Tlam hruê 9/6, ti Sang bruă kƀĭn ala, Khua Anôk bruă kƀĭn ala Trần Thanh Mẫn gĭt gai leh Klei bi kƀĭn tal tlâo mơ̆ng Dhar bruă čih mkra, thiăm mbŏ dŭm mta hlăm Hdră bhiăn phŭn thŭn 2013. Khua Anôk bruă kƀĭn ala bi mni kơ Knŭk kna, Dhar bruă mặt trận, Knơ̆ng bruă kriê dlăng Hdră bhiăn, Phŭn bruă kahan ksiêm wưng êgao pral ba mdah hră mơar pŏk ngă, kah mbha bruă klam, ktrâo lač kơ dŭm anôk bruă, mkŏ mjing hluê ngă tŭ dưn bruă mđing hmư̆ klei blŭ mnuih ƀuôn sang rơ̆ng hluê ngă djŏ wưng.

Dŭm anôk bruă klei mrâo mâo lu klei hâo hưn kơ bruă tŭ mă klei blŭ mơ̆ng mnuih ƀuôn sang kơ klei čih mkra Hdră mtrŭn. Mơ̆ng bruă ksiêm dlăng, mâo êbeh 280 êklăk klei blŭ đru mguôp mơ̆ng dŭm anôk bruă, êpul êya, mnuih kơ dŭm mta hlăm klei čih mkra Hdră mtrŭn; hlăm anăn, ênoh sa ai truh 99,75%, klei anei bi êdah klă hdră êlan djŏ klă mơ̆ng Đảng lehanăn Anôk bruă kƀĭn ala, bi êdah klei sa ai hlăm mnuih ƀuôn sang. Khua anôk bruă kƀĭn ala mtă, leh klei bi kƀĭn, dŭm anôk bruă mjêč čih mkra Hdră mtrŭn ba mdah kơ Anôk bruă kƀĭn ala bi mklă hlăm wưng hnưm hĭn, gĭt truh hruê 16/6 čiăng mkăp djŏ klei mjêč mơ̆ng bruă mkŏ dăp, bi khuăt anôk bruă knŭk kna lehanăn hluê ngă gru hmô bruă knŭk kna alŭ wăl 2 gưl./.