Anei jing êpul bruă yap jing gưl kdriêk tal êlâo hlăm čar Daklak mâo tŭ yap bruă čuăn mkŏ mkra krĭng ƀuôn sang mrâo wưng thŭn 2016 – 2020. Ƀuôn prŏng Ƀuôn Ama Thuôt mâo 21 anôk bruă kiă kriê bruă sang čư̆ êa hŏng 8 să, lehanăn 13 ƀuôn hgŭm, hŏng ênoh mnuih êbeh 380.000 čô, mâo 40 djuê ana hdĭp mbĭt mbla. Êjai ngă bruă mko mkra krĭng ƀuôn sang mrâo, mơ̆ng bruă tal êlâo jing hơăi mang.

Siămdah, kyua mâo klei bi mguôp, klei gĭr găn bi dưi jih jang klei dleh dlan, klei lông dlăng mơ̆ng bruă Đảng, bruă sang čư̆ êa lehanăn jih jang phung ƀuôn sang hlăm ƀuôn prŏng Ƀuôn Ama Thuôt, snăn dưi mâo ba wĭt tŭ dưn anei. Thŭn 2018, ƀuôn prŏng mâo leh 8/8 să mâo khua knơ̆ng bruă sang čư̆ êa čar Daklak tŭ yap djăp ênoh čuăn krĭng ƀuôn sang mrâo, êbeh 2 thŭn mkă hŏng hdră mtrŭn. Êbeh 10 thŭn hlue ngă bruă mkŏ mkra kring ƀuôn sang mrâo, ƀuôn prŏng Ƀuôn Ama Thuôt mâo leh lu klei bi mlih jăk êdi, dưi jing leh alŭ wăl ba akŏ hlăm kơ klei rŭ mkra êlan klông hlăm ƀuôn prŏng hlue ênoh čuăn mkŏ mkra krĭng ƀuôn sang mrâo, lehanăn ba akŏ hlăm mnơ̆ng dhơ̆ng mâo hlue ênoh čuăn OCOP, ƀuôn prŏng ktưn truh kơ thŭn 2025, 8/8 să djăp ênoh čuăn krĭng ƀuôn sang hlue hŏng ênoh mrâo./.