Hŏng lu klei êmuh mơ̆ng phung bi ala nao djŏ ti bruă adôk lu klei awăt hlăm 3 hdră lăn čar kñăm kơ bruă mkŏ mkra krĭng ƀuôn sang mrâo, mđĭ kyar bruă duh mkra ala ƀuôn hlăm krĭng mnuih djuê ƀiă lehanăn krĭng čư̆ čhiăng, msir klei ư̆ êpa bi hrŏ klei ƀun knap hŏng klei kjăp. Pô bi ala Mai Văn Hải, êpul Thanh Hóa êmuh:

        “Leh êbeh 2 thŭn hlue ngă hdră lăn čar kñăm mđĭ kyar bruă duh mkra ala ƀuôn krĭng mnuih djuê ƀiă lehanăn krĭng čư̆ čhiăng 2021-2025 mâo ba wĭt leh dŭm boh tŭ dưn jăk. Mbĭt hŏng anăn mâo dŭm hdră ngă bruă, kơ klei bi liê prăk adôk êmưt, lehanăn mâo lu klei gun kpăk hlăm klei bhiăn kiă kriê. Snăn akâo kơ khua phŭn bruă brei thâo ti anôk jing klei dleh dlan, klei gun kpăk, lehanăn si srăng mghaih msir jih klei anăn. Lač jăk kơ khua phŭn bruă”.

        Khua phŭn bruă, khua dhar bruă djuê ana Hầu A Lềnh brei thâo, hdră lăn čar kñăm kơ klei mđĭ kyar bruă duh mkra ala ƀuôn krĭng mnuih djuê ƀiă jing dleh dlan snăk. Kyuadah bruăk nuă jing prŏng, lehanăn dôk hlăm dŭm krĭng dleh dlan. Jih jang dŭm mta bruă mâo duh bi liê, dŭm hdră êlan mâo ngă mâo bi mguôp hlăm klei mkŏ mjing mâo wăt dŭm hdră êlan dôk ngă leh mơ̆ng gưl êlâo ăt dôk dưi djă yua:

        “Klei dôk bi mĭn prŏng êdi ară anei anăn jing bruă dôk ngă hlăm alŭ wăl mâo dŭm mta bruă prŏng truh hlăm grăp boh ƀuôn, grăp boh sang. Tui si klei bhiăn jih jang hră mơar ktrâo atăt mâo mtrŭn leh djăp ênŭm, khădah amâo mâo tlaih ôh kơ klei amâo mâo djŏ, kyuanăn yơh. Gưl dlông srăng lŏ mđĭ hĭn klei ksiêm, klei mtrŭt mjhar, lehanăn ktrâo atăt klei ruh mgaih bi pral jih jang klei dleh dlan, klei gun kpăk hlăm alŭ wăl. Hŏng dŭm anôk mâo leh hră mơar ktrâo atăt srăng dưi mbha gưl tơl jih hnơ̆ng kñăm ngă bruă bi leh”.

        Lŏ dơ̆ng êmuh hlăm dŭm bruă anei, pô bi ala Ma Thị Thúy, êpul Tuyên Quang lač: “Hrue 23/2/2023, khua knŭk kna mâo leh asăp mtrŭn mrô 71 mơĭt truh kơ dŭm phŭn dhar bruă ruh mgaih klei dleh dlan, klei gun kpăk kơ bruă ngă hlăm 3 hdră lăn čar kñăm, hlăm anăn mâo bruă mđĭ kyar klei duh mkra ala ƀuôn krĭng mnuih djuê ƀiă lehanăn krĭng čư̆ čhiăng. Hŏng bruă klam jing anôk bruă knơ̆ng hlăm hdră anei, akâo kơ Khua phŭn bruă brei thâo êla phŭn bruă srăng bi leh djŏ hŏng asăp mtrŭn mrô 71 čiăng kơ djăp alŭ wăl dưi bi sĭt”.

        Khua phŭn bruă, Khua anôk bruă djuê ana, Hầu A Lềnh brei thâo mâo leh hră mtrŭn truh hŏng dŭm knơ̆ng dhar bruă, alŭ wăl ngă bi kjăp bi klă jih jang hră mtrŭn djŏ tuôm hŏng bruă krĭng mnuih djuê ƀiă srăng ngă, lehanăn lŏ thiăm mbŏ bi djŏ hŏng klei sĭt:

“Truh kơ hrue 30/3 jing 15/15 phŭn dhar bruă mâo bruă čuăn mghaih msir jih jang 121 klei dleh dlan, gun kpăk. Msĕ snăn, êpul tal sa mâo bi leh êlâo kơ hrue   30/3. Êpul tal dua, jing êpul dŭm mta hră mơar ka mâo bi lar ôh, snăn adôk dua mta. Sa jing klei ktrâo atăt ngă bruă tal êlâo, bruă knuă mrô 9 mâo dhar bruă djuê ana kiă kriê, lehanăn ktrâo atăt ngă bruă mrô 2 mơ̆ng phŭn bruă hâo hưn lehanăn mtô mblang, snăn jing bruă ka bi lar ôh. Êpul tal 3, jing êpul bruă hră mtrŭn, klei ktrâo atăt mơ̆ng dŭm phŭn dhar bruă adôk dŭm mta bruă ka djŏ, dôk mđĭl mđăl, snăn čiăng bi mâo hdră êlan bi mlih, hlăm anăn mâo hdră mtrŭn mrô 27. Snăn dưi ƀuh hlăm wưng anei, jih jang boh phŭn tui si asăp mtrŭn mrô 71 mơ̆ng khua knŭk kna, mâo gĭt gai leh ênŭm”.

        Ăt hlăm klei êmuh anei mơh, Khua phŭn bruă, khua anôk bruă djuê ana Hầu A Lềnh wĭt lač kơ jih jang klei dleh dlan, klei gun kpăk hlăm hdră êlan djuê ana djŏ tuôm hŏng bruă mbha kdriêl să, ƀuôn krĭng mnuih djuê ƀiă, krĭng čư̆ čhiăng;

        “Dŭm boh să, ƀuôn mâo 15% jing mnuih djuê ƀiă kơ dlông, snăn să amâodah ƀuôn anăn yap jing să lehanăn ƀuôn mnuih djuê ƀiă. Tal dua să ƀun, ƀuôn ƀun jing dŭm să mâo 15% hnơ̆ng ênoh mnuih djuê ƀiă hdĭp mda tinei dôk hlăm klei ƀun ƀin kơ dlông yap jing să ƀun. Bruă mbha kdriêl anei tui si klei jing êjai bi klă să ƀun, ƀuôn ƀun, snăn adôk dŭm boh să, ƀuôn mâo ênoh gŏ êsei ƀun kgŭ 15% snăn să anăn, ƀuôn anăn amâo lŏ yap jing să ƀun amâodah dleh dlan ôh, snăn klei bi mkă tĭng anei bŏ hŏng klei dleh dlan êdi”./.