Hluê si Phŭn bruă sang hră mơar thŭn hriăm 2024 – 2025, kluôm Lăn Dap Kngư mâo êbeh 4.500 sang hră mơ̆ng hđeh điêt truh kơ gưl prŏng, hŏng giăm 1,5 êklăk čô hđeh sang hră mơ̆ng hđeh điêt truh kơ gưl 3. Dŭm sang hră mâo djăp anôk, bi mâo djăp klei čiăng hriăm hră mơ̆ng hđeh sang hră, sang hră knŭk kna rông ba hđeh sang hră mnuih djuê ƀiă dưi čuăl mkă čŏng pô, bi djăp ênŭm klei čuăn mtô mjuăt mnuih mă bruă jing mnuih djuê ƀiă. Dŭm alŭ wăl mkăp mơ̆ng 20% ngăn prăk duh bi liê kơ sang hră mơar, mbĭt anăn iêo jak ai dưi yang ƀuôn čiăng mđĭ kyar bruă sang hră mơar.

Ƀiădah bruă mtô bi hriăm ti Lăn Dap Kngư ăt mâo lu klei êdu kƀah, hnơ̆ng tŭ jăk ka djăp klei hmăng hmưi, hnơ̆ng sang hră djăp hnơ̆ng čuăn ti dŭm gưl adôk ƀiă, hnơ̆ng mâo djăp klei čiăng ƀiă êdi ti dŭm gưl hriăm ka lu ôh, hnơ̆ng phung nai djăp hnơ̆ng čuăn hlăm dŭm gưl ƀiă hĭn hnơ̆ng kah knar lăn čar. Kƀah nai mtô, kƀah hdră êlan, đru ka ka dưi bi lar boh tŭ dưn, hmăi kơ bruă mđĭ hnơ̆ng tŭ jăk bruă sang hră mơar mơ̆ng krĭng.

Ti anăp boh sĭt anei, Phŭn bruă sang hră mơar mkŏ mjing leh hdră êlan “Mđĭ hnơ̆ng tŭ jăk bruă mtô mjuăt bi hriăm kơ mnuih djuê ƀiă Lăn Dap Kngư” hŏng mta kñăm truh thŭn 2030, bruă mtô mjuăt bi hriăm dưi bi mlih hluê êlan klă hnơ̆ng, mrâo mrang, rơ̆ng kơ grăp čô dưi hriăm mâo hnơ̆ng tŭ jăk, bi djăp klei čiăng đĭ kyar mơ̆ng krĭng hlăm wưng mrâo.

Hlăm klei kƀĭn trông, phung bi ala bi trông kơ boh sĭt ti alŭ wăl pô, mbĭt anăn, bi êdah dŭm hdră êlan đru đru mguôp hlăm hdră êlan mơ̆ng Phŭn bruă sang hră mơar. Anăn jing lŏ mđĭ hĭn klei gĭt gai, ktrâo lač mơ̆ng dŭm gưl bruă hlăm bruă mtrŭt mđĭ bruă sang hră mơar, mlih mrâo hdră êlan mtô bi hriăm, hluê ngă tŭ dưn bruă mtô klei blŭ mnuih djuê ƀiă, ba mdah dŭm hdră êlan iêo jak phung nai mă bruă ti krĭng dleh dlan… Mdưm boh klei kơ boh sĭt klei duh bi liê bi kjăp adŭ hriăm, Lê Bá Cường, k’iăng khua knơ̆ng bruă sang hră mơar čar Dak Nông lač, bruă čuăl mkă adŭ hriăm jing klei găl tal êlâo čiăng bi kjăp sang hră, adŭ hriăm.

 “Bi kơ mnơ̆ng yua srăng mâo hdră êlan hjan kơ Lăn Dap Kngư, amâodah tơdah hlăm hdră ala čar kñăm ăt čiăng bi klă hnơ̆ng % čiăng duh bi liê kơ mnơ̆ng yua bi kjăp sang hră. Hlăm anăn lač klă mta kñăm đru kơ phung nao mâo sang dôk, anôk dôk jing sa hlăm dŭm hdră êlan čiăng mgaih msir klei phung nai ƀuh krĭng taih kbưi hlŏng kdŭn yơh kyua amâo mâo sang dôk, amâo mâo sang jưh, diñu amâo jhŏng dôk ti sang hră”.

