ dôk guôn. Êngao anăn , bruă sang hră mtô bi hriăm leh anăn bruă sang čư̆ êa dŭm alŭ wăl ăt dăp leh thiăm 9 anôk bi long hlăm boh klei tuôm hŏng yan adiê amâo jăk. Čiăng rơ̆ng kơ klei bi lông hriăm jih gưl 3 mkŏ mjing êđăp ênang, jăk, djŏ klei bhiăn, čar Kon Tum ba nao êbeh 1.200 čô knuă druh, phung mă bruă knŭk kna ngă bruă dlăng klei bi lông. Ti dŭm alŭ wăl hlăm čar iêô mkrum êbeh 600 êklăk pprăk đru kơ êbeh 1.800 čô hđeh mâo klei hdĭp dleh dlan. Mbĭt anăn, dŭm sang hră ăt mprăp leh jăk anôk huă ƀơ̆ng, đih đăm kơ phung hđeh djuê ƀiă kbưi hŏng anôk bi lông.

Thŭn anei, čar Gia Lai mâo êbeh 16.200 čô bi lông. Kluôm čar dăp 42 anôk bi lông hŏng 718 anôk bi lông. Gia Lai tiŏ nao 4.500 čô knuă duh, phung nai, phung mă bruă nao đru kơ klei bi lông. 2.400 čô bi lông dleh dlan hlăm čar dưi mâo klei đru hŏng ênoh prăk êbeh 940 êklăk prăk. Knŏng ti ƀuôn prŏng Pleiku mâo dăp anôk dôk, anôk mdei msăn kơ phung bi lông êngiê.

Kluôm čar Dak Nông mâo êbeh 8.500 čô hđeh čih anăn bi lông hriăm jih gưl 3. Čar dăp leh 23 anôk bi lông hŏng 380 adŭ bi lông, dưi mbha ti dŭm kdriêk, ƀuôn prŏng, kñăm mjing klei găl kơ bruă găn êrô kơ phung hđeh bi lông, boh nik krĭng taih kbưi.

Gưl bi lông thŭn anei, čar Lâm Đồng mâo giăm 17.000 čô bi lông. Čar dăp leh 40 anôk bi lông hŏng 719 adŭ bi lông. Ênoh mnuih mă bruă đru kơ klei bi lông jing êbeh 2.500 čô. Hŏng klei mprăp jăk kơ mnuih mă bruă, mnơ̆ng yua leh anăn klei thơ̆ng kơ bruă, mbĭt hŏng klei bi mguôp kjăp plah wah bruă sang hră mơar hŏng dŭm êpul bruă djŏ tuôm, čar Lâm Đồng gĭr mkŏ mjing klei bi lông êđăp ênang, djŏ hdră bhiăn leh anăn mâo boh tŭ dưn hĭn.