Ơi Y Sanh Niê, djuai ania Êđê dŏ amăng ƀuôn Pan, să Ea Yông, tơring glông Krông Pač (Dak Lak) pla kơphê, tiu sui laih. Phun tiu juăt hlăt mŏt pơčrăm ngă ƀu mơboh lu, nua sĭ ăt đĭ trun na nao; bơ phun kơphê tha laih, tơdah pla glăi ăt kiăng tuh pơ alin lu mơn. Thun 2011, ơi Y Sanh Niê khin hơtai tuh pơ alin pla pơplah sầu riêng amăng đang kơphê. Phun sầu riêng pla ăt amuñ, samơ̆ ƀu bơwih brơi klă amra djai yua hlăt mŏt pơčrăm, ƀudah mơboh ƀiă, ƀu hiam. Hăng đang pla đơ đam 1,7 ektar, hơmâo laih 1.400 phun kơphê hăng rơbêh 400 phun tiu, ơi Y Sanh Niê pla pơplah dong 130 phun sầu riêng djuai Dona. Lơm phun sầu riêng prong glông amra pơging brơi phun kơphê. Hơdôm thun giăm anai dưi pơhrui rơbêh 10 tơ̆n sầu riêng, 2 tơ̆n kơphê, 1,5 tơ̆n tiêu. Ơi Y Sanh Niê brơi thâo, tơdơi kơ duh hĭ prăk blơi kmơk, ia jrao pruih, rĭm thun pơhrui glăi giăm 1 klai prăk.

“Blung hlâo ăt ƀu tuh pơ alin lu lơi, sang anŏ gơmơi ăt ƀu lui hĭ phun kơphê hăng tiu, mơ̆ pla pơplah hrŏm. Rĭm thun kơphê pơhrui giăm ha tơ̆n ha mơkrah, thun anai kah hơmâo 2 tơ̆n. Pơhrui glăi abih tih lơm duh glăi prăk tuh pơ alin mơng 500-600 klăk prăk”.

Ơi Y Mi Êban dŏ amăng ƀuôn Ea Kmat, să Hoà Đông, tơring glông Krông Pač ăt pla phun tiu pơplah hăng kơphê mơn. Lơm hơmâo lu mơnuih pla sầu riêng, ơi Y Mi Êban ăt blơi 40 anah sầu riêng Dona ba glăi pla. Ñu ăt pla pơplah hăng phun kơphê, tiu. Ră anai amăng đang hmua hơmâo 120 phun sầu riêng, 900 phun kơphê hăng 200 phun tiu amăng đơ đam 1,4 ektar. Ơi Y Mi Êban brơi thâo, đang hmua pla pơplah anai dưi pơhrui glăi giăm 1,5 klai prăk rĭm thun.

“Hăng tơlơi gơgrong lĕ sa čô mơnuih apăn bruă Ping gah, mơnuih ba gru kiăng neh met wa hrăm tui, kâo ăt pla pơplah sầu riêng, tiu, kơphê. Tơdah pla kơnong kơphê đôč ăt pơhrui ƀu hơmâo lơi, phun sầu riêng thun anai pĕ pơhrui giăm 10 tơ̆n, tui nua sĭ ră anai dưi pơhrui glăi giăm 1,2 klai prăk”.

Hrŏm hăng bruă ngă pơdrong asah amăng sang anŏ, ơi Y Sanh Niê hăng Y Mi Êban lêng kơ djru brơi neh met wa amăng plơi pla amăng bruă pla pơjing, prăk tuh pơ alin, anah phun pla…kiăng pơđĭ kyar bơwih ƀong huă-pơklaih mơng ƀun rin. Ơi Y Niêm Niê-Khua anom bruă ngă hmua hăng pơđĭ kyar ƀon lan tơring glông Krông Pač brơi thâo, ơi Y Sanh Niê hăng Y Mi Êban lĕ ƀing apăn bruă Ping gah ba jơlan hlâo amăng pơđĭ kyar bơwih ƀong huă pơklaih mơng ƀun rin.

“Ƀơi tơring glông Krông Pač hơmâo lu mơnuih apăn bruă Ping gah rơgơi amăng bơwih ƀong huă, amăng anun hơmâo ơi Y Sanh dŏ amăng să Ea Yông hăng ơi Y Mi Êban dŏ amăng să Hoà Đông. Amăng mông pơtop hrăm kơ bruă ngă hmua brơi neh met wa amăng kual mơnuih djuai ania ƀiă, ƀing gơmơi lêng lăi pơthâo hơdôm hơbô̆ bruă anai brơi kơ neh met wa kiăng hrăm tui, pơđĭ kyar bơwih ƀong huă pơklaih mơng ƀun rin”.

Bruă khin hơtai pla pơplah sầu riêng hrŏm hăng kơphê, tiu tui sang anŏ ơi Y Sanh Niê hăng Y Mi Êban ƀơi Krông Pač ngă pơplih tơlơi bơwih ƀong huă, ba glăi pơhrui hơmâo hmăi amăng sang anŏ. Ƀing gơñu ƀu djơ̆ kơnong pơklaih mơng ƀun rin hơđong kjăp đôč ôh mơ̆ ăt jing hơbô̆ bruă bơwih ƀong rơgơi, jê̆ giăm kiăng neh met wa amăng plơi pla hrăm tui./.