VOV4.Jarai - Mơguah tom brơi (19/3), ƀơi anih anom mă bruă Kơnuk kơna, Grŭp črâo ba pơgang pơgăn klin ruă Covid-19 hmâo đing nao bơkơtuai kơ hơdôm jơlan gah kiăng dưi ngă tui “hră vaccine” pơgi kơdih anai, djru ngă gal brơi čơkă mơnuih Việt Nam glăi mơng dêh čar tač rơngiao, amăng anun ba tơbiă bruă hluh gah tơlơi pơhing kơ tơlơi tlâ̆o vaccine pơgang Covid-19 mơng mơnuih ƀôn sang hăng mrô djă pioh anih anom mơnuih ƀôn sang dô̆. Hăng mơnuih ƀôn sang amăng dêh čar, Ding jum ia jrao brơi thâo, amra pơsit mrô QR code kơ rim mơnuih hmâo tlâ̆o vaccine pơgang Covid-19 hăng dưm amăng hră pơ-ar wai lăng tơlơi suaih pral rim mơnuih kiăng hmâo djop mrô kiăng thâo tơdah kiăng pơsit hmâo tlâ̆o pơgang lom đuăi hyu pơ̆ dêh čar pơkon. Gah tơlơi anai, Kơ-iăng Khua dêh čar ta ơi Vũ Đức Đam lăi rơđah: Bruă mă mơng Việt Nam lĕ wai lăng hluai tui glông jơlan wai lăng hră pơ-ar tơlơi suaih pral mơnuih ƀôn sang, pơƀut hơdôm tơlơi pơhing kơ tlâ̆o pơgang hlôm hlâo hăng amra hluh gah hăng mrô djă pioh tơlơi pơhing kơ rim mơnuih, ngă gal brơi kơ mơnuih ƀôn sang amăng bruă tlâ̆o pơgang, wai lăng bruă nao rai amăng tơlơi hmâo klin ngă tơdơi anai rơđah hăng gêh gal hloh./.

Siu H’ Prăk: Pô pơblang