Knơ̆ng bruă jih ai tiê hgŭm hŏng bruă sang čư̆ êa alŭ wăl, mtrŭt mnuih ƀuôn sang bi myơr lăn, mguôp  hrue ai ngă bruă, mnơ̆ng mnuă đru bi mkra mđĭ êlan klei pui kmlă, hlue hŏng hdră êlan “knŭk kna lehanăn mnuih ƀuôn sang mă bruă mbĭt”, mtô mblang mtă mtăn kơ mnuih ƀuôn sang mâo klei thâo săng kơ bruă kdrăp pui kmlă, êlan klei pui kmlă, ba yua pui hŏng klei thâo mkriêm, lehanăn tŭ dưn.

Knŏng hlăm wang 3 thŭn kơ anei, hjăn PC Daklak mâo ngă leh truh 263 mta bruă pui kmlă hŏng ênoh bi liê jih jang êbeh 668 êklai prăk. Lehanăn, knơ̆ng bruă pui kmlă kwar krah ăt duh bi liê mkra truh 12 bruă pui kmlă ti čar Daklak, hŏng ênoh jih jang truh 1.322 êklai prăk.

Truh kơ ară anei jih jang dŭm boh să, ƀuôn hgŭm, wăl krah hlăm čar mâo leh ênŭm pui kmlă, mâo 99,54% ênoh gŏ êsei mâo yua pui kmlă lăn čar. Lehanăn 148/152 boh să djăp ênoh čuăn kơ pui kmlă hlăm bruă mkŏ mkra krĭng ƀuôn sang mrâo./.