Jing ƀuôn krĭng ƀuôn sang mrâo mơ̆ng thŭn 2021, ƀuôn Đăk Mông, să Đăk Rong, kdriêk Đăk Đoa lŏ mâo ktuê êlan bêtông dlông lehanăn prŏng mâo Knŭk kna lehanăn mnuih ƀuôn sang ngă mbĭt. Gŏ sang Amai Thoan ăt jing sa hlăm dŭm gŏ sang myơr lăn bi êlan čiăng mkra êlan bêtông ti ƀuôn. Yăl dliê kơ pô, amai Thoan brei thâo, leh lu thŭn gĭr bi mlih mnơ̆ng pla lehanăn mnơ̆ng rông, truh thŭn 2018, gŏ sang amai tlaih kơ ƀun. Thŭn anei gŏ sang amai lŏ mâo hnư hrui wĭt 170 êklăk prăk mơ̆ng 1.500 ƀĕ ana kphê lehanăn rông ŭn.

Sang kâo mâo lăn hlăm krĭng mkra êlan, mbĭt hŏng knŭk kna ngă mbĭt, kâo bi trông hŏng gŏ sang lehanăn mprăp myơr lăn čiăng mkra êlan krĭng ƀuôn sang jăk siam hĭn. Êdei anei, mnuih ƀuôn sang mdiăng kphê, tiu lehanăn lu hdră mkăn mâo êlan siam êrô êbat. Mnuih ƀuôn sang bi hgŭm mguôp kjăp s’aĭ”.

Crăm, Khua bruă Đảng hlŏng ngă Khua ƀuôn brei thâo, hlăm ƀuôn mâo 215 gŏ sang, 729 čô mnuih. Mđing truh kơ bruă krơ̆ng kjăp anăn knăl krĭng ƀuôn sang mrâo, să lehanăn ƀuôn pŏk leh lu hdră msir klă sĭt hlăm bruă ba yua phŭn prăk prăk čan jăk găl mguôp tŭ dưn hŏng dŭm hdră bruă mơ̆ng knŭk kna, mđing mjuăt bi hriăm hdră kdrăp hŏng gŏ sang mnuih djuê ƀiă dleh dlan hlăm bruă bi mlih mnơ̆ng pla, mnơ̆ng rông. Mơ̆ng anăn, klei hdĭp mnuih ƀuôn sang ƀrư̆ h’ĭt kjăp, kpưn đĭ tlaih kơ ƀun, ênoh gŏ êsei ƀun ƀrư̆ hrŏ hlăm grăp thŭn lehanăn truh ară anei knŏng dôk 10 gŏ êsei ƀun, 25 gŏ êsei giăm ƀun. Tĭng hlăm thŭn 2024, ƀuôn sang hrŏ 2 gŏ êsei ƀun. Crăm, brei thâo: 

“Jing khua bruă đảng hlŏng ngă khua ƀuôn, kâo kreh đru, bi mhuôp hŏng mnuih ƀuôn sang mđĭ kyar bruă duh mkra mŏng hdră pla kphê, mđing truh kơ kphê mâo hnơ̆ng tŭ jăk leh bi hgŭm hŏng anôk bruă duh mkra. Mnuih ƀuôn sang mâo leh dŭm gru mngač hgŭm mguôp, bi đru hdơ̆ng găp čiăng mkŏ mkra krĭng ƀuôn sang mrâo, lu klei bhiăn amâo djŏ mŏng đưm dưi lm lui, ƀuôn gĭr ktưn bi leh jih hnơ̆ng čuăn ƀuôn sang ênuk mrâo. Čang hmăng Đảng lehanăn Knŭk kna lŏ dŏng mđing kơ mnuih ƀuôn sang čiăng mâo klei hdĭp đĭ kyar hĭn mkă hŏng êlâo”.

