Kpuih Trí, 10 thŭn ti ƀuôn Nú êrĭt amĭ ama mơ̆ng điêt. Gơ̆ hdĭp hŏng aduôn mơ̆ng điêt. Klei hdĭp gơ̆ tinăp dôk mmăt tĭt mtam tơdah amâo mâo ôh kahan răng mgang knông lăn Ia Nan, mơ̆ng knơ̆ng bruă kahan knông lăn Gia Lai đru ba:

“Kâo bŏ hŏng klei mơak leh mâo ti amiêt đru ba. Di amiêt rông ba kâo huă ƀơ̆ng, hriăm hră mơar, mtô klei dôk dơ̆ng ƀơ̆ng huă, bi thâo piăt, hdĭp doh amâo mâo dôk hlăm klei čhŏ ôh”.

Kpuih Trí knŏng jing sa hlăm dŭm čô hđeh hriăm hră mơ̆ng sang hră gưl sa  K’Pă KLơ̆ng mâo klei hdĭp dleh dlan, mâo leh kahan răng mgang knông lăn Ia Nan rông ba. Mâo đa đa hđeh mâo kahan răng mgang knông lăn iêo ba dôk hlăm kđông mtam rông ba, dlăng kriê mtô bi hriăm, lehanăn mâo hđeh mâo tŭ mă ênoh đru 500 êbâo prăk/mlan pioh nao sang hră mơar. Thiếu tá Rơ Lan Thức, jing pô ngă bruă kđi čar, k’iăng khua kiă kriê kđông Ia Nan lač.

“Kđông mâo hdră čŏng nao đru mnuih ƀuôn sang. Boh nik, hlue ngă hdră êlan rông hđeh dleh dlan jing anak rông kơ kđông, mkŏ mjing hdră êlan pla mjing djam mtam mđrăm mbĭt hŏng phung hđeh, đru abŭ braih klei khăp kơ phung hđeh, snăn knuă druh lĭng kahan mâo klei thâo săng, mđĭ hĭn bruă klam, amâo mâo uêñ kơ klei dleh dlan, klei knap ăt gĭr bi leh bruă jao”.

Sang hră gưl sa K’Pă KLơ̆ng mâo 371 čô hđeh hriăm hră mơ̆ng adŭ 1 truh adŭ 5, 100% jing hđeh mnuih djuê ana Jarai. Hlăm alŭ wăl, hnơ̆ng ênogh gŏ êsei ƀun jing lu, lehanăn klei thâo săng hlăm mnuih ƀuôn sang adôk awăt. klei hdĭp mda lĕ hlăm klei dleh dlan hmăi amâo mâo jăk hŏng klei nao sang hră mơar mơ̆ng phung hđeh. nai mtô Trần Thị Nhung, khua sang hră lač: Dŭm thŭn êgao, sang hră mghaih msir leh djăp mta klei dleh dlan, kñăm čiăng mđĭ hĭn hnơ̆ng mtô lehanăn hriăm. Kyua lu gŏ sang bi nao pưk hma, amâo mâo klei găl atăt anak aneh pô nao sang hră mơar, lu jing phung hđeh nao sang hră kbưi. Čiăng kơ hđeh hriăm hră găl ênưih nao sang hră mơar, sang hră dăp leh kơ hđeh adŭ 1, adŭ 2hriăm ti dŭm sang hră jĕ hŏng sang. Bi hŏng hđeh hriăm hră adŭ prŏng hĭn nao hriăm ti dŭm sang hră phŭn. Lu gŏ sang kbưi, mâo phung nai mtô, mbĭt hŏng knuă druh kahan răng mgang knông lănia Nan nao truh kơ grăp boh sang drông hđeh nao sang hră. Nai mtô Trần Thị Nhung lŏ brei thâo, êngao kơ mmông mtô ti sang hră mtô bi hriăm klei yuăn, grăp hrue kăm sang hră lŏ mkŏ mjing mmông lŏ bi hriăm, amâo mâo mă prăk ôh, jih jang phung hđeh bi nao hriăm, kñăm mđĭ ai phung hđeh khăp kơ klei hriăm hră mơar, mâo klei mđĭ ai hlăm grăp hrue:

“Đru êdeh êdâo, hdruôm hră mơar, mnơ̆ng mnuă yua čiăng mtrŭt phung hđeh nao sang hră. Akŏ thŭn bi mprâwp êmiêt hdruôm hră hriăm, mnơ̆ng yua. Tui si tĭng mâo jih jang 370 čô hđeh hriăm hră, snăn pô srăng mprăp dŭm anăn mơh ênoh hră mơar kơ hđeh, čiăng kơ hđeh leh truh kơ sang hră knŏng nao mañ mă hriăm yơh”.

Hlăm să Ia Nan, kdriêk Đức Cơ, čar Gia Lai hlăm 7 – 8 thŭn giăm anei, 100% jih jang phung hđeh hlăk thŭn nao sang hră mơar. Klei gĭrr mơ̆ng sang hră, mbĭt hŏng dŭm gưl bruă sang čư̆ êa, djăp êpul êya, lehanăn êpul kahan răng mgang knông lăn mâo dru mguôp leh lu mta ciăng dưi đru kơ phung hđeh hriăm hră ƀun mâo nao sang hră mơar hŏng klei jăk./.