VOV4.Jarai - Hrơi Jar kmar pioh kơ ƀing čơđai ăt jing hrơi blung a mơng Blan ngă bruă djru ƀing čơđai thun 2021. Bruă ngă amăng Blan djru ƀing čơđai thun anai lĕ “Gum tơngan pơhlôm tơlơi dưi mơng ƀing čơđai, pơgang ba ƀing čơđai amăng tơlơi truh lŏn adai ngă, klin kheng”. Bruă ngă yôm blung a amăng blan anai lĕ Keh prăk djru pơgang ba ƀing čơđai Việt Nam hăng Ding jum mơnuih mă bruă - tơhan rơka hăng mơnuih mơnam djru ba gơnam ƀong huă kơ rơbêh 4 rơbâo čô čơđai bơdjơ̆ nao klin arăng iâu F0, F1 glăk dŏ pơčlah pơƀut či pơgang klin Covid-19. Tui tơlơi pơtrun anai, čơđai mơng phrâo tơkeng truh 16 thun glăk dŏ pơjrao, dŏ ƀơi anih pơčlah pơ sang ia jrao hơmâo djru prăk ƀong huă, ha čô hơmâo 80.000 prăk lơ̆m ha hrơi, djru amăng 21 hrơi. Hrơi pơphun djru mơng lơ 27/4 truh 31/12/2021. Keh prăk djru lăng ba ƀing čơđai Việt Nam iâu abih bang mơnuih gum djru, khul grup, mơnuih amăng dêh čar hăng mơng tač rơngiao djru ba kiăng čơđai Việt Nam dưi găn rơgao hrơi mông tơnap anai, djru ƀing čơđai hơmâo tơlơi hiam klă hloh pơ anăp anai.

Siu H’Mai: Pơblang