VOV4.Jarai-Dơ̆ng mơ̆ng thun 2004, blan 3 rĭm thun lĕ blan Hlăk ai dưi hơmâo Anom bruă tơdăm dra mut phung pok pơhai brơi kơ abih bang ƀing hlăk ai tơdăm dra mut phung amăng dêh čar ngă tui bruă “Hlăk ai ngă bruă yua kơ ană plơi pla, mơnuih mơnam gleng nao, pơtô ba hlăk ai”. Blan hlăk ai pơphun pioh kơ tơdăm dra hlăk ai tơgŭ mă bruă hur har hloh, pơyơr pran jua mă bruă.

Hăng bruă ngă anun,  mơ̆ng rơnuč blan 2 truh ră anai, hlăk ai amăng dêh čar ta lăi hrom, hlăk ai kual Dap Kơdư hnun mơ̆n hlăk pơphun lu bruă mă ƀuh rơđah hok mơak hơdor glăi 90 thun hrơi akŏ pơjing Khul tơdăm dra mut phung rơnuk Cộng sanr Hồ Chí Minh.

Lơ̆m krep 90 thun hlâo kơ anai, ƀơi Pác Pó, să Trường Hà, tơring glông Hà Quảng, tơring čar Cao Bằng, Wa Hồ glăi pơ dêh čar ta git gai bruă hơkrŭ lŏn ia Việt Nam. Hăng bruă mă yôm pơphăn djơh hăng anun, să Trường Hà arăng ruah jing anih pioh kơ Anom bruă Tơdăm dra mut phung rơnuk Cộng Sản Hồ Chí Minh (CSHCM) pok pơhai lu bruă mă ngă tui jơlan hơdră pioh čơkă hrơi jơnum ruah khua ping gah dêh čar tal XIII hăng hơdor glăi tal 90 thun hrơi akŏ pơjing Khul tơdăm dra mut phung rơnuk CSHCM lơ 26/3/1931-lơ 26/3/2021 laih anun pơphun bruă mă Blan hlăk ai thun anai. Ayong Bùi Quang Huy, ding kơna aka sit nik apăn bruă ping gah dêh čar, Khua gum hrom git gai Anom bruă Tơdăm dra mut phung dêh čar brơi thâo:

“Blan hlăk ai ƀing gơmơi gleng nao nao hơdôm bruă mă yôm phun djru kơ tơdăm dra mut phung akŏ pơjing bruă mă hăng pơphun bruă mă. Hăng blan Hlăk ai lĕ jing mông pioh kơ djop gưl khua mua gah bruă tơdăm dra mut phung lăi pơthâo djop anom bruă ping gah, gong gai kơnuk kơna, mơnuih mơnam gleng nao kơ bruă hlăk ai tơdăm dra lăi hrom. Kơnang kơ bruă anun hlăk ai ngă hrom hơdôm bruă, hơdôm hơdră pơtrut tơlơi bơwih ƀong huă, mơnuih mơnam lăi hrom amăng lŏn ia”.

Pơphun mă bruă pơdong sang gru grua đưm Kim Đồng ƀơi Cao Bằng

Ƀrô djơ̆ tal anai, Anom bruă Tơdăm dra mut phung rơnuk CSHCM ăt jao lu ring bruă hlăk ai ƀơi tơring čar Cao Bằng, kah hăng: Pơphun bruă man pơdong sang gru grua hiam djuai ania Lô Lô ƀơi tơring glông Bảo Lạc, tơring čar Cao Bằng hăng rơnoh prăk 1 klai, mă yua sang djă pioh hơdrôm hră ƀơi sang hră să Đức Long, tơring glông Hòa An, rơnoh prăk 200 klăk; pơphun man pơdong sang gru đưm Kim Đồng ƀơi tơring glông Hà Quảng hăng rơnoh prăk 230 klăk….

Hrom hăng amăng đơ đam dêh čar, Anom bruă tơdăm dra mut phung tơring čar Dak Lak pơphun jơnum Blan hlăk ai thun 2021 hăng lu bruă mă yôm. Ƀơi mông pơphun bruă mă, Anom bruă hơmâo jao 10 boh rơdêh tang rơwang kơ čơđai muai ƀun rin găn rơgao tơlơi tơnap tap hrăm hră, jao 2 anung prăk pơphun bruă mă, nua sa anung 20 klăk prăk brơi kơ hlăk ai tơdăm dra mut phung ngă bruă pla tơmun tuk sreh amăng sang gôm mơnil hăng rông hơdăng lăng ngui.

