Tơring čar Lâm Đồng pơsit 350 bôh sang anô̆ hmâo rơmô brung ƀă tơlơi ruă hăng djai tơdơi kơ tlâ̆o vaccine pơgang bơbrah klĭ khil khul Navet - LpVac mơ̆ng Sang bruă Navetco. Tơdơi kơ lu wot bơkơtuai, truh ră anai hmâo laih 330 bôh sang anô̆, hăng 7.186 drơi rơmô ruă hăng 511 drơi rơmô djai tŭ ư čơkă mă prăk duh mơ̆ng Sang bruă Navetco hăng abih bang mrô prăk rơbêh kơ 35 klai 500 klăk prăk.

Ră anai Sang bruă Navetco tla laih prăk duh tal 1 lĕ giăm truh 18 klai, mrô prăk duh tal 2 amra ngă giong hlâo lơ 28/11 pơ̆ anăp. Tui hăng ơi Nguyễn Hà Lộc, Kơ-iăng Khua Gơnong bruă đang hmua hăng pơđĭ kyar ƀôn lan tơring čar Lâm Đồng, ră anai dô̆ 20 bôh sang anô̆ mơnuih ƀôn sang akă tŭ ư hăng jơlan gah duh nua răm rai. Tơring čar amra rơkâo Sang bruă Navetco pơphun bơkơtuai dong, ba tơbiă jơlan gah duh nua lăp djơ̆ pioh pơhlôm tơlơi dưi kơ mơnuih rông rơmô./.