Hlăm hdră mkŏ mkra krĭng ƀuôn sang mrâo, bruă kriê pioh lehanăn mđĭ lả dŭm boh tŭ yuôm dhar kreh đưm mŏng mnuih djuê ân ƀiă mâo alŭ ưăl mđing dlăng êdi. Phách thŭn anei êbeh 90 thŭn, jing Khua mduôn ƀuôn Đăk Mông, să Đăk Rong brei thâo, khădah klei hdĭp ênuk ảă anei mâo leh djăp ênŭm mnơ̆ng, đĭ kyar hĭn ƀiădah phung hđeh brei thâo kriê kjăp knhuah dhar kreh jăk siam mŏng aê aduôn pô đưm êlâo. Dŭm hdră mtrŭn kriê pioh dhar kreh mâo leh alŭ ưăl mđing dlăng lehanăn mtrŭt mjhar mnuih ƀuôn sang hlăm ƀuôn krŏng kjăp lehanăn krŭ ưĭt Knăm m’ak mdiê mrâo. Dŭm knăm m’ak anei srăng mâo prăk kăk čiăng đru krŏng kjăp grăp thŭn. Mduôn Phách, brei thâo:

“Êlâo adih hlăm knhal jih mlan 11 kreh mâo knăm m’ak mdiê mrâo čiăng lač jăk kơ Yang brei adiê jăk êa hlĭm hjan, sa yan ngă bruă djŏ boh mnga, akŏ thŭn mâo knăm ngă yang tuh pin êa, kâo nao hgŭm kyua siă suôr hŏng bruă anei sui thŭn leh, ăt čiăng mtă mtăn kơ phung čô anak tui hriăm čiăng êdei adih dưi mkŏ mjing nanao, čiăng kơ diñu hdơr kơ knhuah dhar kreh mơ̆ng aduôn aê pô đưm êlâo, êdei adih lŏ hluê ngă. Bi bruă hrĭ mñam êlâo adih ti sang roong hlei pô čiăng hriăm arăng mtô, ƀrư̆ ƀrư̆ raih, wăt bruă hrĭ mñam, mdêč čing, lehanăn nao mdah wăt ti anôk djiê brŭ, lui msat, phung hđeh čiăng hriăm gơ̆ dưi s’aĭ.

Hà Văn Tuấn, K’iăng khua Anôk bruă sang čư̆ êa să Đăk Rong, kdriêk Đăk Đoa, čar Gia Lai brei thâo, tĭng truh ară anei, ƀuôn Đăk Mông mâo leh 14/19 hnơ̆ng čuăn mkŏ mkra krĭng ƀuôn sang mrâo. Hlăm hdră mkŏ mkra krĭng ƀuôn sang mrâo, ƀuôn mđing duh bi liê mđĭ kyar ana kphê, mnơ̆ng rông mâo klei găl ti alŭ wăl. Truh ară anei, hnư hrui wĭt kah knar grăp čô mâo leh 35 êklặk prăk/thŭn.

“Ti să mâo ƀuôn Đăk Mông, ƀuôn anei srăng jing ƀuôn krĭng ƀuôn sang mrâo. Lu hdră mtrŭn mơ̆ng Đảng lehanăn Knŭk kna mnuih ƀuôn sang sa ai. Ară anei, bruă mkra sang dhar kreh, mkra êlan snăn Đăk Mông dưi duh êbeh 12 êklai prăk, mnuih ƀuôn sang mprăp myơr lăn čiăng mkra êlan amâo dah dŭm hdră bruă mâo knŭk kna leh anăn mnuih ƀuôn sang ngă mbĭt. Ară anei, dŭm klei dleh dlan msĕ si ênua mdrao mgŭn brei mđing kơ hdră mtô mblang, mtrŭt mjhar. Tal dua hnơ̆ng čuăn kơ gŏ sag ƀun, giăm ƀun brei mâo hdră bi hrŏ lehanăn tiŏ nao phung knuă druh phŭn truh kơ dŭm alŭ, ƀuôn nao đru kơ mnuih ƀuôn sang.

Čiăng mkŏ mkra Đăk Mông jing ƀuôn krĭng ƀuôn sang mrâo ênuk mrâo, hlăm wưng ti anăp, bruă Đảng, sang čư̆ êa alŭ wăl bi mklă mta kñăm mkra mđĭ klei hdĭp mnơ̆ng dhơ̆ng, dhar kreh klei mĭn mơ̆ng mnuih ƀuôn sang. Mbĭt anăn, bi leh hdră mkra anôk bruă nah gŭ krĭng ƀuôn sang, ƀrư̆ mđĭ kyar krĭng ƀuôn sang ênuk mrâo hluê hdră čuăl mkă mguôp hŏng hdră lŏ hma lehanăn mđĭ kyar bruă hiu čhưn ênguê, mnia mblei, knhuah dhar kreh djuê ana dưi kriê pioh kjăp./.