Ti Anôk bruă đru dlăng ba yang ƀuôn čar Gia Lai, yan bhang thŭn anei mơak lehanăn tŭ yuôm êdi hlăk 37 čô hđeh dưi hriăm klei Angle amâo liê prăk mâo phung ayŏng amai ba anăp jih ai tiê mtô bi hriăm. Grăp hruê knhal jih hruê kăm, sang bi kƀĭn mơ̆ng anôk bruă lŏ kwang ênai blŭ tlao lehanăn asăp răk klei Angle mơ̆ng phung hđeh. Adei Nguyễn Trọng Phú, sa hlăm dŭm phung mda asei mâo anôk bruă rông ba, bi êdah klei mơak mơ̆ng pô dưi hriăm klei Angle mbĭt hŏng di ayŏng, di amai ba anăp hlăm yan mdei prŏng anei.

 “Kâo mâo di amai, di ayŏng mtô klei Angle hluê boh phŭn mdê mdê, kâo ƀuh khăp êdi lehanăn kâo srăng gĭr hriăm klei Angle”.

Yan mdei prŏng thŭn 2025 ti Gia Lai, dŭm anôk bruă djŏ tuôm ăt mđing kơ bruă mđĭ ai wăt hŏng mnơ̆ng dhơ̆ng lehanăn ai tiê klei mĭn kơ phung hđeh ƀun, phung hđeh mnuih djuê ƀiă. Adei Rơ Châm Uyên, hriăm adŭ 7, Sang hră gưl dua să Ia Phĭ, kdriêk Čư̆ Pah brei thâo: Gŏ sang kâo dleh dlan, jing gŏ sang giăm ƀun. Kâo mâo phung khua kiă kriê mđup brei prăk đru hriăm hră, kâo mơak êdi. Thŭn hriăm êgao, kâo mâo klei pah mni hrĭm thâo, kâo ƀuăn srăng lŏ gĭr, kreh kriăng hriăm hră mơar hĭn”.

Čar Gia Lai ară anei mâo giăm 5.000 čô hđeh mâo klei hdĭp dleh dlan lehanăn êbeh 95.000 čô hđeh huĭ srăng lĕ hlăm klei snei. Hŏng klei hgŭm kngan, đru mơ̆ng bruă sang čư̆ êa alŭ wăl lehanăn yang ƀuôn, phung hđeh dưi mjing djăp klei găl čiăng mđĭ kyar kluôm dhuôm. Aduôn Ksor Hiền – Kơiăng khua knơ̆ng bruă mdrao mgŭn, Khua keh răng mgang phung hđeh čar Gia Lai brei thâo: Hlăm Mlan ngă bruă kyua phung hđeh, Knơ̆ng bruă mdrao mgŭn srăng ba yua jih klei găl mâo čiăng pŏk ngă hdră đru kơ phung hđeh mâo klei hdĭp dleh dlan ti alŭ wăl čar msĕ si mđup brei mnơ̆ng, êdeh wai jơ̆ng, mnơ̆ng yua hriăm hră, mđing dlăng kơ phung hđeh mâo klei hdĭp dleh dlan ti dŭm rĭng taih kbưi.

Hluê ngă hdră mtrŭn đru kơ ala ƀuôn, đru kơ phung hđeh mâo klei hdĭp dleh dlan. Bi hgŭm hŏng dŭm knơ̆ng, dhar bruă, êpul êya, alŭ wăl mđĭ hdră msir gang mkhư̆ klei truh êka êkeh, mngăt êa, klei ngă amâo jăk hlăm phung hđeh kñăm rơ̆ng kơ jih jang phung hđeh mâo sa yan mdei prŏng hơ̆k mơak, êđăp ênang lehanăn tŭ dưn”.

