Hlue ngă hdră mtrŭn mrô 57 mơ̆ng phŭn bruă kđi čar, mđĭ kyar klei kreh knhâo, kdrăp mrâo, mlih mrâo hŏng klei knhêč, lehanăn bi mlih mrô gưl ala čar, aguah mbrue (14/8), ti Đà Lạt, Knơ̆ng bruă sang čư̆ êa čar Lâm Đồng mkŏ mjing knăm mtrŭt mjhar jih jang mnuih ƀuôn sang nao hriăm kơ kdrăp mrô.

Ti anôk mtrŭt mjhar anăn, khua knơ̆ng bruă sang čư̆ êa čar Lâm Đồng Hồ Văn Mười iêo mthưr kơ jih jang knuă druh, mnuih mă bruă, lehanăn jih jang mnuih ƀuôn sang bi ksiêm hriăm, mđrăm mbĭt bi mă bruă, jih jang hriăm mbŏ kơ kdrăp mrô, dŭm knơ̆ng dhar bruă, alŭ wăl mđing duh bi liê kơ kdrăp mă bruă, mjuăt bi hriăm, pŏk dŭm boh adŭ mtô bi hriăm bi djŏ guôp truh hŏng jih jang mnuih, amâo mâo čih yan thŭn, lehanăn klei hdĭp. Leh knăm mtrŭt mjhar mâo dŭm êbâo čô knuă druh, mnuih mă bruă hlăm čar Lâm Đồng dưi nao hriăm pioh kơ klei mă bruă hlăm sang čư̆ êa dua gưl, ba yua klei thâo mĭn AI,  Chat GPT, hdră êlan hiu čhưn ênguê thâo mĭn 4.0; dưn yua jih kdrăp mrô kơ klei hâo hưn kơ lăn ala./.