Hluê si Kơiăng khua Phŭn bruă ksiêm dlăng bruă knuă ala čar Nguyễn Thị Hà, gưl să leh mkŏ dăp srăng dưi mkŏ mjing dŭm Anôk bruă ngă hră mơar knŭk kna čiăng tŭ mă lehanăn msir mghaih klei ngă hră mơar kơ mnuih ƀuôn sang lehanăn anôk bruă duh mkra. Dŭm klei ngă hră mơar êlâo adih mâo gưl kdriêk hluê ngă srăng dưi jao kơ gưl să. Hdră msir mghaih klei ngă hră mơar srăng dưi ngă hŏng klei khuăt, bi hrŏ klei lŏ găn sa gưl krah wah.

Bruă knŭk kna gưl să srăng dưi jao lu klei dưi hĭn, mkŏ dăp anôk bruă lehanăn hdră mtrŭn jăk găl kơ mnuih mă bruă srăng dưi bi mlih mrâo, rơ̆ng mkăp djŏ hŏng klei čiăng mơ̆ng bruă klam. Kơ klei ngă hră mơar êlâo adih kreh ngă ti gưl kdriêk snăn ară anei srăng mâo gưl să hluê ngă. Kyua anăn, brei mđĭ hĭn klei ba yua kdrăp hâo hưn ênuk mrâo, hdră bi mlih mrô čiăng bi ênưih klei ngă hră mơar lehanăn bi hrŏ hruê mmông ngă hră mơar kơ mnuih ƀuôn sang lehanăn anôk bruă duh mkra dưi jăk găl hĭn.

Nai prĭn Nguyễn Văn Đáng, Sang hră ksiêm hriăm bruă kđi čar Ala čar Hồ Chí Minh lač snei: Amâo mkŏ mjing bruă knŭk kna gưl kdriêk, hlăm brô 2/3 bruă klam mơ̆ng gưl kdriêk srăng dưi jao kơ gưl nah gŭ. Mbĭt anăn, gưl să, ƀuôn hgŭm ăt dưi jao lu klei dưi hĭn, jing dŭm anôk bruă kriê dlăng knŭk kna klă sĭt jĕ giăm hĭn hŏng mnuih ƀuôn sang.

Brei drei lŏ mkra wĭt čiăng bi mklă bruă klam, klei dưi mơ̆ng bruă knŭk kna gưl să. Boh sĭt dŭm bruă ngă čiăng êdi, bruă ngă aguah tlam mơ̆ng mnuih ƀuôn sang, mơ̆ng anôk bruă duh mkra snăn brei drei ba kơ gưl să hluê ngă, čiăng kơ anôk bruă anei klă sĭt jing bruă knŭk kna jĕ giăm, thâo klă klei čiăng mơ̆ng mnuih ƀuôn sang, mơ̆ng anôk bruă duh mkra; dơ̆ng mơ̆ng anăn srăng mđing truh kơ bruă klam yuôm bhăn jing giăm mnuih ƀuôn sang, mkăp lehanăn ngă bruă kơ mnuih ƀuôn sang jăk hĭn mkă hŏng êlâo adih”.

Hlăk anôk bruă knŭk kna alŭ wăl dôk dưi mkŏ wĭt hluê hdră khuăt, ngă bruă tŭ dưn hĭn, êpul knuă druh gưl să srăng đua klam lu bruă klam mrâo, hŏng hnơ̆ng bruă mă ƀrư̆ hruê ƀrư̆ lu hĭn lehanăn klei čiăng kơ hnơ̆ng thâo kơ bruă srăng lu hĭn mơh. Klei anei dôk čiăng kơ drei mđing kơ bruă mđĭ klei thâo kơ bruă lehanăn hnơ̆ng tŭ jăk êpul knuă druh, mnuih mă bruă gưl să kñăm mkăp djŏ hŏng klei čiăng kơ sa anôk bruă ngă hră mơar knŭk kna mrâo mrang, giăm mnuih ƀuôn sang lehanăn mkăp kơ mnuih ƀuôn sang jăk hĭn. Nai prĭn Nguyễn Đức Hà, knuă druh hđăp Anôk bruă mkŏ mjing gưl dlông, brei thâo snei:

Mtă kơ phung knuă druh gưl să brei giăm mnuih ƀuôn sang hĭn, msir mghaih jih bruă djŏ tuôm kơ mnuih ƀuôn sang. Tal dua jing dŭm hdră êlan mtrŭn mơ̆ng Đảng, hdră bhiăn mơ̆ng Knŭk kna truh ti gưl nah gŭ jih, snăn phung knuă druh gưl să brei mâo lu klei thâo hĭn, snăn jing khădah ih mă sa bruă ƀiădah brei lŏ thâo lu bruă mkăn hĭn, snăn kơh dưi thâo mă bruă.

