Yan mnga anei wĭt ti să Êa Hô, kdriêk Krông H’Nang, čar Dak Lak, mơ̆ng wăl krah să truh kơ dŭm alŭ, ƀuôn ară anei mâo leh lu boh sang prŏng siam dưi rŭ mdơ̆ng. Dŭm ktuê êlan kdlŭt kdlăt ară anei dưi mkra hŏng betông siam. Pui mngač dưi dhiang ba truh hŏng grăp gŏ sang. Sang hră m’ar, sang êa drao gŭn dưi duh bi liê rŭ mdơ̆ng mrâo. Hlăm hruê akŏ yan mnga, khua mduôn Y Nút Niê, să Êa Hô, kdriêk Krông H’Nang hơ̆k kdơ̆k brei thâo, hdră mkŏ mkra krĭng ƀuôn sang mrâo mjing leh boh kdrŭt čiăng kơ mnuih ƀuôn sang kpưn đĭ tlaih kơ ƀun, siă suôr hŏng krĭng lăn ƀuôn sang pô.

 “ Êlâo adih ngă pưk hma dleh dlan snăk, ngă 2 – 3 ha amâo djăp ƀơ̆ng ôh. Knŭk kna mđing dlăng kơ mnuih ƀuôn sang tinei êdi, kơ hdră mă bruă duh mkra mbruă, hdră mnêč knŭk kna đru kčĕ mnuih ƀuôn sang tui ngă, bi mlih hlăm hdră pla mjing ba wĭt boh tŭ dưn lu msĕ si boh durian, tiu, anak aneh dưi nao sang hră”.

Hrăm mbĭt hŏng êpul lu, ƀuh klă ai êwa hơ̆k m’ak hruê yan mnga, nao hgŭm hlăm hdră tông čing čhar, ƀơ̆ng dŭm mta mnơ̆ng jăk mơ̆ng mnuih ƀuôn sang djuê ana ƀiă ti Sang dhar kreh êpul êya să Êa Hleo, kdriêk Êa Hleo, čar Dak Lak, Lê Quang Bảng, sa čô mnuih ƀuôn sang ktưn hưn: Hdră Sang dhar kreh êpul êya anei dưi rŭ mdơ̆ng mơ̆ng 3 thŭn êlâo. Sang dhar kreh jing leh boh sang mbĭt mơ̆ng mnuih ƀuôn sang, dŭm hdră dhar kreh, kdŏ mmuñ, mjuăt ktang asei mlei mâo klei găl mđĭ kyar hĭn, lu êpul hgŭm dưi mkŏ mjing kñăm krơ̆ng kjăp boh tŭ yuôm dhar kreh ai tiê klei mĭn hlăm êpul êya.

 “ Hmei mâo sang dhar kreh anei, jing sang êpul êya jing boh sang mbĭt mơ̆ng mnuih ƀuôn sang, mâo mnuih ƀuôn sang mđing truh lehanăn jih jang klei hlăp mbŭl si tô hmô hlăm Hruê m’ak mlan pŭr amâo dah hruê Têt, mnuih hgŭm hlăm êpul kahan hđăp, êpul phung mniê bi kƀĭn lu mnuih ƀuôn sang hŏng ai êwa hlăp čhưn hơ̆k m’ak. Lač jăk kơ Đảng, Knŭk kna mâo leh klei mđing dlăng, tă hdră êlan čiăng kơ mnuih ƀuôn sang hluê ngă djŏ si hdră mơ̆ng bruă mkŏ mkra krĭng ƀuôn sang mrâo.

Truh ti să Yang Tao, kdriêk Lăk, phung tuê hiu čhưn ênguê dưi hrăm mbĭt hŏng di aduôn, di amĭ mkra gŏ bưng, bŭ amâo dạh dŭm mta mnơ̆ng đ’điêt mơ̆ng lăn čuh. Y Wu Sruk, K’iăng khua anôk bruă sang čư̆ êa să Yang Tao brei thâo: Bruă mkra mnơ̆ng hŏng lăn čuh mơ̆ng mnuih djuê ana Mnông ti Yang Tao jăk êdi kyua djăp hdră mkra hŏng kiê kngan s’aĭ. Hdră grăp să sa mta mnơ̆ng dhơ̆ng pŏk leh sa hdră êlan nao mrâo đru kơ alŭ wăl mđĭ lar klei găl mâo lehanăn boh tŭ yuôm, mđĭ hnư hrui wĭt kơ mnuih ƀuôn sang mơ̆ng bruă anei:

