Bruă mkra mjing mnơ̆ng hŏng lăn čuh mơ̆ng mnuih djuê ana Mnông ti să Yang Tao, kdriêk Lăk, čar Daklak mơ̆ng sui leh mâo lu mnuih thâo. Siămdah, hlue si thŭn mlan đuĕ nao bruă anei dơ̆ng luič ram. Thâo ƀuh klei anei, êjai grăp boh să bi mâo sa mta mnơ̆ng, snăn alŭ wăl lŏ kơrŭ wĭt, mâo bruă sang čư̆ êa mtrŭt phung ƀuôn sang lŏ hƀuê wĭt bruă anei kñăm mđĭ kyar klei hdĭp mda, lehanăn bi kriê pioh, lŏ bi lar bi lar bruă mkra mjing mnơ̆ng hŏng lăn čuh ƀuôn sang pô. Y - Wu Srŭk, k'iăng khua knơ̆ng bruă sang čư̆ êa să Yang Tao, kdriêk Lăk lač:  “Hmei lŏ dơ̆ng mkra, lehanăn kriê pioh bruă mâo leh mơ̆ng đưm ƀuôn sang pô, lehanăn čang hmăng bruă anei đĭ kyar lehanăn mâo ba čhĭ mnia jăk. Ară anei hmei hlăk dôk ngă hră mơar kơ mnơ̆ng OCOP. Kyua mâo leh lu mnuih hriê tui duah lehanăn akâo blei, truh hŏng anôk hmei čiăng dlăng lehanăn lông tui mkra mbĭt hŏng mnuih mbruă dôk bi mmai gŏ. Hlăm ƀuôn sang pô mâo leh mơh phung hlăk ai tui tiŏ bruă hiu čhưn ênguê ƀuôn sang pô. Tui si hdră mtrŭn mơ̆ng êpul khua kiă kriê bruă Đảng kdriêk srăng mkŏ mjing kơ kdriêk Lăk jing anôk phŭn kơ bruă hiu čhưn ênguê hlăm čar Daklak truh kơ wưng thŭn 2030. Phung mbruă dôk gĭr si srăng ngă čiăng ba mnơ̆ng pô mkra mjing mâo mnơ̆ng mkra mjing hŏng lăn čuh dưi truh hŏng djăp alŭ wăl mkăn thâo kơ mnơ̆ng pô mkra mjing”.

Boh sĭt brei ƀuh, hdră mơ̆ng grăp boh să, sa mta mnơ̆ng mjing leh boh kdrŭt kjăp hŏng lu klei mĭn jăk, mta mnơ̆ng mrâo dưi mkra mjing hlăm djăp alŭ wăl, Hoàng Mạnh Cường, Khua knơ̆ng bruă Kiên Cường, ti ƀuôn hgŭm Tân Tiến, ƀuôn prŏng Ƀuôn Ama Thuôt, hŏng mta mâo jing “Kphê eh mja Kiên Cường” dưi tŭ yap leh djăp ênoh čuăn OCOP 4 mtŭ, lač: Nao hlăm hdră OCOP anei jing klei găl čiăng kơ phung duh mkra mđĭ kyar jăk mnơ̆ng dhơ̆ng pô hĭn, lŏ bi msiam kơ hruh, kơ anăn knăl, kơ hnơ̆ng jăk mnơ̆ng dhơ̆ng mkra mjing, kñăm mđĭ ai dưi bi ktưn hlăm klei bi mnia mblei. “Boh sĭt hŏng grăp pô, grăp êpul êya bruă mâo hĕ leh klei jing. Sĭt yơh hlăm grăp boh klei, grăp mta mnơ̆ng, grăp pô jing mdê mdê sơăi. Kyua msĕ snăn yơh hŏng mnơ̆ng anăn jing klei găl čiăng thâo hlak mblang hŏng anôk bruă kiă kriê, mblang kơ klei mnia mblei, čiăng kơ mnuih blei yua thâo săng mơh kơ klei jing mơ̆ng mnơ̆ng anăn. Kyuadah hlăm sa mta mnơ̆ng ară anei arăng amâo mâo tui duah kơ hnơ̆ng jăk, hnơ̆ng kjăp đuič ôh, ƀiădah lŏ tui duah klei tŭ dưn mơ̆ng mnơ̆ng anăn, hlăm anăn mâo wăt kơ klei tŭ dưn dhar kreh krĭng kwar ƀuôn sang anăn. Kyuanăn mâo lu klei bi yăl dliê anăn amâo mâo knŏng jing klei hưn mdah klă ênŭm kơ mnơ̆ng mkra mjing, ƀiădah ñu lŏ djŏ tuôm hŏng dhar kreh kơ jih krĭng wăl anei”.

