Aguah mbruê, Anôk bruă sang čư̆ êa čar Lâm Đồng mkŏ mjing Knăm hưn mthâo kdriêk Lâm Hà – krĭng duh mkra mrâo Hà Nội ti Lâm Đồng djăp hnơ̆ng čuăn krĭng ƀuôn sang mrâo  lehanăn tŭ drông Medai ngă bruă mrô 3. Găn 35 thŭn mkŏ mkra lehanăn mđĭ kyar, 10 thŭn hluê ngă hdră mkŏ mkra krĭng ƀuôn sang mrâo, kdriêk Lâm Hà – krĭng duh mkra phŭn mơ̆ng mnuih Hà Nội ti krĭng lăn Lâm Đồng mâo leh klei đĭ kyar kluôm hlăm djăp mta ra bruă.

Truh ară anei, hnư hrui wĭt kah knar grăp čô mâo êbeh 52 êklăk prăk, đĭ 2,5 blư̆ mkă hŏng 10 thŭn êlâo; ênoh gŏ êsei ƀun ăt hrŏ lu knŏng dôk 1,68%; 100% ênoh să dưi bi mklă djăp hnơ̆ng čuăn krĭng ƀuôn sang mrâo, jing kdriêk tal 5 mơ̆ng čar Lâm Đồng mâo Khua knŭk kna bi mklă jing kdriêk djăp hnơ̆ng čuăn krĭng ƀuôn sang mrâo wưng thŭn 2016 – 2020 lehanăn mâo Khua lăn čar mđup brei Medai ngă bruă mrô 3. Ară anei, kluôm čar Lâm Đồng mâo 107/11 să djăp hnơ̆ng čuăn krĭng ƀuôn snag mrâo, 2 ƀuôn prŏng bi leh hdră mkŏ mkra krĭng ƀuôn sang mrâo lehanăn 5 kdriêk dưi bi mklă djăp hnơ̆ng čuăn krĭng ƀuôn sang mrâo./.