Hlăm sang mrâo kliă h’uh mđao, Y-Huôt, ti Bon Dak Găn, kdriêk Dakmil, čar Daknông hơ̆k mơak brei thâo, thŭn leh êgao kyua adiê hjan lu, jing jăk găl kơ phung ƀuôn sang ngă lŏ, dlăng kriê kphê, Kyua kreh kruiñ tui hriăm hdră duh ƀơ̆ng gŏ sang ñu dưi mâo leh ênoh hrui wĭt hơĭt, tloh blei mprăp leh mnơ̆ng mnuă yua hơĭt hlăm bruă knuă, dưi duh mĭn kơ 2 čô anak nao sang hră mơar.

“Gŏ sang hmei mâo 3 sao lŏ, mboh truh 30 kdô, snăn djăp huă ƀơ̆ng. Êngao anăn lŏ mâo 2ha kphê, snăn thŭn leh êgao mâo ba wĭt 5 tôn asăr. Gŏ sang hmei gĭr duh ƀơ̆ng čiăng mđĭ kyar klei hdĭp, duh kơ hbâo pruê, dlăng kriê mnơ̆ng pla čiăng bi mâo boh mnga lu hĭn”.

            Ti kdriêl bi knôn ghŏng kdriêk Čư̆ Jŭt, jing anôk lăn čuah kla, lu boh tâo êga, să Dak Găn jing anôk čuah êga sa kba amâo mâo čăt jing hĭn êdi hlăm čar Daknông. Y Krơ̆t, khua bon Dak Sra, să Dak Găn, brei thâo, čiăng dưi đru phung ƀuôn sang hơĭt klei hdĭp mda, êpul phung knuă druh ngă bruă mtô kčĕ kơ bruă lŏ hma dŭm gưl kreh mjuăt bi hriăm phung ƀuôn sang kơ bruă dlăng kriê wiê ênăk, bruă gang mkhư̆ klei hluăt ƀơ̆ng mnơ̆ng ngă kơ mnơ̆ng pla. Boh nik, bi hgŭm hŏng êpul khua kiă kriê bon đru kiă kriê bruă mbha êa mơ̆ng ênao êa Dori, să Dak Găn, kơ hnoh êa Dak Găn pioh kơ phung ƀuôn sang krih mđoh kơ mnơ̆ng pla hlăm yan bhang.

“Klei dleh dlan êdi hŏng phung ƀuôn sang jing kyuadah lăn leh sah kba, snăn bruă pla kphê amâo mâo jing ôh, êa krih kăn djăp rei, pla boh suai leh čhĭ amâo mâo pô blei, pla êtak ktơr ăt dleh dlan mơh. Ƀiădah mkă hŏng êlâo dih, snăn ară anei ăt mdul hĭn leh mơh, amâo tơl truh kơ klei ư̆ dlar, kƀah êwư ôh. Kyua mâo klei knŭk kna đru, phung ƀuôn sang gĭr ktĭrr mă bruă, bi đru hdơ̆ng găp, lehanăn mâo čan ngăn prăk knơ̆ng prăk duh bi liê kơ bruă knuă, mơ̆ng anăn klei hdĭp mda mdul hĭn leh”.

            Tui si Y Hơn, k’iăng khua knơ̆ng bruă sang čư̆ êa să Dak Găn, kluôm să mâo 15 boh bon, hŏng 10 djuê ana ayŏng adei hdĭp mbĭt mbla, hlăm anăn giăm mkrah jing mnuih djuê ƀiă. Mbĭt hŏng êbeh 1800 ha kphê, tiu, ksu), phung ƀuôn sang djăp djuê ana hlăm să lŏ pla mjing ana boh kroh mâo hlăm brô 1400 ha. Boh nik dang boh suai giăm 600ha, Dakgăn mâo leh knơ̆ng bruă sang čư̆ êa čar Daknông čuăl mkă jing krĭng pioh kơ bruă pla mjing hŏng kdrăp mrâo mrang, tui tiŏ bruă pla mjing ana boh suai pioh čhĭ kơ ala tač êngao.

            Bruă bi mlih mnơ̆ng pla bi djŏ guôp hŏng yan adiê, snăn klei duh mkra mnia mblei ti Dakgăn dơ̆ng đĭ kyar. Truh jih thŭn 2022, kluôm să adôk 68 gŏ êsei ƀun    (jing knar 3%) lehanăn 234 gŏ êsei giăm ƀun (jing knar 10,5%). Hrui wĭt kah knar grăp čô mnuih giăm 43 êklăk prăk. Y Hơn lač, gĭr amâo mâo mdei čiăng dưi găn jih klei dleh dlan hlăm krĭng lăn čuah êga kla klêč anei, phung ƀuôn sang djăp djuê ana hdĭp ti Dak Găn hlăk hrăm mbĭt hŏng knŭk kna ktưn bi leh 19 ênoh čuăn kčah mkŏ mkra krĭng ƀuôn sang mrâo:

“Phung ƀuôn sang hlăm bon mâo nanao klei thâo bi mguôp, hlue ngă jăk hdră êlan mơ̆ng Đảng, knŭk kna, mđĭ kyar klei hdĭp mda hơĭt kjăp. Phung ƀuôn sang bi đru hlăm klei duh ƀơ̆ng, thâo ba yua klei kreh knhâo hlăm bruă pla kphê, ksu, boh suai, čiăng kơ mâo boh tŭ sĭt. Phung ƀuôn sang sa ai hŏng hdră êlan mơ̆ng knŭk kna ktưn truh thŭn 2023 să Dak Găn mkŏ mjing tŭ jing bruă mkŏ mkra krĭng ƀuôn sang mrâo hlăm kdriêk Dakmil”.

            Ară anei čar Daknông mâo čuăk mkă bruă rŭ mkra ênao kdơ̆ng êa Dak Gang hlăm dua kdriêk Dakmil lehanăn Čư̆ Jŭt, anôk mnuih ƀuôn sang ti Dakgăn srăng dưi dưn. Anei jing knơ̆ng êa prŏng tal 2, mâo phŭn bruă lŏ hma bi mklă brei rŭ mkra hŏng ênoh bi liê jih jang giăm 1.000 êklai prăk, djăp êa krih mđoh kơ hlăm brô 2000 ha mnơ̆ng pla mjing. Čhuang hlăm thŭn mrâo 2023, phung ƀuôn sang ti Dak Găn lŏ mâo ai mrâo pioh mđĭ kyar klei hdĭp mda, čiăng kơ knư̆ hrue knư̆ trei mđao mdrŏng sah hĭn./.