Kdriêk Dak Mil mâo ênhă pla mjing ana sui thŭn prŏng hĭn hlăm čar Daknông. Anei jing 1 hlăm 3 kdriêk nah dưr čar Daknông, tuôm hŏng klei kƀah êa prŏng hlăm yan bhang không.

 Gŏ sang Nguyễn Công Ngãi ti să Dak Lao, kdriêk Dak Mil mâo êbeh 2 ha kphê pla plŭ mbĭt ana boh durian. Ñu brei thâo, gŏ sang ñu krih mrâo gưl tal 2 ka leh mơh, ƀiădah êa mơ̆ng ênao mrô 40 (ƀuôn Đắk Thọ) jih khuôt leh.

“Thŭn anei êa hrŏ pral êdi, mnuih pla mjing hmei amâo lŏ thâo bĭt êlan mă bruă. Ară anei mâo dŭm pluh boh môtơr pom êa jŭm ênao, bi êa hlăm ênao jing êa pom mơ̆ng knơ̆ng bruă êa jua Daknông. Tơdah diñu pom êa mbŏ kơ ênao snăn knŏng djăp mă mil 1/5 ênoh êa mnuih ƀuôn sang dôk čiăng mơh”.

Tui si knơ̆ng bruă sang čư̆ êa kdriêk Dakmil, adiê mđiă hlơr hlăm yan bhang anei ngă leh kơ giăm 5.000 ha ana mnơ̆ng pla hlăm alŭ wăl anăp lĕ hlăm klei kƀah êa kjham. Mbĭt hŏng anăn, mâo giăm 300 gŏ sang anăp lĕ hlăm klei kƀah êa yua mơh hlăm yan knhal jih bhang anei.

Ti kdriêk Krông Knô, sa alŭ wăl ktuê hnoh êa Dak Sôr hlăk kƀah êa krih. Tơdah adiê ka hjan mơh, snăn hlăm brô 1.000 ha mnơ̆ng pla srăng kƀah êa.

Tui si Võ Văn Minh, K’iăng khua knơ̆ng bruă lŏ hma lehanăn wăl hdĭp mda Daknông, snăn klei kƀah êa hlăk dôk hmăi kjham hĭn êdi truh hŏng dŭm êbâo ha mnơ̆ng pla, lu jing kphê, tiu lehanăn boh kroh amâo mâo djăp ôh êa krih. Mơ̆ng krah mlan 3, dhar bruă djŏ tuôm ngă leh mơh bruă mbha êa boh nik pŏk êa kơ dŭm anôk hlăk kƀah êa êdi. Msĕ si, mă êa mơ̆ng ênao Tây ba kơ dŭm boh ênao riêng gah dôk hlăm kdriêk Dakmil anei pioh mbŏ êa kơ dŭm krĭng hlăk kƀah êa êdi ti dua kdriêk Dak Mil lehanăn Krông Knô.

Knơ̆ng bruă sang čư̆ êa čar Daknông mâo leh hră mơar gĭt gai anôk bruă lŏ hma, lehanăn knơ̆ng bruă sang čư̆ êa dŭm boh kdriêk, ƀuôn prŏng, knơ̆ng bruă kiă kriê knơ̆ng mbông êa  ksiêm dlăng jêñ jêñ klei kơ êa jua, lehanăn klei hlăk kƀah êa hlăm dŭm anôk, čiăng bi mâo hdră êlan đru mbha êa kơ dŭm anôk hlăk kƀah êa êdi. Čar hlăk gĭt gai mơh hlue ngă dua mta bruă hŏng klei tŭ jing, klei yua êa ti dua kdriêk Čư̆ Jŭt lehanăn kdriêk Dakmil hŏng ênoh bi liê jih jang êbeh 500 êklai prăk, kñăm rơ̆ng kơ jih jang dŭm boh knơ̆ng êa, dưi mgơ̆ng êa lehanăn mkăp djăp êa krih kơ mnuih ƀuôn sang pla mjing lehanăn yua aguah tlam./.