Prăp lui kơ gơnam blơi yua kơ Tết kơ mơnuih blơi yua gơnam tam, Sang bruă pơkra ƀañ mứt kĕo Hà Nội (Hanabaco) hmâo prăp laih gơnam tết thun 2025 mơ̆ng krah thun hlâo. Kiăo tui anun, mrô gơnam blơi mut mứt tết, ƀañ kĕo tết ... đĭ 10%, hăng giăm truh 350 tơn mứt, 100 tơn ƀañ kĕo. Gum hrŏm hăng mơnuih blơi yua, anom bruă ba tơbiă lu gơnam pioh yua hrơi Tết hăng gơnam klă hiam hăng nua ñu găp ƀrô, anăn păn lu mơta. Ơi Lê Ngọc Huy, Khua Anom bơwih ƀong, Sang bruă ƀañ mứt kĕo Hà Nội brơi thâo, lơm pơkra gơnam, sang bruă ngă tui tơpă hơdôm tơlơi pơkă kơ anô̆ agaih hơdjă pơhlôm klă kiăng ba truh klă hloh kơ mơnuih blơi yua. Hrŏm hăng anun, gơnam pioh kơ Tết dưi hmâo anom bơwih ƀong đing nao anô̆ mơngưi mơ̆ng hơdôm kual anih anom:

“Ƀing gơmơi hmâo hơdôm gơnam hmâo tơhnal rơnuk anai hloh ƀudah pơhrua nao rai mơ̆ng 3 kual. Anun lĕ hơdôm hip mứt mơ̆ ƀing gơmơi ba mut amăng hơdôm gơnam wot 3 kual Kơdư-Tŏng Krah- Dơnung dêh čar hơdôm djuai mứt hmâo 12 anô̆ pơƀâo; hrŏm hăng hơdôm anô̆ pơƀâo mơ̆ng hlâo kah hăng: hơbơi ngu, rơya, cà rốt... lĕ hmâo dong wot hơdôm anô̆ pơƀâo kah hăng mơnâu bôh kơbuă, bôh khăm mah, bôh mit, sầu riêng... Kiăo tui anun čang rơmang ba glăi lu mơta kơ mơnuih ƀong, kah hăng anô̆ lu mơta kơ gơnam pioh mơnuih blơi yua hmâo dong anô̆ ruah mă”.

Hơdôm hrơi anai, lu anom bơwih ƀong gah braih apiăng, gơnam ƀong huă ăt prăp lui djop mơn mrô gơnam, mrô gơnam lu pioh blơi prăp kơ hrơi Tết mơ̆ng mơnuih ƀôn sang. Ơi Trương Mạnh Linh, Khua git gai bruă braih apiăng mơ̆ng Grŭp Tân Long brơi thâo, hơdôm hrơi anai hmâo laih lu hră rơkâo blơi gơnam 3 blan tal sa thun 2025. Hrŏm hăng sĭ gơnam kơ dêh čar tač rơngiao, anom bơwih ƀong hmâo prăp lui laih sa mrô braih lu pioh kơ Tết tui phiăn juăt, hăng mrô gơnam ăt đĭ na nao tui rim thun hăng hmâo laih kơčăo bruă djă pioh răk pioh klă hloh kơ mơnuih blơi yua čơkă Tết Ất Tỵ 2025:

“Ƀing gơmơi prăp lui na nao djă pioh gơnam pioh pơhlôm mrô kiăng yua amăng lŏn ia, hăng hơdră phang thu hăng djă pioh braih amăng anih klă, pioh pơhlôm anô̆ klă braih dưi djă pioh sui hloh kơ anih anom sĭ braih amăng lŏn ia, pơhlôm kơ braih yua amăng tal Tết”.

Kiăng pơhlôm pioh klă hloh bơyan blơi prăp prong hloh amăng thun, hơdôm bôh anom sĭ braih apiăng kiăng hloh ăt hmâo laih mơn kơčăo bruă pơkra gơnam. Hơdôm anom pơpha hyu, sĭ gơnam kiăng hloh gơgrong hlâo tô nao rai, mă yua gơnam mă mơ̆ng đang hmua, gơnam ƀong huă, hơdôm gơnam phara ha jăn mơ̆ng hlâo hơdôm bôh tơring čar, lu mơta gơnam (đing nao hlâo hăng gơnam Việt Nam) djru mrô kiăng sĭ amăng tal rơnuč thun, tal hlâo, amăng hăng tơdơi kơ Tết tui phiăn juăt. Ơi Trương Sỹ Bá, Khua Khul wai lăng Sang bruă bơwih ƀong sĭ mơdrô gơnam mă mơ̆ng đang hmua BAF Việt Nam brơi thâo, hăng añăm un anom bơwih ƀong hmâo tơlơi prăp lui tŏng ten, đĭ pŭ un tañ kiăng djop anăm un sĭ kơ mơnuih blơi yua amăng tal Tết tui phiăn juăt thun 2025:

