VOV4.Jarai - Mơguah lơ 2/6, ƀơi Hà Nội, Khul čom puang blung a Pri čih tơlơi pơhing lŏn ia ta tal 15 thun 2020 pok phun rơwang blung a hơdôm tơlơi čih pơhing. Gum hrom Pri thun anai hmâo 114 bôh anom gưl khul hăng 190 čô mơnuih gum hrom, čih 11 djuai tơlơi čih tui tơlơi pơkă. Hăng 1 rơbâo 823 bơdjơ̆ nao djop tơlơi kiăng pơplông. Anai lĕ thun hmâo mrô tơlơi čih pơplông lu hloh mơng hlâo truh kơ ră anai. Amăng 2 hrơi lơ 2 hăng lơ 3/6, Khul čom puang amra ruah mơng 151 mơta tơlơi čih thâo hloh pioh ƀơk pri. Tui hăng ơi Thuận Hữu, Khua Khul mơnuih čih tơlơi pơhing phrâo Việt Nam, bôh yôm hơdôm tơlơi čih pơplông thun anai tui akô̆ ñu prong mơng tơlơi bơwih ƀong, bruă kơđi čar, bôh thâo, mơnuih mơnam. Biă ñu, lăi nao hơdôm tơlơi Jơnum Ping gah hơdôm gưl, Jơnum tal 13 mơng Ping gah, bruă pơgang, pơgăn klin Covid-19; Bruă kơdŏng pơgăn hưp ƀong kông ngăn, ngă khưi khai, tơlơi ƀu klă dưi lăi nao dơlăm hloh, hmao tlôn hloh. Lu tơlơi čih hmâo tơhnal thâo, lăi pơblang dơlăm, hmâo bôh tơhnal mơnuih mơnam klă, hmâo pran bơdjơ̆ nao, dưi hmâo ƀirô apăn bruă tŭ mă, pel ĕp, pơsir./.

Siu H’ Prăk: Pô pơblang