Dôk bi mƀĭn dŭm kdô kphê asăr ktrŏ dŭt dưi mkă lehanăn tĭng tla, Y- Blul Niê, kreh iêu Aê Khom ti ƀuôn Čiêt, să Êa Tiêu, kdriêk Čư̆ Kuiñ ktrâo ti tač bêtông anăp sang lehanăn mtih lehanăn lač, mtih anei mrâo mkra tal 2, dui hŏng anei dŭm mlan. Êlâo adih, gŏ sang kâo mkra leh mtih lehanăn ƀăng jang kjăp, ƀiădah leh ƀuôn mâo hdră pŏk prŏng êlan ƀuôn, mkra ƀăng bi lehanăn ping êlan. Mâo klei mtô, mtrŭt mjhar mơ̆ng anôk kriê dlăng ƀuôn, khua mduôn, gŏ sang Y-Blul tŭ ư lŏ mkra wĭt mtih, ƀăng jang, ba myơr 30 m2 lăn anăp sang čiăng mkra êlan, lŏ mbĕ mŭt hlăm lam. Y -Blul Niê brei thâo: “Leh mâo hdră mtrŭn mkra êlan, kâo sa ai mơh, ktuê êlan anei dưi čuăl mkă prŏng, leh čuk hli, diñu lŏ hli lăn anôk mtih kâo hlăm brô 30m2, snăn kâo ăt tŭ ư ruh mgaih, mbĕ hlăm lam lehanăn lŏ mkra wĭt mtih hŏng ƀăng jang sang.

Ăt msĕ hŏng gŏ sang Y-Blul, lu gŏ sang mkăn ti ƀuôn Čiêt myơr leh dŭm êtuh m2 lăn anăp sang čiăng pŏk êlan, đru mguôp hŏng alŭ wăl mkŏ mkra krĭng ƀuôn sang mrâo. Mbĭt anăn, hluê hdră mtrŭn mơ̆ng knŭk kna lehanăn mnuih ƀuôn sang ngă mbĭt, grăp čô myơr leh prăk kăk, hruê ai mă bruă, mkra mđĭ sang dhar kreh ƀuôn, blei mprăp mnơ̆ng ba yua hlăm dŭm bruă ti êpul êya.

Ƀuôn Čiêt ară anei mâo êbeh 300 gŏ êsei hŏng giăm 2.000 čô mnuih, jing mnuih Êđê, lu jing mă bruă lŏ hma, pla kphê pluă hŏng tiu lehanăn dŭm ana boh kroh. Hluê khua mduôn Y-Kuă Êñuôl, mnuih ƀuôn sang hlăm ƀuôn thâo hgŭm mguôp, bi đru mă bruă duh ƀơ̆ng. Kyua anăn, klei hdĭp grăp hruê ƀrư̆ h’ĭt kjăp, hnư hrui wĭt h’ĭt, kah knar mâo hlăm brô 34 êklăk prăk/čô/thŭn. Hlăm ƀuôn knŏng dôk 8 gŏ êsei ƀun lehanăn 25 gŏ êsei giăm ƀun. “Mơ̆ng klei hgŭm mguôp, klei kiă kriê mơ̆ng Đảng lehanăn Knŭk kna, ba mdah dŭm hdră mtrŭn kơ mnuih ƀuôn sang, mkra mđĭ klei hdĭp kơ grăp gŏ sang. Grăp čô mnuih hgŭm mguôp sa ai thâo bi đru. Kyua mâo klei sa ai, hgŭm mguôp anăn, drei mâo leh klei đĭ kyar, mă bruă ƀrư̆ hruê ƀrư̆ jăk hĭn mơh.