Bi Lưu Tiến Quang, K’iăng khua knơ̆ng bruă sang hră mơar čar Dak Lak brei thâo, Dak Lak mâo êbeh 1,9 êklăk čô mnuih ƀuôn sang hŏng 49 djuê ana bi hdĭp mda, mnuih djuê ƀiă mâo êbeh 30%. Čiăng mđĭ hnơ̆ng tŭ jăk bruă sang hră mơar, čiăng mđĭ hĭn dŭm  sang hră knŭk kna rông ba, sang hră huă yang hruê, mâo dŭm hdră êlan đru čiăng iêo jak phung nai mtô, mâo hdră êlan đru kơ phung hđeh sang hră, bi mguôp hŏng dŭm êpul bruă kđi čar, yang ƀuôn, boh nik bi lar bruă klam mơ̆ng khua mduôn, khua ƀuôn, phung mâo kơhưm hlăm yang ƀuôn čiăng mđĭ hnơ̆ng hđeh sang hră nao sang hră…

Phung bi ala ăt bi êdah kơ bruă čiang bi klă djŏ pô, djŏ anôk čiăng dưn yua dŭm hdră êlan, hlăm wưng klei bi mŭt krĭng dôk mkŏ mjing. Vũ Thị Ánh, k’iăng khua kiă kriê bruă sang hră gưl 3 brei thâo, dŭm klei blŭ mguôp hlăm klei kƀĭn jing tur knơ̆ng yuôm bhăn čiăng kơ êpul čih mkra lŏ dơ̆ng bi mbŏ, bi kluôm dŭm mta phŭn mơ̆ng hdră, êlâo kơ ngă dŭm mta bruă mkăn čiăng hưn mdah hŏng knŭk kna ksiêm dlăng, bi klă.

          “Klei blŭ mguôp mơ̆ng phung bi ala mơ̆ng dŭm knơ̆ng bruă sang hră mơar mâo klei hưn yuôm bhăn čiăng kơ êpul čih mkra hmei dưi mđing hmư̆, bi mbŏ hlăm dŭm kdrêč boh sĭt ăt msĕ mơh bi êdah dŭm hdră êlan hlăm wưng kơ anăp čiăng dưi mâo mta kñăm, boh nik jing dŭm boh klei mâo Đảng leh anăn knŭk kna dôk uêñ mĭn hlăm bruă sang hră mơar krĭng Lăn Dap Kngư msĕ si lăm lui klei amâo mâo thâo hră, iêo jak phung hđeh nao sang hră, bon nik jing phung hđeh mnuih djuê ƀiă ti dŭm krĭng taih kbưi, đru mđĭ hnơ̆ng tŭ jăk ai dưi kơ krĭng Lăn Dap Kngư.

Klei kƀĭn trông “Boh sĭt bruă mtô mjuăt bi hriăm Lăn Dap Kngư leh anăn đru mguôp hlăm hdră êlan mđĭ hnơ̆ng tŭ jăk bruă mtô mjuăt bi hriăm kơ mnuih djuê ƀiă Lăn Dap Kngư ” mkŏ mjing ti Dak Lak bi êdah leh klei uêñ mĭn mơ̆ng Phŭn bruă sang hră mơar, mbĭt hŏng dŭm alŭ wăl hlăm bruă ƀrư̆ ƀrư̆ ruh mgaih klei dleh dlan, kpăk gun dôk mâo hlăm bruă sang hră mơar ti krĭng lăn adôk mâo lu klei lông dlăng anei. Dŭm klei blŭ mguôp, klă hŏng boh sĭt mơ̆ng phung bi ala jing mnơ̆ng yuôm bhăn čiăng bi kluôm hdră êlan, mđing truh kơ mta kñăm truh thŭn 2030, bruă sang hră mơar Lăn Dap Kngư dưi mlih mrâo klă sĭt, mrâo mrang, djăp ênŭm klei čiăng mđĭ kyar hơĭt kjăp, mtăp mđơr leh anăn kluôm dhuôm kơ mnuih ƀuôn sang – boh nik jing anak čô mnuih djuê ƀiă.