Ti Sang dhar kreh hđeh êlăk, êdam êra čar Dak Lak, dŭm hdră hlăm yan mdei prŏng thŭn 2025 dưi mkŏ mjing hŏng klei jăk. Nao hlăm hdră anei, phung hđeh srăng dưi hlăp dŭm klei hlăp lêñ djuê ana, kiêng mĭn mrâo, rang mdah mnơ̆ng kơ hđeh lehanăn mâo mă dŭm mta mnơ̆ng mđup brei. Mbĭt hŏng anăn, hdră “Awa Hô hŏng phung hđeh, phung hđeh hŏng Awa Hô”, mjuăt bi hriăm klei thâo gang mkhư̆ klei mngăt êa kơ phung hđeh…. Ăt mâo sang dhar kreh mkŏ mjing, mâo dŭm êtuh čô nao hgŭm. Amai Nguyễn Thị Thúy Hiền, Kơiăng khua dlăng bruă ti Sang dhar kreh phung hđeh êlăk êdam êra čar Dak Lak brei thâo, gưl anei srăng mâo hlăm brô 30 hdră hriăm mkŏ mjing mơ̆ng aguah ưm truh kơ 9h mmăt. Thŭn anei êngao kơ bruă krơ̆ng kjăp dŭm hdră mtô bi hriăm msĕ êlâo djŏ tuôm kơ dhar kreh, kdŏ mmuñ, mjuăt ktang asei mlei, klei thâo hdĭp snăn hmei lŏ mđing kơ dŭm hdră amâo liê prăk, dŭm tač hlăp mĭn mjing mrâo, tui ksiêm kơ klei thâo. Boh nik, thŭn anei hmei mđing kơ bruă gang mkhư̆ klei mngăt hlăm êa, klei truh êka êkeh ti phung hđeh, hluê ngă hdră tui ksiêm kơ dhar kreh Lăn dap kngư”.

Ti anôk mdah phim rup Dak Lak ăt mphŭn kčưm hdră mdah phim mkăp kơ phung hđeh yan mdei prŏng anei. Mơ̆ng ară anei truh kơ hruê 24/8, aguah knăm năm lehanăn knăm kjuh grăp hruê kăm, phung hđeh dưi nao dlăng amâo liê prăk dŭm kdrêč phim đru mjuăt bi hriăm, djŏ guôp hŏng gưl thŭn. Aduôn Nguyễn Thị Hồng Thanh, Kơiăng khua anôk bruă brei thâo: Hŏng 3 blư̆ mdah hlăm sa hruê, mkăp kơ hlăm brô 400 čô hđeh, srăng mâo giăm 20 kdrêč phim tŭ yuôm hưn mdah kơ hƀuê ênuk, klei khăp gŏ sang, klei êđăp ênang êlan klông, gang mkhư̆ klei bi čăm biêng hlăm gŏ sang, gang mkhư̆ klei mngăt êa. “Mdah phim rup hlăm yan mdei prŏng jing bruă ngă nanaomơ̆ng Anôk bruă mdah phim rup Dak Lak kñăm mjing wăl anôk jăk găl, tŭ dưn kơ phung hđeh leh sa thŭn hriăm. Hluê hŏng hdră mdah phim anei,dưi ruah mta phim djŏ guôp hŏng thŭn, êngao kơ mta kñăm nao dlăng, hlăp čhưn, hmei đăo knang phung hđeh srăng lŏ mâo klei găl dưi hriăm dŭm mta tŭ jăk, hdĭp jăk hĭn lehanăn thâo mpŭ kơ boh tŭ yuôm hlăm klei hdĭp.

Êngao kơ dŭm krĭng ƀuôn prŏng, gưl mdah phim rup yan mdei prŏng lŏ dưi mkŏ mjing ti dŭm krĭng taih kbưi mơ̆ng čar Dak Lak, mbĭt hŏng anăn jing hdră mtô bi hriăm luê amâo liê prăk, sang dlăng hră, tač hlăp kơ phung hđeh… mjing klei găl kơ phung hđeh dưi hlăp mơak hlăm yan mdei prŏng./.