Klei bi kƀĭn brei leh klei blŭ kơ 8 boh phŭn. Năng mđing jing kơ hră čih Hưn mdah boh tŭ ksiêm dlăng akŏ “Bruă hlue ngă hdră êlan, hdră bhiăn kơ klei mđĭ kyar leh anăn ba yua mnuih mă bruă ngă djŏ klei čiăng mđĭ kyar bruă duh mkra - ala ƀuôn, boh nik jing mnuih mă bruă thâo”, mkra mlih Hdră mkŏ mjing hdră bhiăn thŭn 2025; brei klei blŭ kơ bruă ksiêm wĭt Klei bi kƀĭn tal 9 leh anăn brei klei blŭ tal êlâo kơ klei mprăp kơ Klei bi kƀĭn tal 10….

 Dhar bruă kƀĭn ala ăt ksiêm dlăng, bi mklă 3 hdră mtrŭn hlăm klei dưi, mâo: Hdră mtrŭn mkra mlih, mbŏ dŭm mta klei mơ̆ng Klei bhiăn mă bruă mơ̆ng Dhar bruă kƀĭn ala; Hdră mtrŭn kơ klei bi liê mkŏ mjing leh anăn bruă hră ênua ala ƀuôn, hră ênua luč bruă mă wưng 2025-2027; Hdră mtrŭn kơ klei bhiăn, hnơ̆ng kčah leh anăn hdră tă mbha hdră mĭn tĭng bi liê prăk knŭk kna thŭn 2026.

 Khua bruă kƀĭn ala Trần Thanh Mẫn brei thâo, klei bi kƀĭn mkŏ mjing leh Klei bi kƀĭn tal 9 mơ̆ng Bruă kƀĭn ala tŭ jing. Klei bi kƀĭn bi mklă Hdră mtrŭn mkra mlih,  mbŏ dŭm mta klei mơ̆ng Hdră bhiăn mphŭn thŭn 2013, bi mklă 34 hdră bhiăn, 24 Hdră mtrŭn. Ară anei phung bi ala Bruă kƀĭn ala dôk ngă klei bi tuôm hŏng phung bi ala kơ mnuih ƀuôn sang ti 34 čar, ƀuôn prŏng hlăm kluôm ala. Boh nik, leh klei bi kƀĭn tal 9, Bruă kƀĭn ala, Knŭk kna, dŭm Phŭn, dhar bruă leh anăn alŭ wăl pŏk ngă mtam bruă knuă, boh nik  ngă bruă sang čư̆ êa dua gưl.

 Hlue si Khua bruă kƀĭn ala, bruă brei klei blŭ tal êlâo kơ hră čih Hưn mdah boh tŭ ksiêm dlăng akŏ “Bruă hlue ngă hdră êlan, hdră bhiăn kơ klei mđĭ kyar leh anăn ba yua mnuih mă bruă thâo mbruă” jing čiăng êdi, jing hdră yuôm bhăn hlăm boh klei ala čar dôk mŭt hlăm wưng đĭ kyar mrâo, brei phung mă bruă thâo mbruă mjing tur knơ̆ng kơ klei đĭ kyar pral leh anăn kjăp.

Hlăm wưng kơ anăp, Phŭn bruă kđi čar ăt srăng mâo Hdră mtrŭn kƀĭn kơ klei mđĭ kyar, mtô bi hriăm leh anăn hlăm bruă kriê dlăng klei suaih pral yang ƀuôn. Mrâo êgao, Bruă kƀĭn ala bi mklă 3 Hdră mtrŭn yuôm bhăn kơ bruă kreh knhâo, mlih mrâo bruă, mlih mrô; Hdră mtrŭn kơ klei mlih mă bruă mkŏ mjing leh anăn hlue ngă hdră bhiăn ngă djŏ klei čiăng mđĭ kyar lăn čar hlăm ênuk mrâo; Hdră mtrŭn kơ klei mđĭ  kyar bruă duh mkra êngao knŭk kna.

 Êngao anăn, hlăm klei bi kƀĭn tal 9, Bruă kƀĭn ala ăt bi mklă Hdră bhiăn phung nai, Hdră mtrŭn kơ klei đru amâodah lui prăk hriăm hŏng phung hđeh gưl điêt, hđeh gưl 3. Knŭk kna mâo leh Hdră mtrŭn kơ bruă kriê dlăng kơ phung hđeh ti krĭng čư̆ čhiăng…

 Kơ bruă ksiêm dlăng mkra mlih Hdră čih mkra hdră bhiăn thŭn 2025, Khua bruă kƀĭn ala mtă brei păn kjăp boh sĭt. Khua bruă kƀĭn ala Trần Thanh Mẫn mñă klă, thŭn 2025, hdră mkŏ mjing Hdră bhiăn brei ngă djŏ klei čiăng mđĭ ktang ruh mgaih klei dleh dlan, gun kpăk hlăm bruă duh mkra - ala ƀuôn, lĭng kahan, klei êđăp ênang ăt msĕ mơh mkŏ mjing êpul mă bruă knŭk kna 2 gưl:

Leh grăp gưl bi kƀĭn, drei srăng ngă klei ksiêm dlăng kluôm, mơ̆ng anăn, klah čŭn bruă brei lŏ dơ̆ng mđĭ lar, mlih mrâo čiăng ba boh tŭ dưn, mjing klei êdah êdi  hlăm bruă ngă mơ̆ng Bruă kƀĭn ala. Klei bi kƀĭn tal 10 jing klei bi kƀĭn knhal jih wưng, bi leh bruă klam kčah, mbĭt anăn mjing tur knơ̆ng kơ wưng mrâo. Hŏng klei yuôm bhăn snăn, klei mprăp brei ngă bi jăk, pral, mlih mrâo kơ boh phŭn, hdră leh anăn hnơ̆ng jăk čiăng bi mklă bruă klam atăt gai, mkra mjing mơ̆ng Bruă kƀĭn ala leh anăn Knŭk kna.

 Khua bruă kƀĭn ala lač, hlăm wưng kơ anăp jing dŭm mlan knhal tuč mơ̆ng wưng Bruă kƀĭn ala gưl XV hŏng bruă lu snăk, lu bruă kđi čar yuôm bhăn, hŏng klei čiăng lu hĭn leh anăn bruă klam prŏng hĭn. Kyua anăn, dŭm anôk bruă bi leh bruă klam dưi jao hlăm hdră kčah leh hlăm thŭn 2025 leh anăn jih wưng gưl XV. Mbĭt anăn, păn kjăp klei gĭt gai mơ̆ng gưl mâo klei dưi, pral ksiêm dlăng leh anăn pŏk ngă mtam bruă klam mrâo, mbĭt anăn, mjêč mprăp kơ dŭm boh phŭn hưn hŏng Dhar bruă kƀĭn ala rơ̆ng hnơ̆ng, hnơ̆ng jăk, ñĕ kơ klei mâo lu đei bruă giăm klei bi kƀĭn./.