Pok phun hăng 9 čô mơnuih, truh ră anai Anom mă bruă hrŏm gah Đang hmua – Sĭ mơdrô – Bơwih brơi bruă apah Tơ Tung (să Tơ Tung, tơring glông Kbang, Gia Lai) hmâo pơđĭ kyar laih truh 67 čô mơnuih gum hrŏm pla hăng pơkra jrao mă mơ̆ng plăng. Tui hăng amai Nguyễn Thị Thanh Hương, Khua Anom mă bruă hrŏm, hlâo adih neh wa biă ñu hluai tui phun hơbơi plum hăng kơtor rơtă. Mơ̆ng thun 2019 truh ră anai, kơnang kơ hơdră pla plăng mơ̆ hơdôm mơnuih amăng anom hmâo pơhrui glăi prăk hơđong. Anom mă bruă hrŏm hmâo pơjing laih anăn păn gơnam pơkra mơ̆ng plăng djơ̆ tui OCOP 3 bôh pơtŭ gưl tơring čar, hăng anih pioh sĭ hơđong ƀơi sa dua bôh siêu thị hăng anih sĭ jrao. Amai Nguyễn Thị Thanh Hương lăi pơthâo:

 “Lơm dưi pơplih gơnam, anô̆ klă amra prong hloh. Ƀing gơmơi gir run ngă tui hơdôm tơhnal pơkă OCOP pioh amuñ ba gơnam nao sĭ, pơjing pran đăo kơnang kơ mơnuih blơi yua. Ră anai, anom mă bruă hrŏm dưi hmâo Sang bruă pơkra jrao hăng Măi mok mă yua gah ia jrao Đà Nẵng blơi gơnam, hăng pơhrui glăi hơnong ñu 50-60 klăk prăk sa ektar rim thun”.

Amăng kual jum dar mơ̆ng Kual pơgang glai klô Kon Čư̆ Răng, sa dua bôh dêh čar anom bơwih ƀong hmâo pơphun tuh pơplai hrŏm hăng mơnuih ƀôn sang tơring glông Kbang mă yua anô̆ gal kơ phun jrao. Kah hăng ƀơi să Đăk Krong hmâo 2 rơwang bruă pla phun jrao glăk pok pơhai ƀơi plơi pla Kon Trang hăng plơi Kon Lanh Te, abih bang prong giăm truh 40 ektar. Tui hăng anun, ƀơi să Sơn Lang, Kon Pne, Sơ Pai hăng Krong (ƀơi tơring glông Kbang) hmâo laih giăm truh 240 ektar pla sa nhân mriah, sâm đá, đương quy, đinh lăng hăng kơñit glăk dưi pla hơbit ƀudah ƀơi rơgôp tơ-ui kyâo glai. Ơi Ngô Văn An, Kơ-iăng Khua Jơnum min mơnuih ƀôn sang să Đăk Krong, čang rơmang hơdôm rơwang bruă pla phun jrao amra djru pơplih tơlơi hơdip mơda bơwih ƀong huă mơ̆ng mơnuih ƀôn sang djuai ania ƀiă:

 “Hluai tui rơwang bruă ƀơi plơi Kon Trang (7 ektar) hăng plơi Kon Lanh Te (30 ektar), amra pơjing dong lu bruă mă kơ mơnuih ƀôn sang amăng să. Hơdôm sang bruă ăt amra pơsir mơn anah phun pla, gơnam mă yua hăng kĭ pơkôl hră pơ-ar blơi sĭ gơnam hăng neh wa amăng rơwang tô̆ tui”.

Mơ̆ng hrơi hmâo Tơlơi pơtrun pơsit mrô 09 mơ̆ng dêh čar mơ̆ng Grŭp mă bruă Ping gah tơring čar Gia Lai (tal 15) thun 2019 kơ pơgang hăng pơlar phun jrao, truh ră anai, đơ đam tơring čar hmâo pơlar laih rơbêh kơ 4.200 ektar đang phun jrao. Gia Lai hmâo laih 55 mơta gơnam pơkra mơ̆ng phun jrao hmâo tŭ yap OCOP (amăng anun hmâo 9 mơta gơnam 4 asar bôh pơtŭ). Tơring čar Hmâo 4 bôh sang măi pơkra jrao, pơhlôm hơduah ĕp anih anom pla pơkra, hrŏm hăng anun wai lăng kơjăp glông bruă mơ̆ng tơjŭ pla truh pơkra. Hrŏm hăng anun, ră anai Gia Lai hmâo 4 rơwang bruă pơlar phun jrao hmâo pơsit mă yua, abih bang năng ai ñu 497 klai prăk, hăng 10 rơwang bruă amăng anăn iâo pơthưr tuh pơplai hăng prăk pơkă lăng hlâo rơbêh kơ 7.272 klai prăk.

Ơi Nguyễn Văn Hoan, Kơ-iăng Khua Gơnong bruă đang hmua hăng pơđĭ kyar ƀôn lan tơring čar Gia Lai, brơi thâo, tơring čar ngă gal brơi kơ hơdôm bôh anom bơwih ƀong tuh pơplai kơ bruă phun jrao.

 “Bruă ngă pơhưč tuh pơplai, ƀing gơmơi amra ngă gal brơi klă hloh kơ hơdôm bôh anom bơwih ƀong pel ĕp hơdôm kual amra pla phun jrao lăp djơ̆ tơhnal hơdip mơ̆ng rim djuai phun pla. Hơdôm rơwang bruă ba tơbiă lĕ amra lăi pơthâo kơ anom bơwih ƀong hơdôm kual amra ngă rơwang bruă. Biă ñu ƀing gơmơi čang rơmang anom bơwih ƀong ba hơdôm sang măi pơkra jrao rai pơ̆ tơring čar”./.