 “Hmei dôk krơ̆ng kjăp ƀuôn bruă djuê ana mơ̆ng đưm anei lehanăn čiăng lŏ mđĭ kyar hĭn lehanăn dưi ba čhĭ hlăm lu wăl anôk mnia mblei. Ară anei, hmei bi mklă jing mta mnơ̆ng OCOP. Ară anei mâo lu phung tuê hiu čhưn ênguê truh ti kdriêk Lăk weh čhưn ti ƀuôn bruă čiăng tui ksiêm, dlăng phung mbruă mkra mnơ̆ng. Hlăm alŭ wăl ăt mâo lu phung êdam êra tă hdră êlan mđĭ kyar bruă hiu čhưn ênguê êpul êya. Hluê si Hdră mtrŭn mơ̆ng Anôk kriê dlăng bruă Đảng kdriêk srăng mkŏ mkra kdriêk Lăk jing wăl krah anôk hiu čhưn ênguê phŭn ti Dak Lak wưng thŭn 2030. Dŭm phung mbruă srăng gĭr ba mnơ̆ng mơ̆ng ƀuôn bruămkra mnơ̆ng hŏng lăn čuh pô truh kơ jih jang alŭ wăl mkăn, čiăng dưi thâo s’aĭ mnơ̆ng mkra hŏng lăn čuh mơ̆ng alŭ wăl pô tinei”.

Hluê si Nguyễn Hoài Dương, Khua knơ̆ng bruă Lŏ hma mđĭ kyar krĭng ƀuôn sang čar Dak Lak, truh kơ ară anei, kluôm čar mâo 78/151 să djăp hnơ̆ng čuăn krĭng ƀuôn sang mrâo. Hlăm anăn mâo 5 să djăp hnơ̆ng čuăn krĭng ƀuôn sang mrâo. Hlăm wưng ti anăp, mbĭt hŏng dŭm klei mđing duh kơ dŭm anôk bruă nah gŭ, Dak Lak dôk mđing hĭn kơ bruă kriê pioh lehanăn mđĭ lar dŭm boh tŭ yuôm dhar kreh djuê ana mơ̆ng đưm hluê hdră h’ĭt kjăp. Hlăm anăn, mđing mđĭ kyar hdră bruă grăp să sa mta mnơ̆ng dhơ̆ng, mjing knhuah jăk siam mơ̆ng grăp krĭng, grăp djuê ana mbĭt anăn bi mlih klei thâo săng kơ hdră duh ƀơ̆ng čiăng bi hrŏ ƀun h’ĭt kjăp. Nguyễn Hoài Dương mñă klă:

 “ Hŏng 1 čar mâo lu klei jăk găl kơ mnơ̆ng ngă lŏ hma lehanăn dhar kreh jăk siam ti Lăn dap kngư, čar Dak Lak mâo leh dŭm hdră kčah klă klơ̆ng lehanăn pŏk ngă hlăm djăp anôk hŏng klei đru mơ̆ng Knơ̆ng bruă Lŏ hma lehanăn mđĭ kyar krĭng ƀuôn sang lehanăn dŭm anôk bruă djŏ tuôm mơ̆ng čar snăn anei jing hdră msir djŏ klă kñămn mjing klei čŏng pô hlăm hdră mtô mblang, hưn mthâo, bi lar hĭn čiăng kơ lu mta mnơ̆ng OCOP dưi blei yua h’ĭt kjăp mơ̆ng anăn đru mđĭ hnư hrui wĭt kơ mnuih ƀuôn sang lehanăn mtrŭt mđĭ hdră mkŏ mkra krĭng ƀuôn sang mrâo.

Sa yan mnga mrâo lŏ truh, ai êwa yan mnga mrâo khŏk leh ƀăng bhă grăp sang, mâo leh ti djăp ktuê êlan alŭ ƀuôn. Hlăm ai êwa h’uh mđao mơ̆ng yan mnga, dŭm krĭng ƀuôn sang ti Dak Lak msĕ si guh ai êwa hdĭp mrâo hŏng dŭm knăt mda, djăp mta mnga bi lông čuh blang hŏng lu mta êa mil. Ară anei, hdră mkŏ mkra krĭng ƀuôn sang mrâo amâo djŏ knŏng jing klei đua klam mơ̆ng dŭm gưl bruă sang čư̆ êa, êpul êya ƀiădah lŏ jing bruă ngă kluôm mơ̆ng jih jang mnuih ƀuôn sang. Jih jang hgŭm kngan đru mjing dŭm krĭng lăn ƀuôn sang năng hdĭp.