VOV4.Jarai - Mơmot lơ 21/3, Khul hlăk ai Cộng sản Hồ Chí Minh dêh čar ta pơphun ngă Lơphet bơni, apah pri 10 čô mơnuih hlăk ai Việt Nam mơbruă thun 2020. Anai lĕ hơdôm gru ba jơlan hlâo mơbruă hloh amăng hơdôm bruă mă kơ gưl hlăk ai rơnuk anai. Pri bơni gru hlăk ai Việt Nam anai jing črăn pri mơng Khul hlăk ai dêh čar ta pioh pơtrut pơđĭ kyar bôh thâo hlăk ai hăng pơtrut bruă bơkơtưn hrăm tui, pơhrăm pô, kơsem min bôh thâo phrâo, mă bruă, pơčeh phrâo amăng tơdăm ngek dra muai; hơkrŭ đĭ hăng pơđĭ kyar bruă Khul, Grŭp hăng ngă pơhưč tơlơi đing nao mơng mơnuih mơnam pioh kơ bruă pơtô pơhrăm, pơtô brơi dong rơnuk hlăk ai. Hơdôm gru hlăk ai dưi bơni lĕ hơdôm gru pơjing rai pran ngă pơhưč, pơđom pioh gru prong amăng mơnuih mơnam gơnang kơ hơdôm tơlơi gir run mơng drơi pô hăng hơdôm bôh tơhnal lăp djă pioh. Amăng mrô 10 čô mơnuih hlăk ai anai, ƀu djơ̆ kơnong kơ hmâo hơdôm gru hlăk ai amăng lŏn ia ôh mơ̆ ñu dô̆ hmâo hlăk ai Việt Nam pơ̆ dêh čar tač rơngiao hmâo pơsit laih bôh thâo amăng lu mơta bruă./.

Siu H’ Prăk: Pô pơblang