Leh mâo klei gĭt gai mơ̆ng Êpul bruă mniê kdriêk, êpul bruă mniê să Cốc Lẩu, kdriêk Bắc Hà ruah leh gru hmô êlan mnga bi hrô kơ rơ̆k rung mguôp hŏng bruă klam mkŏ mkra krĭng ƀuôn sang mrâo. Êlan ƀuôn, êlan alŭ dưi luôm hŏng lu mta mnga msĕ si mnga pluh mmông, sam, mnga cúc cánh bướm, chiều tím… Jih jang mjing leh klei jăk siam mơ̆ng krĭng čư̆ čhiăng h’ĭt ênang. Amai Lùng Thị Hà, să Cốc Lẩu, kdriêk Bắc Hà, čar Lào Cai brei thâo:

“Amai adei hlăm alŭ hur har s’aĭ, mđing truh kơ hdră anei. Dlăng kluôm, jih jang bi kah mbha bruă bi pla mnga, dlăng kriê đang mnga. Hdră anei dôk hlăm bruă mkŏ mkra krĭng ƀuôn sang mrâo, hmei ƀuh jăk êdi. Ti dŭm ktuê êlan ƀuh grăp čô dôk kreh kriăng nao mă mnga wĭt pla čiăng kơ ktuê êlan pô jăk siam hĭn.

Anei jing ênoh ƀiă hlăm dŭm êtuh kma êlan krĭng ƀuôn sang mrâo dưi krơ̆ng kjăp lehanăn mđĭ lar gru hmô kdrêč êlan 3 doh, kdrêč êlan krĭng ƀuôn sang mrâo ti alŭ wăl Lào Cai. Thiăm 1 knuh mnga, lui 1 hruh djah srăng bi êđăp dŭm hruê mđi hlơr, čiăng kơ êlan klông jăk siam hĭn. Amâo djŏ knŏng jing hdră bruă, ƀiădah bruă anei jing leh klei thâo săng mbĭt, čŏng pô hluê ngă mơ̆ng phung amai adei mniê tinei. Ƀuôn Tổng Kim jing sa hlăm dŭm ƀuôn dleh dlan êdi mơ̆ng să Vĩnh Yên, kdriêk Bảo Yên hŏng 100% jing mnuih ƀuôn sang Mông hdĭp mda. Êpul bruă mniê kdriêk lehanăn čar nao truh grăp sang mtô mblang, mtrŭt amai adei hlăm să bi msiam êlan klông. Ară anei, hdră pla lehanăn dlăng kriê ktuê êlan mnga jing leh bruă mâo amai adei ngă nanao. Ară anei, amâo lŏ dôk klei hwiê djah mtŭk mtŭl. Amai Sùng Thị May brei thâo:

“Hlăm ƀuôn brei drei thâo bi mdoh, krơ̆ng kjăp wăl hdĭp mda kơ pô, kơ ƀuôn sang, kơ Đảng lehanăn knŭk kna”.

Ară anei, čar Lào Cai mâo êbeh 250 ktuê êlan mnga mơ̆ng phung mniê ti dŭm ktuê êlan krĭng ƀuôn sang mrâo, ƀuôn prŏng pui mnga hŏng ênoh giăm 3 êklai prăk, amâo tĭng ôh hruê mmông ngă bruă mơ̆ng êpul bruă mniê dŭm gưl hlăm kluôm čar hluê ngă. Anei jing boh tŭ mơ̆ng klei mĭn mrâo hlăm bruă hluê ngă hnơ̆ng čuăn 3 doh mguôp hŏng bruă răng mgang wăl hdĭp mda mơ̆ng dŭm êpul bruă mniê. Hdră pla mnga ktuê êlan lar bra leh djăp alŭ, ƀuôn. Bruă mkra ktuê êlan mnga đru bi mlih leh klei thâo săng mơ̆ng mnuih ƀuôn sang kơ hdră bi mdoh wăl hdĭp mda, klei thâo săng hlăm bruă bi msiam êlan klông, ƀuôn sang dưi mkra mđĭ. Aduôn Hà Thị Khánh Nguyệt, Khua êpul bruă mniê čar Lào Cai brei thâo:

“Mbĭt hŏng hdră mtrŭt mjhar mkŏ mkra gŏ sang “5 h’aĭ 3 doh”, Êpul bruă mniê dŭm gưl ăt mđĭ hdră mtô mblang, mtrŭt amai adei hluê ngă hdră anei. Hdră anei mâo leh lu amai adei nao hgŭm, mguôp hŏng bruă mkŏ mkra krĭng ƀuôn sang mrâo, boh nik să dưi mkŏ mkra leh krĭng ƀuôn sang mrâo kdlưn hĭn.

Pla mnga ktuê êlan krĭng ƀuôn sang hlăk jing gru hmô klă sĭt tŭ dưn, đru răng mgang wăl hdĭp mda, ktuê êlan klông, bi mdoh krĭng ƀuôn sang. Hŏng klei mĭn, amâo guôn hiu duah kbưi, klei siam kbiă hriê mơ̆ng klei hdĭp jăk ênang aguah tlam, jĕ giăm hlăm klei hdĭp, dŭm ktuê êlan mnga krĭng ƀuôn sang mrâo boh tŭ yuôm msĕ snăn, jing klei bi êdah kơ hdră mlih mrâo, đĭ kyar mơ̆ng hdră mkŏ mkra krĭng ƀuôn sang mrâo ba wĭt. Mơ̆ng bruă knŏng lông ba pla ti dŭm krĭng, ară anei gru hmô pla mnga ktuê êlan ti krĭng ƀuôn sang lehanăn krĭng čư̆ čhiăng dưi pŏk mlar ti lu alŭ wăl. Ti lu anôk, bruă pla, dlăng kriê mnga lŏ mguôp hŏng bruă bi mdoh êlan krĭng ƀuôn sang. Mơ̆ng anăn, đru mguôp hŏng alŭ wăl hluê ngă jăk hnơ̆ng čuăn kơ bruă wăl hdĭp mda hlăm hdră mkŏ mkra krĭng ƀuôn sang mrâo ti krĭng ƀuôn sang lehanăn krĭng čư̆ čhiăng./.