Tơring čar Dak Lak ră anai hơmâo rơbêh 1.700 sang rông čim čăng črah, pơƀut lu amăng plơi prong Buôn Ma Thuột hăng hơdôm boh tơring glông Ea Kar, Ea Súp, Krông Pač. Hruh čim čăng črah amăng tơring čar mơng 8-10 tơ̆n ha thun. Dak Lak lĕ tơring čar prong hloh amăng kual Dap kơdư hăng dong amăng 10 boh tơring čar, ƀôn prong hơmâo sang rông čim čăng črah prong hloh đơ đam dêh čar. Ră anai, đơ đam tơring čar hơmâo 15 gơnam pơkra mơng hruh čim čăng črah hơmâo tŭ yap lĕ gơnam OCOP 3 asar pơtŭ, 8 gơnam OCOP 4 asar pơtŭ.

Dak Lak hơmâo gơnam pơkra mơng hruh čim čăng črah blung a nao sĭ mơdrô pơ tač rơngiao tui jơlan phun pơ dêh čar Khač hăng sĭ tui jơlan pơkŏn nao pơ sa, dua boh dêh čar Mi, Australia, Japan…Hrŏm hăng boh than ba glăi anun, gơnong bruă hruh čim čăng črah ƀơi tơring čar Dak Lak glăk bưp tơnap tap hăng lu tơlơi lông kơ bruă dưm dăp kual rông phun, anih pơkra pơjing hăng blơi pơhrui gơnam, wai lăng gơnam tam hăng pơjing anăn apăn sĭ mơdrô.