Pơphun bruă pla kyâo hơdor na nao kơ Wa Hồ ƀơi anom bruă pioh kơ hlăk ai. Dưi tŭ mă prăk djru pơphun bruă mă, ayong Lê Minh Đông, dŏ ƀơi tơring glông Ea Hleo, tơring čar Dak Lak lăi:

“Bơni kơ anom bruă tơdăm dra mut phung tơring čar hơmâo djru prăk čan pơphun bruă mă anai. Ră anai kâo hlăk pla tơmun tuk sreh amăng sang gôm hơñôl. Sit mơ̆n hăng tơdăm dra mut phung tơlơi kiăng rơnoh prăk tuh pơ alin tơnap tap biă mă anun yơh hơmâo tơlơi djru hăng rơnoh prăk anai hiam biă mă"”

Hăng akŏ bruă Pơ-ư ang gru grua Tơdăm dra mut phung rơnuk CSHCM, amăng blan hlăk ai thun anai, hrom hăng djă hnong bruă mă hlăk ai pơyơr pran jua djru pơhlôm pơgang klin Covid 19, hlăk ai Dak Lak amra pok pơhai bruă mă kah hăng: jao rơnoh prăk pơphun bruă mă kơ hlăk ai hăng rơnoh prăk 300 klăk prăk, pơphun pơtô brơi tơlơi thâo pơphun bruă mă hăng lăi pơthâo bruă mă kơ hlăk ai; bưp ƀô̆ mơta ƀing khua mua hlăk ai hơđăp djop rơnuk; ngă tui lu ring bruă, črăn bruă pioh kơ hlăk ai pô ngă djơ̆ hăng tơlơi gêh gal ƀơi kual plơi pla anih dŏ, gum hrom pơđĭ bơwih ƀong huă, man pơdong plơi pla phrâo….

Anom bruă tơdăm dra mut phung Dak Lak jao rơnoh prăk tuh pơ alin

 pơphun bruă mă kơ hlăk ai

Ƀơi să Tân Hội, Anom bruă tơdăm dra mut phung tơring glông Đức Trọng, Lâm Đồng ăt pơphun jơnum ngă lơphet Blan hlăk ai hăng hrơi 7 pơyơr pran jua thun 2021. Pơ anai, lu ring bruă, lu črăn bruă hơmâo ngă tui pok pơhai kah hăng: Hơbô̆ bruă “Anih sĭ mơdrô kual plơi mơnuih ƀôn sang ƀu hơmâo djah djâo kơsu”; ƀơk gơnam, prăk hrăm hră kơ čơđai sang hră ƀun rin hur har hrăm hră; ƀơk 500 pok hră pơtô pơblang pơhlôm pơgang klin Covid 19 kơ mơnuih ƀôn sang hăng hlăk ai tơdăm dra mut phung.

Bơ ƀơi Dak Nông, Hlăk ai tơdăm dra mut phung amăng djop anom bruă kơnuk kơna hăng anom bruă sĭ mơdrô tơring čar ngă hrom hlăk ai kông ty Nhôm Dak Nông-TKV jơnum pơphun bruă pla kyâo “Yua kơ sa boh sang măi mơtah mơda”. Hơdră anai iâu pơthưr ƀing hlăk tơdăm dra mut phung, hlăk ai ƀơi kông ty hur har ngă hrom pla phrâo 1000 phun kyâo mơtah mơda jum dar sang măi.

Djop khul anom bruă tơdăm dra mut phung ngă tui boh ƀiă sa ring bruă pla phun kyâo mơtah mơda, rĭm čô tơdăm dra pla sa phun kyâo mơtah mơda kiăng pơgang anih hơdip jum dar anih mă bruă hiam klă rơ-ơ̆ rơ-iơ̆m.

Đing nao kơ bruă hlăi ai tơdăm dra hăng bruă mă mơ̆ng hlăk ai thun anai, ơi Châu Ngọc Tuấn Kơ-iăng Khua git gai ping gah tơring čar Gia Lai phrâo mă bruă hăng Khua mua git gai hlăk ai tơring čar pok pơhai bruă mă Blan hlăk ai. Pơhiăp ƀơi mông bưp, ơi Châu Ngọc Tuấn pơtrun hiăp:

Hrom hăng bruă ngă kiăo tui akŏ bruă laih pơkă, hơdră bruă thun yua kơ Anom bruă hlăk ai mut phung dêh čar pơphun, hlăk ai mut phung tơring čar Gia Lai khom ngă rơđah rơđong kơ bruă mă phun, pơtrut bơwih ƀong huă mơnuih mơnam tơring čar.

Amăng anun, gleng nao kơ bruă pơtô pơblang hlăk ai tơdăm dra mut phung, čơđai  muai, tơdăm ngek dra muai hăng mơnuih ƀôn sang thâo hluh kơ bruă ruah khua pơ ala mơnuih ƀôn sang dêh čar tal XV hăng ruah khua pơ ala djop gưl rơwang bruă thun 2021-2026; kơ bruă mă glăm ba mơ̆ng mơnuih ƀôn sang hăng bruă ruah khua.

Nay Jek: Pơblang