Ăt hluê si Khua mduôn Y-Kuă, čiăng dưi mâo klei sa ai, hgŭm mguôp hlăm mnuih ƀuôn sang, snăn mâo bruă klam amâo djŏ điêt ôh mơ̆ng phung khua, knuă druh alŭ, ƀuôn, ba akŏ hlăm djăp bruă, ktrâo lač kơ mnuih ƀuôn sang hluê ngă lehanăn ngă bruă tŭ dưn. Y- Nguôl Êban (aê Hằng), Khua bruă Đảng ƀuôn Čiêt brei thâo, mnuih hlăm êpul kriê dlăng ƀuôn mđĭ lar nanao bruă klam ba akŏ lehanăn ngă jăk hdră mtrŭt mjhar čiăng mkŏ mjing klei hgŭm mguôp hlăm mnuih ƀuôn sang, mđĭ lar klei găl mâo čiăng bi leh jih mta kñăm. “Mtô mblang kơ mnuih ƀuôn sang thâo săng, amâo duah hmư̆ lehanăn ngă soh hŏng hdră bhiăn, klei kčah mtrŭn mơ̆ng knŭk kna. Mơ̆ng anăn, ƀuôn sang dưi h’ĭt ênang, amâo mâo mnuih bi kdơ̆ng hŏng knŭk kna, kăn mâo bruă jŭ jhat hlăm yang ƀuôn, knŏng mđing mă bruă, mđĭ kyar hdră duh mkra, mkŏ mkra ƀuôn sang, anôk bruă nah gŭ kjăp ktang”.

Jing alŭ wăl mâo truh mkrah wah jing mnuih hluê đăo lehanăn 40% jing mnuih djuê ƀiă, să Êa Tiêu, kdriêk Čư̆ Kuiñ mâo leh lu klei gĭt hlăm bruă hgŭm mguôp, jak iêu mnuih ƀuôn sang hgŭm kngan mkŏ mkra krĭng ƀuôn sang mrâo. Hluê Nguyễn Văn Dũng, Khua anôk bruă sang čư̆ êa să Êa Tiêu, hdră mtô mblang, mtrŭt mjhar mnuih ƀuôn sang mâo klei mđing nanao. Mơ̆ng anăn, dưi iêu mtrŭt djăp klei găl mâo hlăm ƀuôn sang čiăng mkra mđĭ êlan klông, anôk bruă nah gŭ, lu ktuê êlan mâo leh pui kmlă mtrâng mngač. Đru mguôp mkŏ mkra să djăp 16/19 hnơ̆ng čuăn hlăm thŭn 2022. “Mnuih ƀuôn sang sa ai, hgŭm kngan hŏng knŭk kna hluê ngă dŭm mta kñăm mkŏ mkra krĭng ƀuôn sang mrâo. Klă klơ̆ng, duh bi liê, mkra mđĭ sang dhar kreh ƀuôn, mkra êlan klông, mđĭ kyar klei hdĭp mnuih ƀuôn sang. Thŭn 2023, lŏ dơ̆ng hluê ngă Hdră mtrŭn bruă Đảng, čih mkra hdră kčah thŭn 2023 čiăng mđĭ kyar bruă duh mkra – ala ƀuôn, rơ̆ng klei êđăp ênang, mtrŭt mđĭ hluê ngă tŭ jing hdră mkŏ mkra krĭng ƀuôn sang mrâo ti alŭ wăl.

Hlăm ai êwa hơ̆k m’ak dŭm hruê akŏ thŭn mrâo, să Êa Tiêu hĭn mơh m’ak kyua bi leh hdră mkŏ mkra krĭng ƀuôn sang mrâo lehanăn gĭr bi leh hnơ̆ng čuăn kdlưn hĭn. Hŏng klei sa ai, hgŭm mguôp mơ̆ng mnuih ƀuôn sang, klei gĭr mơ̆ng jih anôk bruă kđi čar, krĭng ƀuôn sang ti să Êa Tiêu srăng bi mlih jăk siam mbĭt hŏng klei đĭ kyar mơ̆ng ƀuôn sang, lăn čar ƀrư̆ hruê mdrŏng siam./.