Gan leh 4 thŭn hlue ngă hdră kơ grăp sa sa mta mnơ̆ng, truh kơ ară anei, čar Daklak mâo leh truh 72 mta mnơ̆ng djăp ênoh čuăn OCOP gưl čar mơ̆ng 3 – 4 mtŭ. Ênoh mâo ba wĭt mơ̆ng mnơ̆ng OCOP ăt đĭ nanao, mâo mjing brei leh bruă knuă mă kơ sa ênoh lu mnuih ngă bruă hlăm krĭng ƀuôn sang, hŏng prăk ƀơk lu mơh. Mơ̆ng klei mphŭn kčưm anei, knơ̆ng bruă sang čư̆ êa čar Daklak mâo bi mklă leh “Hdră êlan mnơ̆ng OCOP mơ̆ng čar brei bi mâo sa mta mnơ̆ng OCOP. Truh thŭn 2025, srăng mâo 200 mta mnơ̆ng djăp ênoh čuăn OCOP, truh thŭn 2030 kluôm čar srăng mâo 300 mta mnơ̆ng OCOP. Jih jang mnơ̆ng bi mâo hnơ̆ng jăk, mđĭ ênoh mtŭ, lehanăn mâo lu mnuih blei yua hlăm ala čar lehanăn mơ̆ng ala tac êngao srăng khăp, mơ̆ng anăn ba wĭt klei tŭ dưn prŏng lehanăn klă sĭt. Nguyễn Hoài Dương, Khua knơ̆ng bruă lŏ hma čar Daklak brei thâo: “Čiăng dưi mâo mnơ̆ng OCOP djŏ hŏng ênoh čuăn mnuih blei yua čiăng, snăn knŭk kna mâo leh mơh dŭm hdră êlan đru kơ kdrăp mă bruă pioh kơ klei duh mkra pla mjing, wăt hlăm bruă nah gŭ hlăm jih jang anôk duh mkra, đru hlăm klei mjuăt bi hriăm bruă knuă. Anei jing dŭm mta bruă yuôm bhăn tal êlâo, lehanăn đru kơ hdră êlan mnia mblei, tui duah anôk čhĭ mnia, bi liê kơ bruă mkŏ mjing anăn knăl, đru tui duah anôk čhĭ mnia hŏng ala tač êngao. Anei yơh jing bruă mơ̆ng hdră OCOP wưng kơanăp srăng bi mklă lehanăn mđing đru kợih jang hdră ngă bruă bi mâo klei tŭ dưn”.

Hdră kơ grăp boh să sa mta mnơ̆ng, hlăk dôk jing boh kdrŭt dưn yua jih klei găl pioh mtrŭt mjhar bruă knuă, bi mrâo klei duh mkra krĭng ƀuôn sang hlăm čar Daklak. Klei anei ăt hlăk mjing ai bluh đĭ prŏng kơ bruă mkŏ mkra krĭng ƀuôn sang mrâo, hlue hŏng hdră kjăp hĭn, bi kjăp klei jing pô hlăm bruă lŏ hma ti alŭ wăl./.