Bi hdơr 80 thŭn Hruê kgŭ krŭ kdơ̆ng mlan 8 tŭ jing lehanăn Hruê mkŏ mjing ala čar 2/9, 80 thŭn Hruê knhuah êpul kahan ksiêm yang ƀuôn Việt Nam lehanăn 20 thŭn Hruê jih jang mnuih ƀuôn sang răng mgang klei êđăp ênang ala čar, aguah hruê 14/8, ti ƀuôn hgŭm Tân Trào, Tuyên Quang mkŏ mjing leh Hruê jih jang mnuih ƀuôn sang răng mgang klei êđăp ênang ala čar thŭn 2025 lehanăn bi leh Knưng rup “Awa Hô ti Tân Trào”.

Blŭ hrăm ti knăm anei, Khua gĭt gai Đảng Tô Lâm lač klă, Hruê mơak jing wưng lŏ bi hdơr kơ hƀuê ênuk, lač jăk lehanăn mñă klă bruă klam yuôm bhăn, đru mguôp prŏng mơ̆ng mnuih ƀuôn sang hlăm hdră răng mgang klei êđăp ênang ala čar, rơ̆ng klei êđăp ênang ala ƀuôn, lŏ dơ̆ng mđĭ lar knhuah yuôm bhăn hlăm ênuk gưl mrâo, sah mdrŏng, ñŭ kma lehanăn đĭ kyar. Čiăng lŏ dơ̆ng mđĭ lar ai ktang hlăm mnuih ƀuôn sang, bruă klam phŭn mơ̆ng Êpul kahan ksiêm yang ƀuôn hlăm hdră răng mgang klei êđăp ênang, Khua gĭt gai Đảng mtă kơ Tuyên Quang, ƀuôn hgŭm Tân Trào lŏ hyuă kjăp bruă hluê ngă dŭm hdră êlan mtrŭn mơ̆ng Đảng, Knŭk kna hlăm bruă răng mgang klei êđăp ênang ala čar, jiă kma klei mĭn mă mnuih ƀuôn sang jing phŭn hlăm hdră răng mgang klei êđăp ênang, cách mạng jing bruă mơ̆ng mnuih ƀuôn sang, kyua mnuih ƀuôn sang, kơ mnuih ƀuôn sang./.