Tơ tă anai, rơnoh ngă hmua pla pơjing ƀơi Lạc Dương hơmâo pơhrui glăi truh 330 klăk prăk sa hektar lơ̆m sa thun.

Thun blan rơgao, mah bơbeč djơ̆ klin kheng Covid 19 ngă, samơ̆ bruă ngă hmua hăng ba gơnam sĭ mơdrô kơphê če juâ̆t lăi  kơphê Arabica-Catimor kơñĭ tui hơdră pơkra ming sa dơnuai sir krep djă anăn Liangbiang mơ̆ng pô sang anŏ sĭ mơdrô Yŭ Mnang, să Dă Sar, tơring glông Lạc Dương, tơring čar Lâm Đồng ăt mă bruă hơđong đôč. Tui hăng amai K'Chăm lăi, dưi hơmâo boh tơhnal djơh hăng anai lĕ yua sang anŏ gơñu hơmâo ngă tui hơdră ba yua boh thâo ia rơgơi mrô amăng djop bruă mă mơ̆ng pla pơjing, wai lăng, pơgang truh kơ-uă pơkra ming tơpung kơphê lêng kơ ba yua boh thâo mrô soh hlong truh kơ bruă sĭ mơdrô:

“Mơ̆ng pơplih bruă sĭ mơdrô kơphê dŏ asăt brơi kơ ƀing hyu blơi jing bruă mă pơkra ming tơpung kơphê, asar kơphê krô hna sĭ tơpung rơnoh prăk pơhrui glăi hơđong hloh. Rơngiao kơ anun, ƀu kơnong pơsir bruă mă kơ ƀing dŏ soh amăng sang anŏ đôč ôh, dŏ pơsir bruă mă kơ lu mơnuoh amăng plơi pla. Gơnam sĭ mơdrô mơ̆ng kơphê hơdôm tơpung ta kơ-uă hĭ ba sĭ mơdrô abih pơ lu anih kah hăng Sài Gòn, Hà Nội, Vũng Tàu, An Giang. Yua ta pơkra ming hăng sĭ tui hră pơkôl blơi lu anun yơh huăi bơngơ̆t đơi ôh hyu ĕp anih blơi. Mơ̆ng anun mơ̆n bruă pơhrui glăi prăk kăk ăt hơđong pơkă hăng sĭ mơdrô gơnam pơkŏn”.

Yua ba yua boh thâo pơkra ming sa dơnuai, pơblih ba yua mrô amăng bruă pla pơjing, ming pơkra truh sĭ mơdrô kơphê Arabica-Catimor tơsă kơñĭ mă anăn Liangbiang mơ̆ng amai K’Chăm dưi tŭ yap jing gơnam sĭ mơdrô OCOP djơ̆ hnong pơkă 3 asar pơtŭ, laih anun hlăk pok prong hơdră pơkra ming sĭ mơdrô kiăng ngă djơ̆ tơhnal pơkă 4 asar pơtŭ.

Tơ tă anai, amai K’Chăm hlăk ngă hrom hơbô̆ bruă pơkra ming lir hơbit kơphê hơđong kjăp hăng rơbêh hơpluh boh sang anŏ mơnuih ƀôn sang pơkŏn amăng plơi pla ngă hrom. Mah rơnoh kơphê pơkra ming sĭ mơdrô aka ƀu lu ôh, kiah pơkra ming mơ̆ng kơphê đang hmua sang anŏ pla sa hektar sa thun 7 tơn, samơ̆ anai lĕ hơdră mă bruă pơkra ming sa dơnuai laih anun tơhnal bruă mơak sa tơlơi pơ-ư ang prong mơ̆ng mơnuih ƀôn sang djuai ania K’Ho pơ anai ngă pô.

