Rơ Chăm H’Phít, Khua dlăng bruă Đảng să Ia Khươl brei thâo, mnuih ƀuôn sang hmăng hmưi čar Gia Lai mrâo đĭ kyar ktang. Ară anei čar mâo êa ksĭ, klei găl mơ̆ng čar čư̆ čhiăng dưi bi lar ktang:

“Leh bi mŭt mbĭt, klei bi mguôp plah wah čư̆ čhiăng hŏng ênhă lăn lŏ hma bi mguôp hŏng êa ksĭ čar Gia Lai srăng mâo klei bi mguôp kjăp kơ logistic hlăm bruă lŏ hma, ba čhĭ boh mnga leh anăn bruă duh mkra êa ksĭ…Kâo hmăng hmưi klei bi mguôp anei srăng pŏk kơ Gia Lai sa klei đĭ kyar ktang hĭn”.

Nguyễn Danh, dôk ti Gia Lai mâo leh 40 thŭn, dlăng kơ bruă bi mbŭt čar Gia Lai leh anăn Bình Định srăng pral ruh mgaih dŭm klei kpăk kơ klei đĭ kyar. Dŭm kdrăp yua đru kơ klei mđĭ kyar pui kmlă doh, bruă tuh tia mkra mjing ti čư̆ čhiăng Gia Lai, srăng nao kpă mơ̆ng kdrŭn ksĭ mơ̆ng čar găn êlan dơ̆ng pral dưi rŭ mjing. Hnơ̆ng mnơ̆ng dhơ̆ng mbĭt hŏng êdeh mâo klei găl. Nguyễn Danh lač:

“Êjai bi mŭt mbĭt čar Gia Lai srăng mkăp brei mnơ̆ng dhơ̆ng, pui kmlă doh leh anăn dưi ba čhĭ êlan kdrŭn ksĭ, găn dua tač êdeh phiơr amâodah ƀăng jang knông lăn hŏng dŭm ala čar Ngŏ Asi mkŏ mjing klei krĭp kơ bruă mkra mjing, ba čhĭ leh anăn mđĭ kyar bruă logistic mơ̆ng čar mrâo hŏng êlan dơ̆ng Dưr – Dhŭng, êlan dơ̆ng mrô 1 leh anăn êla dơ̆ng Ngŏ – Yŭ găn êlan dơ̆ng mrô 9”.

Hluê si klei tĭng mă, čar Gia Lai mrâo mâo ênhă êbeh 21.000 km2, ênoh mnuih ƀuôn sang giăm 3,6 êklăk čô – dôk hlăm êpul čar mâo ênhă leh anăn ênoh mnuih ƀuôn sang lu hĭn hlăm lăn čar. Khua Bruă sang čư̆ êa čar Phạm Tuấn Anh mñă ktang, čiăng hmưm bi lar dŭm klei găl dliê – êa ksĭ čar srăng kñăm kơ 3 klei kdlưn hĭn: mlih mơ̆ng klei mĭn kiă kriê jing ngă bruă, mơ̆ng hră mơar jing mkŏ mjing, leh anăn mă mnuih ƀuôn sang – knư̆ng bruă jing mta kñăm hlăm hdră êlan.

Čar Gia Lai mrâo jing klei bi mguôp mơ̆ng 2 krĭng lăn mâo knhuah gru, mâo knhuah cách mạng hing ang, knhuah dhar kreh lu jơr. Boh nik ai tiê bi mguôp leh anăn klei hmăng mhưi kpưn đĭ ktang mbĭt hŏng klei sa ai ngă ktang phĭt leh anăn tŭ dưn kyua sa êdei anăp đĭ kyar năng hŏng kơhưm”.

Hồ Quốc Dũng – Khua bruă Đảng čar Gia Lai brei thâo, čar srăng gĭr ngă mta kñăm đĭ kyar 8% hlăm thŭn anei, mkŏ mjing tur knơ̆ng čiăng kơ wưng thŭn 2026 – 2031 mâo klei đĭ kyar 2 ênoh mrô:

“Leh bi mŭt čar hnơ̆ng bruă duh mkra mơ̆ng čar Gia La hŏng hlăm brô 250 êbao êklai prăk, mâo krĭng čư̆ čhiăng prŏng, 134 km êlan êa ksĭ, sa krĭng dap mnai siam,dua tač êdeh phiơr, mâo êlan êdeh treng, êlan jơ̆ng. Mâo djăp grăp klei găl, boh klei adôk jing srăng gĭr bi lar dŭm klei găl čiăng mđĭ kyar čar Gia Lai ing anôk đĭ kyar mơ̆ng alŭ wăl”.

Mơ̆ng dŭm klei mâo êlâo msĕ si êlan klông, tač êdeh phiơr, kdrŭn ksĭ, êlan êdeh treng, êlan dơ̆ng…truh kơ klei lu jơr kơ wăl anôk, bruă duh mkra: êa ksĭ, krĭng dăp mnai, čư̆ čhiăng, čar Gia Lai mrâo dưi hmăng hmưi srăng mâo bruă klam ktrâo atăt klei đĭ kyar kwar krah – Lăn Dap Kngư hlăm wưng kơ anăp./.