Gưl să mrâo brei mâo djăp klei thâo hluê ngă dŭm bruă klam mâo kčah jao, ƀiădah ăt rơ̆ng bi mguôp sĭt suôr hŏng mnuih ƀuôn sang ti gưl nah gŭ. Kyua anăn, Hoàng Văn Cường, Pô bi ala anôk bruă kƀĭn ala gưl 15 mtă brei kạh mbha gưl, kah mbha klei dưi kơ gưl să hluê klei bhiăn “Alŭ wăl bi mklă, alŭ wăl ngă, alŭ wăl tŭ đua klam”.

Brei drei mâo sa klei bhiăn kah mbha gưl, kah mbha klei dưi ƀiădah rơ̆ng kjăp klei đua klam nao mbĭt hŏng klei dưi. Klei dưi anăn gơ̆ mguôp kjăp hŏng klei đua klam. Brei drei mâo sa klei bhiăn ksiêm dlăng, tĭng dlăng čiăng rơ̆ng phung knuă druh gưl nah gŭ amâo hluê ngă klei dưi, bruă klam mtŭk mtŭl. Kah mbha gưl, kah mbha klei dưi ƀiădah rơ̆ng hluê ngă kjăp klei kčah mtrŭn mơ̆ng Knŭk kna mbĭt anăn mkăp djŏ hŏng klei čiăng mơ̆ng mnuih ƀuôn sang.

Ti sa mta mkăn, kơiăng nai prŏng, nai prĭn Đinh Xuân Thảo, Khua knơ̆ng hđăp Knơ̆ng ksiêm dlăng bruă čih mkra hdră bhiăn mơ̆ng Anôk bruă kƀĭn ala lač snei, mđĭ bruă kah mbha klei dưi kơ gưl să ƀiădah brei mâo klei bi mguôp kjăp plah wah gưl čar lehanăn gưl să čiăng rơ̆ng jih jang bruă dưi hluê ngă tŭ dưn.

Klă klơ̆ng tinei jing gưl čar trŭn ti gưl să lehanăn brei mâo klei bi mguôp kjăp, rơ̆ng djăp mta ra bruă gưl să dưi msir mghaih hŏng klei tŭ dưn ti gŭ klei kiă kriê, ksiêm dlăng lehanăn ktrâo lač, đru mơ̆ng gưl čar. Anei jing bruă yuôm bhăn čiăng rơ̆ng klei čŏng pô, tŭ đua klam lehanăn bi leh jăk bruă klam kriê dlăng mơ̆ng bruă knŭk kna gưl să mâo hnơ̆ng ngă bruă lu hĭn, prŏng hĭn leh bi mŭt mbĭt.

Blŭ hrăm klah čŭn ti anôk mjưh ruê̆ Klei bi kƀĭn gưl dlông tal 11, gưl XIII, Khua gĭt gai Đảng Tô Lâm mñă, hŏng gru hmô mkŏ mjing anôk bruă ngă hră mơar knŭk kna mrâo, gưl čar srăng mâo bruă klam mdua, anăn jing gưl hluê ngă dŭm hdră êlan mtrŭn mơ̆ng Gưl dlông, jing gưl ba mdah hdră mtrŭn djŏ guôp hŏng boh sĭt đĭ kyar mơ̆ng alŭ wăl, jing gưl gĭt gai, kriê dlăng kluôm dhuôm hdră ngă bruă mơ̆ng gưl să. Hlăk êjai anăn, gưl să dưi bi mklă jing gưl mkŏ mjing lehanăn hluê ngă dŭm hdră mtrŭn mơ̆ng Gưl dlông lehanăn gưl čar ƀiădah srăng dưi mđĭ hĭn bruă kah mbha gưl, kah mbha klei dưi. Bruă knŭk kna gưl să ăt mâo klei dưi ba mdah dŭm mta hră mơar djŏ hdră bhiăn čiăng bi mklă bruă hluê ngă hdră bhiăn ti alŭ wăl lehanăn msir mghaih dŭm bruă djŏ hŏng klei dưi mơ̆ng pô. Khua gĭt gai Đảng Tô Lâm mñă klă, bruă knŭk kna alŭ wăl leh mkŏ dăp brei rơ̆ng klei khuăt, ngă bruă tŭ dưn, giăm mnuih ƀuôn sang lehanăn mâo djăp klei thâo kriê dlăng yang ƀuôn ênuk mrâo ară anei, mđing truh kơ mta kñăm đĭ kyar pral, hơĭt kjăp, mkăp ngă bruă jăk hĭn kơ mnuih ƀuôn sang./.