“Kâo pơmin amăng thun pơ anăp anai ăt pok pơhư prong dơ̆ng hơbô̆ bruă pơkra ming. Yua kơ anun, sit hơmâo kơmlai lĕ ngă hrom hăng lu sang anŏ, rơnoh pơhrui glăi mơ̆ng ta hăng sang anŏ mơnuih ƀôn sang pơkŏn amra đi lu hloh. Hrom hăng anun, sit pơphun bruă pơkra ming pơđĭ kyar tui, gơnam tam tơpung kơphê lu tui lĕ kơphê djă anăn sĭ mơdrô Arabica mơ̆ng Dă Sar amra hơmâo lu mơnuih thâo nao hloh”.

Tui hăng ơi Čill Poh, Kơ-iăng Khua Jơnum min mơnuih ƀôn sang tơring glông Lạc Dương, bruă ba yua mrô, tui hơdră boh thâo ia rơgơi ba yua amăng bruă ngă hmua pla pơjing, truh kơ bruă ba hyu sĭ mơdrô, pôr pơthâo gơnam tam pioh arăng blơi, hơmâo lu sang bruă sĭ mơdrô amăng tơring glông ngă laih, samơ̆ hăng mơnuih ƀôn sang djuai ƀiă kah hăng amai K’Chăm lĕ sa yak phrâo đôč yôm biă mă.

Kiăng pok tui lu hloh hơbô̆ bruă anai, rơngiao kơ bruă pơtô hrăm, pơtô glăi boh thâo ia rơgơi hăng pơtô glăi kơ mơnuih ƀôn sang, tơring glông Lạc Dương hlăk akŏ pơjing khul  grup ngă hrom OCOP laih anun akŏ pơdong anih anom lăi pơthâo gơnam OCOP djă anăn Liangbiang brơi tuai hyu ngui thâo.

Anai lĕ anih pioh kơ mơnuih ƀôn sang hăng sang bruă sĭ mơdrô pơtruh nao rai, hrăm tui, pơblih tơlơi pơmin, hơdră sĭ mơdrô raih daih, ngă hrom hăng pơđĭ tui tơlơi gêh găl pơkra ming gơnam sĭ mơdrô mơ̆ng đang hmua phara hơjăn ƀơi tơring glông. Ơi Čill Poh lăi:

“Tơdơi kơ lu tơlơi gir run truh ră anai tơring glông Lạc Dương hơmâo akŏ pơdong anih pơdă gơnam sĭ mơdrô OCOP kiăng pôr pơthâo, pơčrâo ba gơnam hơmâo pơkra ming amăng plơi pla kiăng tuai hyu ngui thâo. Mơ̆ng anun, tơlơi čang rơmang gơnam pơkra ming rai ƀơi tơring glông Lạc Dương amra mut tơma hrom hăng lu mơta gơnam pơkŏn amăng dêh čar. Mơ̆ng anun, djru ĕp anih sĭ mơdrô hơđong hloh amăng dêh čar ta pô hăng sĭ mơdrô hăng dêh čar tač rơngiao. Djru hrom pơtrut tơlơi bơwih ƀong huă mơnuih mơnam amăng tơring glông pơđĭ kyar tui”.

Truh ră anai, Lạc Dương hơmâo 28 mơta gơnam mơ̆ng đang hmua djă anăn OCOP ngă djơ̆ laih tơhnal pơkă 3 asar pơtŭ truh 4 asar pơtŭ. Tơ tă anai, tơring glông Lạc Dương ăt hlăk rơkâo đĭ hăng khua tơring čar Lâm Đồng pơtong lăng hăng pơsit dơ̆ng 19 mơta gơnam OCOP pơkŏn. Anai lĕ hơdôm mơta gơnam đang hmua dưi pơkra ming tui boh thâo ia rơgơi, ba yua ia rơgơi phrâo mrô lơ̆m pla pơjing truh pơkra ming jing gơnam sĭ mơdrô.

Bruă ngă bang bơngač anun lar hyu kơtang biă mă hăng hơdră ngă hmua rơnuk phrâo, Lạc Dương pơđĭ tui rơnoh sĭ mơdrô boh čroh mơ̆ng đang hmua, pơkă dưm dưm truh 330 klăk prăk lơ̆m sa hektar sa thun, đĭ tui 60 klăk prăk sa hektar pơkă hăng hlâo kơ thun hơmâo klin Covid 19 hơđuh rai.