“Tết thun anai ƀing gơmơi amra ba hyu sĭ mơ̆ng 1,1 truh lơ 1,2 klăk drơi, hăng mrô ñu lu 2 wot. Hrŏm hăng tơlơi đĭ pŭ un tañ mơ̆ng anom bơwih ƀong hrŏm hăng hơdôm sang bruă rông un pơkon dong, amra djru đĭ mrô un sĭ hyu... Mơ̆ng anun abih bang amra djop brơi kơ mơnuih blơi yua”.

Tui hăng yă Nguyễn Kiều Oanh, Kơ-iăng Khua Gơnong bruă sĭ mơdrô ƀôn prong Hà Nội, tal tết anai ƀôn prong hmâo laih tơlơi prăp lui pơhlôm hơdôm mrô gơnam sĭ, ăt kah hăng hơdôm mơta gơnam pơhlôm klă pioh kơ mơnuih ƀôn sang ƀơi ƀôn prong – mơ̆ng hlâo Tết tui phiăn juăt 3 blan. Hrŏm hăng anun, pơphun lu anih anom sĭ gơnam pơhlôm djop gơnam, nua hơđong djru mơnuih ƀôn sang; pơphun pok pơhai hơdôm jơlan hơdră pơsur pran jua blơi gơnam, ƀu pioh tơ̆i đưn gơnam, kơƀah gơnam ngă nua ñu đĭ lu:

“Ƀing gơmơi ăt hmâo mă bruă laih hăng hơdôm glông pơpha hơdôm mơnuih sĭ mơdrô ăt kah hăng hơdôm bôh anom bơwih ƀong sĭ hyu raih daih, hơdôm sang čơ mơ̆ng hlâo pioh thâo rơđah tơlơi kiăng yua ăt kah hăng mrô gơnam pioh djop kơ mơnuih ƀôn sang amăng tal Tết thun anai. Ƀing gơmơi ăt pơtŏng sit mơn amra ngă klă bruă mă mơ̆ng pô pioh ƀu kơƀah gơnam ăt kah hăng hơdôm gơnam sĭ mơdrô ƀơi Hà Nội leng kơ pơhlôm anô̆ klă ñu”.

Kiăng pơhlôm djop hơdôm mơta gơnam kiăng yua hloh, hơđong anih anom sĭ mơdrô gơnam tal Tết tui phiăn juăt Ất Tỵ thun 2025: Ding jum sĭ mơdrô rơkâo Gơnong bruă sĭ mơdrô hơdôm bôh tơring čar, ƀôn prong gah dêh čar lăng tui tơlơi sĭ mơdrô, mrô hmâo hăng sĭ hơdôm gơnam kiăng hloh, gơgrong hlâo hmâo jơlan gah ƀudah ba tơbiă hăng hơdôm ƀirô apăn bruă pơhlôm dưm kơnar hơđong ƀơi anih sĭ, ƀu pioh hmâo tơlơi kơƀah gơnam, tơ̆i đưn mrô gơnam ba truh đĭ nua ƀu hmao thâo amăng tal rơnuč thun hăng Tết tui phiăn juăt.

Hrŏm hăng anun, gơgrong hlâo prăp lui mrô gơnam, djă pioh gơnam kiăng hloh pioh kơ Tết; pok pơhai hơdôm bruă hơđong anih anom sĭ mơdrô tui tơlơi pơkă mơ̆ng tơlơi phiăn. Hrŏm hăng anun, pơtrut kơtang pok pơhai hơdôm bruă mă ngă tui Bruă pơsur “Mơnuih Việt Nam đing nao blơi yua gơnam Việt Nam”, Jơlan hơdră ba gơnam Việt Nam nao pơ̆ plơi pla, nao pơ̆ kual, ƀut sang măi pơkĕ hrŏm hăng hơdôm jơlan hơdră jơnum ngui sang čơ, pơsur pran jua, hrŏ trun nua, pơsur mơnuih blơi yua. Kơtưn bruă pel ĕp, lăng tui anih anom sĭ mơdrô, đing nao pel ĕp gah nua, anô̆ klă gơnam tam, hơdôm tơlơi pơkă kơ pơhlôm gơnam ƀong huă, hơdôm bruă ngă djă kŏng pioh gơnam či đĭ nua ča čot./.