VOV4.Jarai - Blan 9 pơ̆ anăp amra pok phun tlâ̆o vaccine Nano Covac yua kơ Anom pơtô bruă ia jrao ling tơhan pơkra. Tơlơi pơhing anai dưi ba tơbiă amăng mông jơnum lăng nao rai amăng tivi abih bang ling tơhan pok pơhai bruă mă, jơlan gah pơsir tañ pơgang, pơgăn klin Covid-19 amăng khul ling tơhan truh 187 bôh anih anom tô nao rai tivi yua kơ Ding jum khul ling tơhan dêh čar ta pơphun amăng mơguah lơ 1/6. Amăng mông jơnum, Khua ling tơhan, Nai tha prin, nai prin tha Đỗ Quyết, Khua Anom pơtô bruă ia jrao ling tơhan brơi thâo, lom kơsem min lông lăng vaccine Nano Covac mơng Anom pơkĕ hăng mơnuih djru Nanogen dưi pok pơhai pơhlôm, hmâo bôh tơhnal klă. Amăng blan 6 anai amra pơphun lông lăng tal 3 hăng mrô gơnam mă yua prong, lông lăng ƀơi rơbêh kơ 13 rơbâo čô mơnuih hăng pơkra ƀơi lu tơring čar, ƀôn prong amăng lŏn ia. Tui hăng Nai tha prin, nai prin tha Đỗ Quyết, tơdơi kơ dưi hmâo Khul wai lăng pran jua dô̆ dŏng lŏn ia ta pel ĕp hăng Ding jum ia jrao dêh čar ta pơsit brơi pok pơhai lĕ amăng blan 9 pơ̆ anăp amra pơphun tlâ̆o pơgang vaccine anai./.

Siu H’ Prăk: Pô pơblang